নয়দাৰ বৰাউলাগাঁৱৰ এটা PGত নৃশংস হ*ত্যাৰ বলি হ’ল অসমৰ এগৰাকী ১৯ বছৰীয়া যুৱতী। PGটোৰ প্ৰথম মহলাত বাস কৰা এজন যুৱকৰ কোঠাৰ পৰা উদ্ধাৰ কৰে যুৱতীগৰাকীৰ ৰ*ক্তাক্ত মৃ*তদেহ। যুতীগৰাকীৰ শৰীৰত অসংখ্য আঘাতৰ চিন পোৱা গৈছে। ঘটনাৰ পিছতে অভিযুক্তই বাহিৰৰ পৰা কোঠাটোত তলা মাৰি পলায়ন কৰে। ঘৰৰ মালিকৰ অভিযোগৰ ভিত্তিত আৰক্ষীয়ে অভিযুক্তৰ বিৰুদ্ধে হ*ত্যাৰ গোচৰ ৰুজু কৰি অনুসন্ধান আৰম্ভ কৰিছে। প্ৰাৰম্ভিক তদন্তত সুৰাক লৈ বিবাদৰ কথা পোহৰলৈ আহিছে।
আৰক্ষীয়ে সদৰী কৰা মতে, নি*হত যুৱতীগৰাকী অসমৰ ডিব্ৰুগড় নিবাসী মেহেক আহমেদ বুলি জানিব পৰা গৈছে। মেহেকে দ্বাদশ শ্ৰেণী সম্পূৰ্ণ কৰি প্ৰায় তিনি সপ্তাহ আগতে নয়দালৈ গৈছিল বুলি প্ৰাথমিক তদন্তত প্ৰকাশ পাইছে। সঞ্জনা নামৰ এগৰাকী বান্ধৱীৰ সৈতে মেহেকে PGটোত আছিল বুলি জানিব পৰা গৈছে। বিহাৰৰ কাটিহাৰ নিবাসী ৰমন নামৰ এজন যুৱকেও একেটা ঘৰৰ প্ৰথম মহলাৰ এটা কোঠাত আছিল। আৰক্ষীৰ মতে, ৰমনে বি টেক সম্পূৰ্ণ কৰি এটা IT কোম্পানীত কাম কৰিছিল যদিও কিছুদিনৰ পৰা ৰমন কৰ্মসংস্থাপনহীন হৈ থকা বুলি PGৰ চৌহদটোৰ একাংশ বাসিন্দাই আৰক্ষীক জনায়।
আৰক্ষীৰ প্ৰাৰম্ভিক তদন্ত অনুসৰি বিগত ৮ আগষ্টৰ নিশা মেহক আৰু সঞ্জনা নামৰ যুৱতীগৰাকীয়ে নিজৰ কোঠাৰ বাহিৰৰ লবীত আছিল। ইফালে ৰমনে নিজৰ কোঠাৰ বাহিৰত বহি সু*ৰা সেৱন কৰি আছিল। এই কথাক লৈয়ে দুয়ো পক্ষৰ মাজত কাজিয়াৰ সূত্ৰপাত হয়। পিছদিনা ৯ আগষ্টত সঞ্জনা কোনো কামৰ পৰা উভতি অহাৰ পিছত মেহকক নেদেখি যোগাযোগ কৰিবলৈ চেষ্টা কৰাত মেহেকৰ মোবাইলটো চুইচ অফ পায়। ব্যাপক অনুসন্ধানৰ পিছতো তাইক বিচাৰি উলিয়াব পৰা নাছিল। কিছু ঘণ্টাৰ পাছত পিজিৰ আৱাসীয়ে ৰমনৰ কোঠাত দুৰ্গন্ধ পায়। কোঠাটো বাহিৰৰ পৰা তলা মাৰি থোৱা আছিল, ৰমন উপস্থিত নাছিল। ইয়াৰ পিছতে সন্দেহজনকভাৱে ঘৰৰ মালিকে আৰক্ষীক খবৰ দিয়ে।
আৰক্ষীয়ে মৃ*তদেহটো জিম্মাত লৈ মৰণোত্তৰ পৰীক্ষাৰ বাবে প্ৰেৰণ কৰিছে। ঘটনাস্থলীৰ পৰা সাক্ষ্য সংগ্ৰহৰ বাবে মাতি অনা হৈছে ফৰেনছিক দল। দলটোৱে কোঠাটো আৰু ইয়াৰ আশে-পাশে থকা অঞ্চলটো পৰীক্ষা কৰিছে। আৰক্ষীয়ে মৃতকৰ মোবাইল ফোনটোও জব্দ কৰি পৰীক্ষাৰ বাবে প্ৰেৰণ কৰিছে। হ*ত্যাৰ পূৰ্বে মেহক কাৰ সংস্পৰ্শত আছিল আৰু এই কাণ্ডৰ আঁৰৰ উদ্দেশ্য কি সেয়া নিৰ্ণয় কৰিবলৈ কল ডিটেইল, চেট আৰু অন্যান্য মোবাইল কাৰ্য্যকলাপ পৰীক্ষা কৰা হৈছে।
বৰ্তমান আৰক্ষীৰ শীৰ্ষ বিষয়াসকলে জনোৱা মতে, PGৰ আন বাসিন্দাসকলক জেৰা কৰা হৈছে। অভিযুক্ত ৰমনক বিচাৰিবলৈ সম্ভাৱ্য আত্মগোপন স্থানত অভিযান চলোৱা হৈছে। মৰণোত্তৰ পৰীক্ষাৰ প্ৰতিবেদন, ফৰেনছিক তদন্ত, আৰু মোবাইল তথ্যই গোচৰটোৰ ওপৰত অধিক স্পষ্টতা প্ৰদান কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
