পুত্ৰক কবৰ দিয়াৰ ১দিনৰ পাছতেই পুত্ৰৰ কবৰস্থানৰ কাষত কবৰ দিয়া হ’ল আতিকক! যোগী মন্ত্ৰীসভাৰ দুই মন্ত্ৰীয়ে কৈছে এয়া ঈশ্বৰৰ বিচাৰ, পাপ-পূণ্যৰ হিচাপ এই জনমতেই হয়’

অসম লাইভ২৪ঃ গাওঁৰ কবৰখানাত শনিবাৰে আতিকৰ পুত্ৰক কবৰ দিয়া হৈছিল। আৰু কালি বিয়লীৰ ভাগত আতিককো পুত্ৰৰ কবৰস্থানৰ কাষতেই কবৰ দিয়া হয় আতিক আৰু আশ্ৰাফক। কটকটীয়া নিৰাপত্তাৰ মাজতেই দুই গেংষ্টাৰৰ শেষকৃত্য সম্পন্ন হয়। দেওবাৰে আতিক আৰু আশ্ৰাফৰ দেহ পৰিয়ালক গতাই দিছিল আৰক্ষীয়ে। এম্বুলেঞ্চেৰে প্ৰয়াগৰাজৰ পৰা নিজ গাঁৱলৈ লৈ যোৱা হৈছিল দুই গেংষ্টাৰৰ মৃতদেহ। দুয়োৰে শেষকৃত বিশেষ কোনো লোকৰ উপস্থিতি দেখা নগ’ল যদিও কেইগৰাকীমান আত্মীয় স্বজন উপস্থিত থাকে এই শেষকৃত অনুষ্ঠানত।

শনিবাৰে নিশা উত্তৰপ্ৰদেশৰ প্ৰয়াগৰাজত অন কেমেৰা দুৰ্বৃত্তই হত্যা কৰিছিল গেংষ্টাৰ আতিক আৰু আশ্ৰফক। সমাজবাদী পাৰ্টীৰ প্ৰাক্তন সাংসদ আছিল আতিক আৰু আশ্ৰফ। হত্যা হ’ব বুলি পুৰ্বেই উমান পায় আতিকে গুজৰাট কাৰাগাৰৰ পৰা উত্তৰপ্ৰদেশলৈ আহিব খোজা নাছিল আতিক। কিন্তু শেষ প্ৰযন্ত সেই আশংকাই সত্য প্ৰমানিত হয়। বিগত ১৩ এপ্ৰিলত আৰক্ষীৰ এনকাউণ্টাৰত নিহত হৈছিল আতিকৰ পুত্ৰ আছাদ আৰু তেওঁৰ সহযোগী গোলাম। শনিবাৰে আছাদৰ শেষকৃত সম্পন্ন হৈছিল।

বিএছপিৰ বিধায়ক ৰাজু পালৰ হত্যাৰ একমাত্ৰ সাক্ষী উমেশ পালৰ হত্যাকাণ্ডৰ অভিযুক্ত আছিল আতিক আৰু আছৰফ। ইপিনে আছাদ আৰু গোলামৰ বিৰুদ্ধেও হত্যাকাণ্ডত উপস্থিত থকাৰ অভিযোগ আছিল। কিন্তু আৰক্ষীৰ কটকটীয়া নিৰাপত্তাবেষ্টনীত দুই অপৰাধীক এনেকৈ কাষৰ পৰা গুলীয়াই যোৱা ঘটনাক লৈ সৰৱ হৈ পৰিছে বিৰোধী। ঘটনা সংঘটিত হোৱাৰ নিশাই মুখ্যমন্ত্ৰী যোগীয়ে এই ঘটনাৰ তদন্তৰ নিৰ্দেশো দিছে। উত্তৰপ্ৰদেশৰ ৭৫ খন জিলাত ১৪৪ ধাৰা বৰ্তমানো অব্যাহত আছে। প্ৰয়াগৰাজত বৰ্তমানো ইণ্টাৰনেট সেৱা ব্যাহত হৈ আছে।

আতিক আৰু আশ্ৰফক গুলী কৰি হত্যা কৰাৰ পাছতেই ‘জয় শ্ৰী ৰাম’ ধ্বনি দিছিল তিনি দুৰ্বৃত্তই। তিনি দুৰ্বৃত্তক ইতিমধ্যে গ্ৰেপ্তাৰ কৰিছে আৰক্ষীয়ে। ধৃত তিনি দুৰ্বৃত্ত ক্ৰমে লৱলেশ তিৱাৰী, চানি আৰু মৌৰ্য। দেওবাৰে ধৃত তিনি হত্যাকাৰীক আদালতত হাজিৰ কৰোৱাৰ পাছতেই তিনিওকে ১৪ দিনৰ বাবে জে’ললৈ প্ৰেৰণ কৰাৰ নিৰ্দেশ দিছে আদালতে। আৰক্ষী সূত্ৰই জনোৱা অনুসৰি এই ঘটনাত এগৰাকী সাংবাদিকে আঘাত পোৱাৰ বিপৰীতে এজন আৰক্ষী কনিষ্টবলো গুৰুতৰভাৱে আঘাতপ্ৰাপ্ত হৈছে।

উল্লেখ্য যে নিহত আতিকৰ ওপৰত আছিল প্ৰায় ১০০ ৰো অধিক গোচৰ। ২০১৯ চনৰ পৰাই কাৰাগাৰত আছিল আতিক। প্ৰয়াগৰাজ চেণ্ট্ৰেল কাৰাগাৰৰ পৰা গুজৰাটৰ সাৱৰমতী কাৰাগাৰলৈ লৈ যোৱা হৈছিল আতিকক। কিন্তু শেহতীয়াভাৱে উমেশ পাল হত্যাৰ পাছতেই পুনৰ প্ৰয়াগৰাজলৈ লৈ অহা হৈছিল আতিকক। প্ৰয়াগৰাজলৈ অনাৰ সময়তে সাংবাদিকক আতিকে কৈছিল উত্তৰ প্ৰদেশ আৰক্ষীয়ে তেওঁক হত্যা কৰিব বিচাৰিছে। আতিকক দুৰ্বৃত্তই হত্যা কৰাৰ পাছতেই উত্তৰপ্ৰদেশৰ বিত্তমন্ত্ৰী তথা বিজেপি নেতা সুৰেশ খান্নাই আতিক হত্যাক ‘ঈশ্বৰৰ বিচাৰ বুলি আখ্যা দিছে। বিত্তমন্ত্ৰী সুৰেশ খান্নাই এই সন্দৰ্ভত প্ৰতিক্ৰিয়া দি কয়, ‘এয়া ঈশ্বৰৰ বিচাৰৰ সলনি আন একো নহয়।’ ইয়াৰ পাছতেই যোগী মন্ত্ৰীসভাৰ আন এজন মন্ত্ৰীয়ে কয়, ‘পাপ পূণ্যৰ হিচাপ এই জন্মতেই হয়।’

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ