অসম লাইভ২৪ঃ নিৰ্বাচন আয়োগে ভোটদান প্ৰক্ৰিয়াত কেইবাটাও বৃহৎ সালসলনিৰ সিদ্ধান্ত লৈছে। এতিয়াৰে পৰা ভোটদানৰ বাবেই আপুনি ঘৰলৈ যোৱাৰ প্ৰযোজন নাথাকিব। যিকোনো স্থানত থাকিয়েই কৰিব পাৰিব ভোটদান। নিজৰ সমষ্টিতহে কেৱল ভোটদান কৰিব পাৰিব এনে নিয়ম এতিয়াৰে পৰা আৰু নাথাকিব। কৰ্মৰ বা শিক্ষাৰ বাবেই হওক যিকোনো কাৰণতেই নহওক কিয় আপুনি নিজা সমষ্টিৰ পৰা আঁতৰত থাকিলেও বাস কৰা স্থানৰ পৰাই কৰিব পাৰিব ভোটদান।
RVM কি?
নিৰ্বাচনী আয়োগে কমি অহা ভোটিং পাৰ্ছেণ্টেজৰ প্ৰতি লক্ষ্য ৰাখিয়েই লৈছে এই সিদ্ধান্ত। দূৰবৰ্তী ভোটদানৰ বাবে প্ৰটোটাইপ ৰিম’ট ইলেক্ট্ৰনিক ভোটিং মেচিন(RVM) নামৰ এবিধ যন্ত্ৰৰ সহায়ত এই ভোটদান প্ৰক্ৰিয়া সহজ কৰি তোলাৰ সিদ্ধান্ত লৈছে নিৰ্বাচনী আয়োগে৷ RVM-ৰ সহায়ত এটা ভোটকেন্দ্ৰৰ পৰা ৭২ টা বিভিন্ন সমষ্টিৰ ভোটাৰে ভোটদান কৰিব পাৰিব৷ ১৬ জানুৱাৰীত RVM-ৰ পৰীক্ষা সম্পন্ন হ’ব বুলি জনাইছে ভাৰতীয় নিৰ্বাচন আয়োগে৷
নিৰ্বাচন আয়োগে সকলো ৰাজনৈতিক দলৰ প্ৰতিনিধিকেই RVM পৰীক্ষাৰ সময়ত উপস্থিত থাকিবলৈ অনুৰোধ জনাইছে৷ নতুন বছৰতেই এই ভোটিং মেচিনৰ পৰীক্ষা সম্পন্ন হ’ব৷ ১৬ জানুৱাৰী ২০২৩ তাৰিখে নিৰ্বাচনী আয়োগে ৪ টা ৰাষ্ট্ৰীয় দল আৰু ৫৭ টা ৰাজ্যিক দলৰ উপস্থিতিত এই পৰীক্ষা সম্পন্ন কৰিব৷ নিৰ্বাচন আয়োগে ৰাজনৈতিক দলসমূহক ৩১ জানুৱাৰীৰ ভিতৰত এই ভোটদান ব্যৱস্থাৰ ওপৰত তেওঁলোকৰ মতামত দাঙি ধৰিবলৈকো আহ্বান জনাইছে৷ আয়োগৰ জাননী মতে, সকলো ৰাজনৈতিক দলৰ মতামতৰ ওপৰত ভিত্তি কৰিহে আগন্তুক নিৰ্বাচনসমূহত RVM ব্যৱহাৰ হ’ব নে নহয় তাৰ ওপৰত সিদ্ধান্ত লোৱা হ’ব৷
নতুন পদ্ধতিৰ জৰিয়তে কি লাভালাভ হ’ব?
যদি এই ভোটদান প্ৰণালী অৰ্থাৎ RVM-য়ে সকলো ৰাজনৈতিক দলেই মানি লয় তেন্তে প্ৰব্ৰজনকাৰী লোকসকলে কেৱল ভোট দিয়াৰ বাবে নিজা সমষ্টিলৈ যাব নালাগে৷ প্ৰায়, মানুহে অধ্যয়ন আৰু চাকৰিৰ বাবে আন চহৰলৈ প্ৰব্ৰজন কৰে আৰু নিৰ্বাচনৰ সময়ত তেওঁলোকে ঘৰত উপস্থিত হোৱাটো কঠিন হৈ পৰে। এনে পৰিস্থিতিত, বহুসংখ্যক ভোটাৰে ভোটদানৰ অধিকাৰৰ পৰা বঞ্চিত হৈ পৰে৷
উল্লেখ্য যে ২০১৯ৰ নিৰ্বাচনত বহুলোকেই ভোটদান কৰা নাছিল৷ আয়োগৰ মতে ২০১৯ চনত কেৱলমাত্ৰ ৬৭.৪ শতাংশ লোকেহে ভোটদান কৰিছিল৷ অৰ্থাৎ সমগ্ৰ দেশৰ ৩০ কোটিতকৈয়ো অধিক লোকে ভোটদান কৰা নাছিল৷ ভোটদান প্ৰক্ৰিয়াৰ জটিলতাৰ বাবেই এইসংখ্যক লোকে ইচ্ছা থাকিও ভোটদান কৰিব পৰা নাছিল৷ এই সমস্যাটো আগন্তুক নিৰ্বাচনসমূহত নহ’বৰ বাবে বিশেষ সিদ্ধান্ত লৈছে ভাৰতীয় নিৰ্বাচনী আয়োগে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
