ক্ৰিকেটৰ সকলো ফৰ্মেটৰ পৰা অৱসৰ ৱেষ্ট ইণ্ডিজৰ এইগৰাকী অতিকে জনপ্ৰিয় ক্ৰিকেটাৰৰ
ৱেষ্ট ইণ্ডিজৰ কিংবদন্তি অলৰাউণ্ডাৰ ড্ৱেইন ব্ৰাভোৱে বহু পূৰ্বেই আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল। কিন্তু তথাপিও তেওঁক বহু টি-২০ লীগত খেলা দেখা গৈছিল। যোৱা বছৰ ব্ৰাভোৱেও আই পি এলৰ পৰা অৱসৰ গ্ৰহণ কৰে। এইবাৰ ব্ৰাভোৱে কেৰিবিয়ান প্ৰিমিয়াৰ লীগ ২০২৪ত খেলিছিল। কিন্তু আঘাতৰ বাবে তেওঁ ড্ৰপ আউট কৰিবলগীয়া হয়। ইয়াৰ পিছত এতিয়া ব্ৰাভোৱে ক্ৰিকেটৰ সকলো ফৰ্মেটৰ পৰা অৱসৰ লোৱাৰ কথা ঘোষণা কৰিছে। ব্ৰাভোক আৰু চিপিএলত খেলা দেখা নাযাব।
ব্ৰাভোৱে এতিয়ালৈকে চিপিএলত খেলিছিল যদিও এতিয়া তেওঁ ৱেষ্ট ইণ্ডিজত অনুষ্ঠিত হৈ থকা টি-২০ লীগৰ পৰাও অৱসৰ গ্ৰহণ কৰিছে। অৱসৰৰ কথা ঘোষণা কৰি ব্ৰাভোৱে লিখিছে, “মোৰ মনটোৱে আগবাঢ়ি যাব বিচাৰে, কিন্তু মোৰ শৰীৰে আৰু বিষ, ক্ষয়-ক্ষতি, মানসিক চাপ সহ্য কৰিব নোৱাৰে।” মই নিজকে এনে এটা অৱস্থাত ৰাখিব নোৱাৰো য’ত মই মোৰ সতীৰ্থ, মোৰ অনুৰাগী বা মই প্ৰতিনিধিত্ব কৰা দলবোৰক নিৰাশ কৰো। সেয়ে গধুৰ হৃদয়েৰে খেলৰ পৰা অৱসৰ লোৱাৰ কথা আনুষ্ঠানিকভাৱে ঘোষণা কৰিছো।
ব্ৰাভোৱে ১৮ বছৰীয়া টি-২০ ক্ৰিকেট কেৰিয়াৰত চিপিএল দলৰ লগতে আইপিএল, পাকিস্তান ছুপাৰ লীগ আৰু বিগ বেছ লীগৰ সৈতে চেম্পিয়নশ্বিপ লাভ কৰিছে। তেওঁৰ পাঁচটা চিপিএল খিতাপসমূহৰ ভিতৰত তিনিটা খিতাপ ২০১৭ আৰু ২০১৮ চনত একেৰাহে ট্ৰফী লাভ কৰা ট্ৰিনবাগো নাইট ৰাইডাৰ্ছৰ সৈতে। ইয়াৰ পূৰ্বে তেওঁ ছেইণ্ট কিটছ আৰু নেভিছ পেট্ৰিয়াটছক ২০২১ চনত প্ৰথমটো খিতাপ দখল কৰিছিল। ইয়াৰ উপৰিও ৱেষ্ট ইণ্ডিজৰ সৈতে দুবাৰৰ বিশ্বকাপ বিজয়ী আৰু টি-২০ত ব্ৰাভোৰ নামত ৬৩১টা উইকেট আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
