জীৱনৰ ভাটি বেলাত ইটোৰ পিছত সিটো সংকটে লগ নেৰা হৈছে বিহাৰৰ প্ৰাক্তন মুখ্যমন্ত্ৰী তথা ৰাষ্ট্ৰীয় জনতা দলৰ প্ৰধান লালু প্ৰসাদ যাদৱৰ৷ পূৰ্বৰ চাৰিটা গোচৰৰ দৰেই পশু খাদ্য কেলেংকাৰিৰ পঞ্চমটো কেলেংকাৰিৰ গোচৰটো দোষী সাব্যস্ত হৈছে লালু প্ৰসাদ যাদৱ৷
মংগলবাৰে ৰাঁচিৰ চিবিআইৰ এখন বিশেষ আদালতে আৰ জে দিৰ প্ৰধান তথা বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱসহ অন্য ৭৪ গৰাকীক দোষী সাব্যস্ত কৰিছে৷
উল্লেখ্য যে বিচাৰধীন পশুখাদ্য কেলেংকাৰিৰ পঞ্চমটো গোচৰত ১৭০ গৰাকী অভিযুক্তৰ নাম আছিল আৰু ইয়াৰে ৫৫ গৰাকীৰ ইতিমধ্যে মৃত্যু হৈছে আৰু সাতজনে ৰাজসাক্ষী হ’বলৈ সন্মত হয়৷
পশুখাদ্যৰ কেলেংকাৰিৰ পঞ্চম গোচৰটোৰ মতে দ’ৰাণ্ডা কোষাগাৰৰ পৰা ১৩৯.৩৫ কোটি টকা পশুখাদ্যৰ নামত কেলেংকাৰি সংঘটিত কৰাৰ অভিযোগ উত্থাপন হৈছিল৷ তদানীন্তন মুখ্যমন্ত্ৰী লালু প্ৰসাদ যাদৱ উক্ত বিত্তীয় কেলেংকাৰিত জড়িত থকাৰ মূল অভিযুক্ত হিচাপে অভিযোগ অনা হৈছিল৷
যোৱা ২৯ জানুৱাৰিত ৰাঁচিৰ চিবিআইৰ বিশেষ আদালতে দুয়োপক্ষৰ যুক্তি শুনিলেও গোচৰটোৰ ৰায় প্ৰদান কৰা নাছিল৷ মংগলবাৰে আদালতৰ বিচাৰপতি শশীয়ে গোচৰটোৰ ৰায় প্ৰদান কৰি লালু প্ৰসাদ যাদৱসহ অন্য ৭৪ লোকক কেলেংকাৰিটোত জড়িত থকাৰ অভিযোগত দোষী সাব্যস্ত কৰিছে৷
স্মৰ্তব্য যে লালু প্ৰসাদ যাদৱে মুখ্যমন্ত্ৰী হৈ থকা অৱস্থাত বিহাৰত পশুখাদ্যৰ নামত বৃহৎ কেলেংকাৰি সংঘটিত হোৱাৰ অভিযোগ উত্থাপন হৈছিল৷ উক্ত কেলেংকাৰিৰ বিৰুদ্ধে মুঠ পাঁচটা গোচৰ ৰুজু কৰা হৈছিল৷
মুঠ ৯৫০ কোটি টকাৰ বিহাৰৰ পশুখাদ্য কেলেংকাৰিৰ পূৰ্বৰ কে’বাটাও গোচৰত দোষী সাব্যস্ত হৈ প্ৰাক্তন মুখ্যমন্ত্ৰী লালু প্ৰসাদ যাদৱে কাৰাবাস খাটি আছিল যদিও কিছু মাহৰ পূৰ্বে জামিন লাভ কৰি কাৰামুক্ত হৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
