দেশৰ এজন বিখ্যাত নেতাই প্ৰধানমন্ত্ৰী নৰেন্দ্ৰ মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথক উত্তৰ কোৰিয়াৰ একনায়কত্ববাদী শাসক কিম জং উনেৰে তুলনা কৰিলে৷
উত্তৰ প্ৰদেশৰ ভোটদাতাক উদ্দেশ্যি কৰি দেশৰ অদমনীয় কৃষক নেতা ৰাকেশ টিকেইটে কয় যে দ্বিতীয় এজন কিম জং উনক নিৰ্বাচন কৰাতো উচিত নহ’ব৷
প্ৰধানমন্ত্ৰী নৰেন্দ্ৰ মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথক উত্তৰ কোৰিয়াৰ শাসক কিম জং উনৰ সৈতে তুলনা কৰি কৃষক নেতা টিকেইটে কয় যে জনতাই মুখ্যমন্ত্ৰী আৰু প্ৰধানমন্ত্ৰী হিচাপে এজন জননেতা বিচাৰে নে উত্তৰ কোৰিয়াৰ দৰে এজন দ্বিতীয় কিম জং উন বিচাৰে সেয়া সিদ্ধান্ত ল’ব লাগিব৷
তেওঁ লগতে কয় ‘‘আমি এখন স্বেচ্ছাচাৰী একনায়কত্ববাদী চৰকাৰ নিবিচাৰো৷ আমি জনতাক আহ্বান জনাও যে তেওঁলোকৰ ভোটসমূহ উচিতভাৱে ব্যৱহাৰ কৰক৷’’
উত্তৰ প্ৰদেশৰ নিৰ্বাচন চলি থকাৰ মাজতে কৃষক নেতা টিকেইটে তেওঁ গৃহ জিলা মুজাফ্ফৰনগৰত বিজেপিয়ে হিন্দু-মুছলমানৰ নামত ভোটাৰক ধৰ্মীয় মেৰু বিভাজন কৰাৰো গুৰুতৰ অভিযোগ কৰিছে৷
এই ক্ষেত্ৰত বিজেপিক কঠোৰভাৱে সমালোচনা কৰি কৃষক নেতা টিকেইটে কয় যে পশ্চিম উত্তৰ প্ৰদেশে উন্নয়নৰ সম্পৰ্কে কথা পাতিবলৈ বিচাৰে৷ তেওঁলোকে হিন্দু-মুছলমান, জিন্না আদি ধৰ্মীয় কথাৰে ভোটাৰক মোহাৱিষ্ট কৰিব নোৱাৰে, বৰং ভোট হেৰুওৱাবহে৷ মুজাফ্ফৰনগৰ হিন্দু-মুছলমানৰ খেল খেলাৰ ষ্টেডিয়াম নহয়৷
ইফালে সংবাদ সংস্থা পিটিআইৰ আগত কৃষকক সমৰ্থন কৰা দলকহে ভোটাৰে বিচাৰে বুলিও অতি তাৎপৰ্যপূৰ্ণ মন্তব্য কৰিছে ৰাকেশ টিকেইটে৷ এইদৰে কৈ ৰাকেশ টিকেইটে সমাজবাদী পাৰ্টি-আৰএলডিৰ মিত্ৰজোঁটকে প্ৰকাৰান্তে সমৰ্থন কৰা বুলিও চৰ্চা লাভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
