‘‘ডিচেম্বৰৰ ভিতৰত সমষ্টিবাসীৰ পৰা মতামত সংগ্ৰহ কৰিম৷ কংগ্ৰেছে মই কৰা প্ৰশ্নৰ উত্তৰ নিদিয়ে, সেয়ে কংগ্ৰেছ দল এৰা কথা চিন্তা কৰিছো৷ ৯৫% নিশ্চিত মই কংগ্ৰেছ দল ত্যাগ কৰাটো৷ প্ৰতিটো চুবুৰীলৈ গৈ আলোচনা কৰিম৷’’ কংগ্ৰেছ এৰাৰ ইংগিত দি এইদৰে কয় কংগ্ৰেছৰ নিলম্বিত বিধায়ক শ্বেৰমান আলীয়ে৷
উল্লেখ্য যে দলৰ নীতি আদৰ্শৰ বিপৰীতে কাম কৰাৰ অভিযোগত কংগ্ৰেছৰ বিধায়ক শ্বেৰমান আলীক কংগ্ৰেছে নিলম্বিত কৰি ৰাখিছে৷ নিলম্বিত বিধায়কগৰাকীয়ে কংগ্ৰেছক কেইটামান পোনপতীয়া প্ৰশ্ন কৰি তাৰ উত্তৰ বিচাৰি আহিছিল৷
বিধায়কগৰাকীয়ে পূৰ্বতে ঘোষণা কৰিছিল যে কংগ্ৰেছে দিয়া উত্তৰৰ পিছতে তেওঁ কংগ্ৰেছ ত্যাগ কৰিব নে দলটোতে থাকিব সেই সিদ্ধান্ত গ্ৰহণ কৰিব৷
লগতে পঢ়ক চৰ্চাৰ কেন্দ্ৰ বিন্দুত কিয় বিজয় আৰু অনন্যা? বিজয়ক কি বুলি ক’লে অনন্যাই?
বিধায়ক শ্বেৰমান আলীয়ে লগতে এইটো কৈ আহিছিল যে কংগ্ৰেছে উত্তৰ নিদিলে তেওঁ সমষ্টিবাসীৰ মতামত গ্ৰহণ কৰিব আৰু সমষ্টিবাসীয়ে যি ৰায় দিয়ে তাৰ ভিত্তিতে এই সন্দৰ্ভত সিদ্ধান্ত গ্ৰহণ কৰিব৷ বিধায়ক শ্বেৰমান আলী আহমেদে শনিবাৰে সংবাদ মাধ্যমত এই প্ৰসংগতে উক্ত মন্তব্য কৰিছে৷
ইফালে বিধায়কগৰাকীয়ে সেই সন্দৰ্ভত মন্তব্য কৰাৰ লগতে কংগ্ৰেছ বিধায়ক তথা প্ৰাক্তন মন্ত্ৰী ৰকিবুল হুছেইনক তীব্ৰ আক্ৰমণ কৰিছে৷ ৰকিবুল হুছেইনক আক্ৰমণ কৰি বিধায়ক শ্বেৰমান আলীয়ে কয় যে ৰকিবুল হুছেইনহঁতৰ দৰে নেতাই সংখ্যলঘু জনগোষ্ঠীক প্ৰতাৰণা কৰিছে৷
কংগ্ৰেছৰ হাইকামাণ্ডক বিপথে পৰিচালিত কৰি কংগ্ৰেছ দলটোকো ৰকিবুল হুছেইনহঁতৰ দৰে নেতাই ধ্বংস কৰিছে বুলিও বিস্ফোৰক অভিযোগ কৰিছে বিধায়ক শ্বেৰমান আলীয়ে৷
লগতে পঢ়ক চৰ্চাৰ কেন্দ্ৰ বিন্দুত কিয় বিজয় আৰু অনন্যা? বিজয়ক কি বুলি ক’লে অনন্যাই?
দলটোৰ নেতৃত্বক তীব্ৰ ভাষাৰে সমালোচনা কৰি তেওঁ লগতে কয় ‘‘যিদৰে কংগ্ৰেছত দল এৰা প্ৰৱণতা চলি আছে, তেনে সময়ত এয়া অলীক কল্পনা যে কংগ্ৰেছে নিৰ্বাচনত জিকি দেশ শাসন কৰিব পাৰিব৷’’
‘‘দেশ মাতৃৰ সেৱাৰ বিপৰীতে ধনৰ পিছত দৌৰিব ধৰিলে কংগ্ৰেছৰ নেতাই৷ কংগ্ৰেছৰ ৰাজনীতি কেৱল ক্ষমতাকেন্দ্ৰিক, ধনকেন্দ্ৰিক৷ বিজেপিৰ দ্বাৰা কংগ্ৰেছ পৰিচালিত হৈ আছে৷ মই নাম জানো কাক ফাণ্ডিং কৰি আছে বিজেপিয়ে৷’’ এই দৰে বিস্ফোৰক মন্তব্যও কৰিছে বিধায়ক শ্বেৰমানে৷
ইফালে AIUDF, TMC, AAP আৰু ৰাইজৰ দল আদিয়ে তেওঁক জে’লত থকাৰ পৰাই তেওঁলোকৰ দলত যোগদান কৰিবলৈ আহ্বান জনাই আছে বুলিও তাৎপৰ্যপূৰ্ণ মন্তব্য কৰিছে শ্বেৰমান আলীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
