লোকসভা নিৰ্বাচনৰ পূৰ্বে ভাৰত জোড়ো ন্যায় যাত্ৰা কৰিছিল ৰাহুল গান্ধীয়ে৷ দেশৰ বিভিন্ন প্ৰান্তত কেতিয়াবা যদি খোজ কাঢ়ি যাত্ৰা কৰিছিল কেতিয়াবা আকৌ বাছেৰে যাত্ৰা কৰিছিল৷ অশান্ত জৰ্জৰ মণিপুৰত শাসক দলৰ নেতাই যাবলৈ সাহস নকৰিলেও ৰাহুল গান্ধীয়ে সেই মণিপুৰৰ পৰাই আৰম্ভ কৰিছিল ন্যায় যাত্ৰা৷ নিৰ্বাচনী ফলাফল প্ৰকাশিত হোৱাৰ পাছতেই এইবাৰ নতুন যাত্ৰাৰ কথা ঘোষণা কৰিছে কংগ্ৰেছ দলে৷
উত্তৰপ্ৰদেশত ধন্যবাদ যাত্ৰা কৰিব ৰাহুল গান্ধীয়ে৷ ৰাহুলৰ সৈতে থাকিব কংগ্ৰেছৰ শীৰ্ষ নেতৃত্ব৷ উত্তৰপ্ৰদেশৰ নিৰ্বাচনী ফলাফল দেখিয়েই এই সিদ্ধান্ত লৈছে কংগ্ৰেছ দলে৷ আগন্তুক ১১ ৰ পৰা ১৫জুন পৰ্যন্ত উত্তৰপ্ৰদেশত, ‘ধন্যবাদ যাত্ৰা’ৰ আয়োজন কৰিছে কংগ্ৰেছ দলে৷দলৰ শীৰ্ষ নেতৃত্বৰ ওপৰিও কৰ্মী আৰু সমৰ্থকেও এই কাৰ্যসূচীত ভাগ ল’ব৷ উত্তৰপ্ৰদেশত মুঠ ৪০৩ খন বিধানসভা আসন আছে৷ প্ৰতিখন বিধানসভা সমষ্টিতেই এই যাত্ৰা চলাব ৰাহুলে৷
কংগ্ৰেছৰ তৰফৰ পৰা জনোৱা অনুসৰি এই যাত্ৰাৰ মূল উদ্দেশ্য হৈছে উত্তৰপ্ৰদেশৰ জনতাক ধন্যবাদ জনোৱা৷ কংগ্ৰেছে জনোৱা অনুসৰি উত্তৰপ্ৰদেশৰ বিভিন্ন প্ৰান্তত ১১ জুনৰ পৰা ১৫ জুন পৰ্যন্ত এই যাত্ৰা চলিব৷ এই যাত্ৰা কালত উত্তৰপ্ৰদেশৰ বাসিন্দাৰ হাতত তুলি দিয়া হ’ব ভাৰতৰ সংবিধানৰ একোখন প্ৰতিলিপি৷ এইবাৰৰ লোকসভা নিৰ্বাচনত বিজেপিক ধাক্কা দিছে উত্তৰপ্ৰদেশে৷ যি স্থানত ৰামমন্দিৰ নিৰ্মাণ কৰা হৈছে সেই স্থানতেই বিজেপিক বেয়া পাইছে জনতাই৷ উত্তৰ প্ৰদেশৰ ৮৮আসনৰ মাজত মাত্ৰ ৩৩খন আসনহে লাভ কৰিছে বিজেপি দলে৷ কংগ্ৰেছৰ নেতৃত্বাধীন বিৰোধী জোট ইণ্ডিয়াই পাইছে ৪৩খন আসন৷ তাৰমাজতেই কংগ্ৰেছৰ ৬খন আসন আৰু সমাজবাদী পাৰ্টীয়ে পাইছে ৩৭খন আসন৷
উত্তৰপ্ৰদেশত ২০১৯ চনৰ পৰা ২০২৪ চনৰ নিৰ্বাচনৰ ফলাফলত আকাশপাতাল পাৰ্থক্যও আছে৷ বিগত নিৰ্বাচনত সেই ৰাজ্যত ৬২খন আসন বিজেপিয়ে অকলেই লাভ কৰিছিল৷ সেইবাৰ সমাজবাদী পাৰ্টীয়ে লাভ কৰিছিল ৫খন আসন আৰু কংগ্ৰেছে লাভ কৰিছিল এখন আসন৷ এইবাৰ অংক সলনি হৈছে৷ বাৰাণসীৰ পৰা প্ৰধানমন্ত্ৰী নৰেন্দ্ৰ মোদীয়ে জয়লাভ কৰিলেও ব্যৱধান কমিছে৷ মাত্ৰ ডেৰ লাখ ভোটৰ ব্যৱধানত জয়ী হৈছে নৰেন্দ্ৰ মোদী৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
