নাৰীক স্বাৱলম্বী কৰাৰ বাবে সক্ৰিয়ৰূপত কাম কৰি আছে কেন্দ্ৰীয় চৰকাৰে৷ সেই লক্ষ্যৰেই ২০২৩ চনত মহিলাসকলৰ বাবে লাখপতি দিদি যোজনা আৰম্ভ কৰিছে মোদী চৰকাৰে৷ এই প্ৰকল্পৰ উদ্দেশ্য হৈছে শিল্পক্ষেত্ৰত মহিলাসকলক উৎসাহিত কৰিবলৈ আৰ্থিক সহযোগিতা প্ৰদান কৰা৷ এই প্ৰকল্পৰ আওতাত ৫লাখ টকা পৰ্যন্ত সুদ অবিহনেই ঋণ দিয়া হৈছে মহিলাসকলক৷
লাখপতি দিদি যোজনাৰ আওতাত মহিলাসকলক পাঁচ লাখ টকা পৰ্যন্ত সুদ অবিহনেই ঋণ দিয়া হৈছে৷ ইয়াৰ বাবে কিছু নিয়মো তৈয়াৰ কৰা হৈছে৷ এই প্ৰকল্পটো স্বনিৰ্ভৰ গোষ্ঠীৰ সৈতে যুক্ত মহিলাৰ বাবে পৰিচালিত৷ মহিলাসকলক কৰ্মসংস্থাপনত জোৰ দিবৰ বাবেই এই প্ৰকল্প অনা হৈছে৷
সুদ অবিহনেই পাঁচ লাখ টকা ঋণ
এই প্ৰকল্পৰ আওতাত কৰ্মদক্ষতা বঢ়াবলৈ মহিলাসকলক প্ৰশিক্ষণ দিয়া হয়৷ তাৰপাছতেই তেওঁলোকক নিজস্ব ব্যৱসায় আৰম্ভ কৰাৰ বাবে সুদ অবিহনে এক লাখৰ পৰা পাঁচ লাখ টকা ঋণ দিয়া হয়৷
কোনে কোনে লাভ কৰিব এই প্ৰকল্পৰ সুবিধা?
পৰিয়ালৰ কোনোৱে যদি চৰকাৰী চাকৰি কৰে তেতিয়া সেই পৰিয়ালৰ লোকে এই সুবিধা লাভ নকৰিব৷ পৰিয়ালত যদি কোনো এজনৰো চাকৰি নাথাকে তেতিয়াহে এই প্ৰকল্পৰ বাবে মহিলাগৰাকীয়ে আবেদন কৰিব পাৰিব৷ যিসমূহ পৰিয়ালৰ বাৰ্ষিক আয় তিনি লাখ টকা বা তাতকৈ কম সেই পৰিয়ালৰ মহিলাই লাখপতি দিদি যোজনাৰ সুবিধা পাবলৈ আবেদন কৰিব পাৰে৷
লাখপতি দিদি যোজনাত আবেদন কৰাৰ বাবে মহিলাসকলে স্ব-নিৰ্ভৰ গোষ্ঠীৰ অধীনত এটা ব্যৱসায়িক পৰিকল্পনা জমা দিব লাগিব৷ তেওঁলোকৰ ব্যৱসায়িক পৰিকল্পনা চৰকাৰৰ ওচৰত পঠিয়াব স্বনিৰ্ভৰ সংস্থাই৷ চৰকাৰী বিষয়াই পৰিকল্পনাটো পৰ্যালোচনা কৰিব৷ ইয়াৰপাছতে যদি আবেদন গৃহীত হয় তেতিয়া প্ৰকল্পৰ সুবিধা দিয়া হব আৰু ইয়াৰ অধীনত পাঁচ লাখ টকা পৰ্যন্ত ঋণো দিয়া হব৷
কি কি নথিৰ প্ৰয়োজন?
প্ৰকল্পৰ বাবে আধাৰ কাৰ্ড, পান কাৰ্ড, আয়ৰ তথ্য, বেংক পাছবুক, পাছপৰ্ট চাইজৰ ফটো, মোবাইল নম্বৰসহ নথিপত্ৰ দিব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
