মুখ্যমন্ত্ৰীয়ে ফেছবুক লাইভযোগে কৰিছে কেইবাটাও মন্তব্য৷ মুখ্যমন্ত্ৰীয়ে কৈছে- বিটিচিৰ নিৰ্বাচন সম্পূৰ্ণ হ’ল৷ এইবাৰ প্ৰথমবাৰৰ বাবে বড়োলেণ্ড নিৰ্বাচনত কোনো হিংসাত্মক ঘটনা সংঘটিত হোৱা নাই৷ মই বড়োভূমিৰ ৰাইজক ইয়াৰ বাবে অভিনন্দন জনাইছো৷ ইয়াৰোপৰি বিপিএফ প্ৰধান হাগ্ৰামা মহিলাৰীকো আমি নিৰংকুশ সংখ্যাগৰিষ্ঠতাৰে বিজয় সাবস্ত্য কৰাৰ বাবে অভিনন্দন জনাইছো৷ আমি জুবিনৰ মৃত্যুৰ বিষয়ক লৈ ব্যস্ত থকাৰ বাবে নিৰ্বাচনত বিশেষ প্ৰচাৰো চলাব নোৱাৰিলো৷
আমি কৰ্তব্যৰ আহ্বানৰ বাবে কিছু ছীট হেৰুৱালো৷ কিন্তু আমাৰ এই ত্যাগৰ বাবেই জুবিনৰ শেষযাত্ৰাৰ অনুষ্ঠানত কোনো গাফিলতি হোৱা নাই৷ আমি এই পৰাজয়ক স্বীকাৰ কৰিছো৷ ইয়াৰমাজতো যিসকলে ভাৰতীয় জনতা পাৰ্টীৰ ওপৰত আস্থা ৰাখি ভোট প্ৰদান কৰিলে সকলোৰে ওচৰত মই কৃতজ্ঞ৷ আকাংশিত ফল নাপালেও আমি অৰুণোদয় আঁচনি বা আন যি আঁচনি আছে আমি সকলোখিনি দি যাম৷
জুবিন প্ৰসংগত কয়- ৬ বছৰ পূৰ্বেই এদিন মই কৈছিলো, জুবিনক পৰিচালিত কৰা ব্যক্তিসকলে জুবিনক ধ্বংসৰ পথলৈ লৈ গৈছে৷ জুবিন আমাৰ জাতীয় সম্পদ৷ বিষ্ণু, জ্যোতি, ভূপেন হাজৰিকাৰ পাছতেই জুবিন৷ মই জুবিনক জীৱিত কালতেই সেই কথা জনাইছো৷ জুবিনৰ প্ৰতি মই কৃতজ্ঞও৷ জুবিনে মোৰ দেউতাৰ এটা গীতো বাণীবদ্ধ কৰিছে৷ এজন পুত্ৰ হিচাপে মই খুবেই গৌৰৱাম্বিত আছিলো৷ জুবিনৰ যাত্ৰাৰ সংগী হোৱাৰ সুযোগ পালে মই কেতিয়াও তাৰপৰা আঁতৰি থকা নাছিলো৷ জুবিনৰ জীৱনৰ বহু গুৰুত্বপূৰ্ণ সময়ৰ মই সাক্ষী আছিলো৷ কোনো এজন জুবিন অনুৰাগীতকৈ মই নিজকে কম অনুৰাগী বুলি নাভাৱো৷ জুবিনক ভালপোৱা আমাৰ সকলোৰে অধিকাৰ আছে৷ জুবিনক আমি জীয়াই ৰাখিম সংস্কৃতিৰে৷
জুবিনৰ ন্যায় বিষয়ত কয়- শ্যামকানু, সিদ্ধাৰ্থ আৰু প্ৰৱাসী অসমীয়াকেইজনক আমি বহু কথা সুধিব লাগিব৷ সিদ্ধাৰ্থ আৰু শ্যামকানুক মই কৈছো, জনতাৰ ধৈৰ্য্যৰ সৈতে নেখেলিব৷ পূজাৰ দিনকেইটাত আমি আপোনালোকক বিচৰা নাই৷ দশমীৰ পিছত আহক৷ ফেছবুক পোষ্ট, ভিডিঅ কৰি হাৰিব নোৱাৰিব৷ যদি নিৰ্দোষী আপোনালোক সাহসেৰে আহক৷ চিআইডিক জনাওক৷ আদালতত জনাওক৷ ৰাইজৰ ক্ষোভৰ সৈতে খেলা নকৰিব৷ মই অসমৰ মুখ্যমন্ত্ৰী হিচাপে আপোনালোকক স্পষ্ট সঁকীয়নি দিছো৷ আপোনালোকে ৬ অক্টোবৰত গুৱাহাটীলৈ আহি নিজৰ মন্তব্য আগবঢ়াওক৷ মই সকলোকে স্পষ্ট কৰি দিব খুজিছো৷ মই অসমবাসীক কভিড, বানপানী কতোৱেই এৰা নাই৷ অসমৰ জনতাই জুবিনৰ ন্যায়ৰ বাবে আন্দোলন কৰিছে মইয়ো তাৰ পৰা পৃথক নহয়৷ জুবিনৰ ঘটনাৰ সৈতে জড়িত সকলো ব্যক্তিক আইনৰ সন্মুখলৈ অনাৰ দায়িত্ব লৈছো বুলি মই প্ৰতিশ্ৰুতি দিছো৷ আছামী কেতিয়াবা দুটা দিন পলাই থাকে কিন্তু আইনৰ হাত বহুত দীঘল৷ আইনে কেনেকৈ আগবাঢ়িব লাগে জানে৷ আইনে কাকো ৰেহাই নিদিয়ে৷ মই এই দায়িত্ব কৰ্তব্যনিষ্ঠাৰে পালন কৰিম৷ অসম পুলিছ কিমান শক্তিশালী সেই প্ৰমাণ দি আহিছে৷ এইখন চৰকাৰে জুবিনক ন্যায় দিবই৷ এইখন চৰকাৰে শ্যামকানু, সিদ্ধাৰ্থৰ দৰে ব্যক্তিৰ ওচৰত শিৰনত নকৰে৷ এইখন চৰকাৰে অসমৰ ৰাইজৰ ওচৰতহে শিৰনত কৰিব৷ সিদ্ধাৰ্থ, শ্যামকানুৱে বৃথা প্ৰচেষ্টা চলাই লাভ নাই৷ আমি আইনৰ বাহিৰত গৈ শাস্তি দিয়াটো নিবিচাৰো৷ কিন্তু আইনৰ পৰা নপলাব, আপোনালোক হাৰি নাযায়৷ চৰকাৰ মনে মনে নাথাকে৷
এইখন জুবিনৰ অসম৷ এইখন আমাৰ জননী, জন্মভূমি৷ এইখন অসমক আমি নেপাল কৰিব নোৱাৰো৷ কেইদিনমান ধৰি ছচিয়েল মিডিয়াত নেপালৰ উদাহৰণ দিয়া হৈছে৷ ইয়াত আমি চিলাৰায়ৰ উদাহৰণহে দিম৷ নেপালৰ উদাহৰণেৰে অসম নচলে৷ ইয়াত তেনে ঘটনা হলে জুবিনে আঘাত পাব৷ জুবিনৰ ন্যায় বিচাৰি আন্দোলন কৰা দুজন ব্যক্তিক আৰক্ষীয়ে আটক কৰিছে৷ অজয় ফুকনক লৈ জুবিনে জীৱন্ত কালতেই কৈ গৈছে, এই মানুহজনৰ লগত মোৰ কোনো সম্পৰ্ক নাই৷ আনহাতে ভিক্টৰ দাস৷ ভিক্টৰে এজনী সহজ সৰল ছোৱালীক মাৰি চৰ্চাত আহিছিল৷ জুবিনেও এই কাম ভালপোৱা নাছিল৷ জুবিনৰ নামত চৰকাৰ বিৰোধী ৰাজনীতি হব নোৱাৰে৷ জুবিনৰ নামত অসমক নেপাল কৰিব নোৱাৰো৷ জুবিনৰ বাবে অসমক ভাৰতৰ শ্ৰেষ্ঠ ৰাজ্য হিচাপে গঢ়ি তুলিব লাগিব৷ অসমক নেপাল নকৰিব৷ মই হাতযোৰ কৰি কৈছো৷ হিংসাই কাকো ন্যায় নিদিয়ে৷ আইনেহে ন্যায় দিব৷ অসমৰ মুখ্যমন্ত্ৰী হিচাপে মই প্ৰতিশ্ৰুতি দিছো৷ শেখৰ, সিদ্ধাৰ্থ, শ্যামকানুক বিচাৰ নোহোৱাকৈ হাতৰ পৰা ওলাই যাব নিদিও৷ আপোনালোকে নিজে আইন হাতত তুলি নল’ব৷
ইতিমধ্যেই সিদ্ধাৰ্থৰ এটিএম, ক্ৰেডিট কাৰ্ড ফ্ৰিজ কৰা হৈছে৷ বেছিদিন পলাই থাকিব নোৱাৰে৷ ৩ কোটি জনতাৰ প্ৰতিনিধি হিচাপে মই জুবিনৰ ন্যায় দিয়াত গাফিলতি নকৰো৷ জুবিনৰ হকে কাম কৰিব পৰা চৰকাৰ আৰু মুখ্যমন্ত্ৰী আছে৷ মই যদি বিফল হওঁ মোক আপোনালোকে শাস্তি দিব৷ মই সেই শাস্তি মানি লম৷ মই মোৰ লক্ষ্যত অটল হৈ আছো৷ লক্ষ্যত অটল হৈ থাকিয়েই মই কাম কৰি যাব৷ ময়েই নহয় অখিল গগৈয়েও শ্যামকানুৰ লগত ফটো উঠিছে৷ আমি সামাজিক ব্যক্তি হিচাপে কাৰোবাক কাৰোবাক লগ পাওঁ ফটো উঠো৷ অপৰাধীক সহায় কৰাটো অসমৰ মুখ্যমন্ত্ৰীৰ দায়িত্ব নহয়৷ আমি সমাজক সন্তুষ্ট কৰিবই লাগিব৷ মই এটাই অনুৰোধ কৰিছো অসমক নেপাল কৰিম নকব৷ বহু কষ্টেৰে এইখন অসম গঢ়া হৈছে৷ এইখন অসম উন্নতিৰ পথেৰে আগুৱাই৷ এই অসম বিকাশৰ পথেৰে আগুৱাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
