এয়া কোনো নাটকৰ কাহিনী নহয়৷ বাস্তৱত ঘটা এক ঘটনা৷ যি ঘটনাই আপোনাকো আচৰিত কৰি তুলিব৷ ঘটনাটো দেশৰ ৰাজধানী দিল্লীৰ৷ দিল্লী আৰক্ষীৰ অভিজ্ঞ ছাব ইন্সপেক্টৰ অংকুৰ মালিক৷ তেওঁ ছাইবাৰ প্ৰতাৰণাৰ একাধিক গোচৰ নিজৰ দক্ষতাৰে নিষ্পত্তি কৰিছে৷ বাজেয়াপ্ত কৰিছে কোটি কোটি টকা৷ তাৰপৰাই ২ কোটি টকা লৈ SI অংকুৰে নেহা পুনিয়া নামৰ প্ৰেয়সীক লৈ উধাও হৈছে৷ অৱশেষত আৰক্ষীৰ তদন্তত ধৰা পৰিছে অংকুৰ আৰু নেহা৷
আৰক্ষী সূত্ৰৰ খবৰ অনুসৰি অংকুৰ ২০২১ বেচৰ SI, উত্তৰ পূৰ্ব দিল্লীৰ ছাইবাৰ থানাত পোষ্টিং আছিল তেওঁৰ৷ নেহাও আৰক্ষী৷ তেওঁৰ পোষ্টিং আছিল জিটিবি এনক্লেভ থানাত৷ দুজনেই বিবাহিত৷ অংকুৰৰ পত্নী আছিল উত্তৰপ্ৰদেশৰ বাগপতত৷ নেহাৰ স্বামী আছিল দিল্লীত৷ আৰক্ষী বিভাগৰ ট্ৰেইনিঙত দুগৰাকী চিনাকি হৈছিল৷ তাৰপৰাই প্ৰেম৷ আৰক্ষীৰ দাবী যে সেই সময়ৰ পৰাই বিভিন্ন অপৰাধ কৰি আহিছিল অংকুৰ আৰু নেহাই৷
বিগত মাৰ্চত শাৰীৰিক অসুস্থতা থকা বুলি ৭ দিনৰ ছুটি লৈছিল অংকুৰে৷ তাৰপিছতেই আৰু চাকৰিত জইন নকৰিলে অংকুৰে৷ অংকুৰৰ সৈতে একেসময়তেই নেহাইয়ো ছুটি লৈছিল৷ তেওঁৱো চাকৰিত জইন কৰা নাছিল৷ শেষত আৰক্ষীয়ে নিজাববীয়াকৈ নিঁখোজ বুলি কেছ ডায়েৰি প্ৰস্তুত কৰি তদন্ত আৰম্ভ কৰিছিল৷ তাৰপিছতেই ওলায় বিস্ময়কৰ তথ্য৷ অভিযোগ যে প্ৰতাৰণাৰ গোচৰত বাজেয়াপ্ত কোটি কোটি টকা গোপনে নিজৰ হাতত লৈ উধাও হৈছে অংকুৰ৷ কেৱল সেয়াই নহয়, আদালতত ভুৱা অভিযোগকাৰীৰ নামত নথিপত্ৰ জমা দি ধন উঠোৱাৰো অভিযোগ উঠিছে তেওঁৰ বিৰুদ্ধে৷
সম্প্ৰতি ইন্দোৰৰ পৰা অংকুৰ আৰু নেহাক গ্ৰেপ্তাৰ কৰিছে দিল্লী আৰক্ষীয়ে৷ ধৃত আৰক্ষীৰ পৰা ১ কোটি টকাতকৈ বেছি মূল্যৰ সোণ, নগদ ১২ লাখ টকা, ১১টা মোবাইল ফোন, এটা লেপটপ, ৩খন এটিএম কাৰ্ড আৰু কেইবাবিধো গুৰুত্বপূৰ্ণ সামগ্ৰী উদ্ধাৰ কৰা হৈছে৷ আৰক্ষীয়ে জনাইছে যে চুৰিৰ টকা লৈ সোণ ক্ৰয় কৰিছিল অংকুৰে৷ এই ঘটনাত তিনি অভিযুক্ত ক্ৰমে মুহম্মদ ইলিয়াছ, আফি ওৰফে মনু, আৰু ছাদাৰ নামেৰে তিনিজন প্ৰতাৰককো গ্ৰেপ্তাৰ কৰিছে আৰক্ষীয়ে৷ অংকুৰে এওঁলোকৰ একাউণ্টলৈ চুৰিৰ ধন পঠিওৱা বুলি অভিযোগ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
