মেঘালয়ত হানিমুন কাণ্ডত আহি প্ৰাণ হেৰুওৱা ৰাজা ৰঘুবংশীৰ মৃত্যুৰ তদন্তত মুকলি হৈছে এটাৰ পাছত আনটো ৰহস্য৷ ৰাজা ৰঘুবংশী আৰু সোনমৰ পৰিয়ালৰ ঘনিষ্ঠ সান্নিধ্যত আছিল হত্যাকাৰী অভিযুক্ত সোনমৰ প্ৰেমিক ৰাজা কুশৱাহা৷ আনকি সোনমৰ স্বামীৰ শেষকৃত্যতো উপস্থিত আছিল হত্যাৰ অভিযুক্ত৷ হত্যাৰক পাছতো নিজকে আঁতৰাই ৰখা নাছিল বৰং দুই পৰিয়ালৰ কাষে কাষেই আছিল হত্যাকাৰী বুলি প্ৰকাশ পাইছে তদন্তৰ ৰিপৰ্টত৷
মেঘালয়ত হানিমুন ট্ৰেভেলছৰ কাহিনী এতিয়া পৰিণত হৈছে হানিমুন হৰৰ কাহিনীলৈ৷ ফুৰিবলৈ গৈ প্ৰথমে দম্পতিৰ নিখোঁজ কাণ্ডৰ খবৰ ভাইৰেল হৈছিল৷ আৰক্ষীৰ সন্ধানত উদ্ধাৰ হৈছিল ৰাজা ৰঘুবংশীৰ ক্ষতবিক্ষত মৃতদেহ৷ তাৰপিছতেই মেঘালয়ৰ পৰা মধ্যপ্ৰদেশ পাইছিলগৈ কাহিনী৷ বিগত ১৭ দিনীয়া অভিযানৰ অন্তত আৰক্ষীৰ হাতত পৰিল আটাইকেইটা হত্যাকাৰী৷ আৰক্ষীয়ে প্ৰমাণ কৰি দিলে সোনম ৰঘুবংশী ভিক্টিম নহয় তেওঁ নিজেই হত্যাকাৰী ভিলেইন৷ প্ৰাথমিক তদন্তৰ ৰিপৰ্ট অনুসৰি প্ৰেমিকৰ সৈতে হাত মিলাই মেঘালয়ত হানিমুনলৈ গৈ স্বামী ৰাজা ৰঘুবংশীক হত্যাৰ ষড়যন্ত্ৰ কৰিছিল সোনমে৷ কামত লগোৱা হৈছিল ভাড়াতীয়া হত্যাকাৰীকো৷
দেওবাৰে সোনমৰ সন্ধান লাভৰ পাছতেই আৰক্ষীৰ জালত পৰিছে সোনমৰ প্ৰেমিক ৰাজ কুশৱাহাৰ পৰা আৰম্ভ কৰি অন্য হত্যাকাৰী কেইটাও৷ ৰাজা ৰঘুবংশীৰ হত্যাৰ অভিযোগত সোনমৰ গ্ৰেপ্তাৰ প্ৰথমে যেন মানি ল’ব পৰা নাছিল ৰাজাৰ পৰিয়ালে৷ বোৱাৰীয়েকে এনে কাণ্ড কৰিব সপোনতো ভাৱিব পৰা নাছিল ৰাজাৰ পৰিয়ালে৷ কিন্তু কাহিনী ইমানতেই শেষ নহয়, ইয়াৰ পাছতেই সোনমৰ পুৰণি প্ৰেমৰ খবৰো সন্মুখলৈ আহিছে৷ প্ৰেমিকৰ সৈতে হাতে হাত ধৰি এই কাণ্ডৰ পৰিকল্পনা ৰচিছিল সোনমে৷ এই খবৰ জানি আকৌ সৰগ ভাঙি পৰিছে ৰাজা ৰঘুবংশীৰ পৰিয়ালৰ লোকৰ মনত৷ ৰাজ কুশৱাহাৰ নাম আৰু ছবি দেখাৰ পাছতেই ৰাজা ৰঘুবংশীৰ মাতৃ আৰু ভনীয়েকে দাবী কৰিছে যে ৰাজাৰ শেষকৃত্যতো উপস্থিত আছিল ৰাজ কুশৱাহা৷
ভিডিঅ দেখুৱাই ৰাজাৰ ভনীয়েকে দাবী কৰিছে যে সোনমৰ পিতৃ দেবী সিঙৰ সৈতে শেষকৃত্যৰ দিনা তেওঁলোকৰ ঘৰলৈ আহিছিল ৰাজ কুশৱাহা৷ আনকি ৰাজাৰ মৃতদেহ দেখি শোকত ভাঙি পৰা সোনমৰ পিতৃকো সান্তনা দিছিল ৰাজ কুশৱাহাই৷ শেষকৃত্য অনুষ্ঠানলৈ অহা দুই পৰিয়ালৰ আত্মীয় আৰু প্ৰত্যক্ষদৰ্শীয়ে জনাইছে যে শেষকৃত্যৰ দিনা দিনজুৰি তাতেই আছিল সোনমৰ প্ৰেমিক ৰাজ কুশৱাহা৷ ৰাজাৰ শেষকৃত্যত যোগদানৰ বাবে অহা আত্মীয়স্বজনক লৈ সোনমৰ ঘৰৰ পৰা মুঠ ৪-৫খন বাহন আহিছিল৷ সেই বাহনসমূহৰ মাজত এখন বাহন চলাইছিল ৰাজ কুশৱাহাই৷
ইয়াৰ পূৰ্বে ৰাজা ৰঘুবংশীৰ ভাতৃ বিপুল ৰাজবংশীয়ে ৰাজৰ নাম শুনি জনাইছিল যে সি সোনমৰ পিতৃৰেই এজন কৰ্মচাৰী৷ ৰাজা ৰঘুবংশীৰ পত্নী সোনমৰ পাৰিবাৰিক চানমাইকা চিটছৰ ৱাৰহাউছত কাম কৰিছিল ৰাজ কুশৱাহাই৷ হত্যাৰ পাছতেই নিজক পলুৱাই নাৰাখি সোনমৰ পৰিয়ালৰ কাষে কাষে আছিল ৰাজ কুশৱাহা৷ কোনোৱে যাতে সন্দেহ নকৰে তাৰবাবেই এই সিদ্ধান্ত লৈছিল বুলিও সন্দেহ কৰিছে আৰক্ষীয়ে৷
ৰাজা ৰঘুবংশীৰ হত্যাত সোনমৰ সৈতে আৰক্ষীয়ে গ্ৰেপ্তাৰ কৰিছে প্ৰেমিক ৰাজ কুশৱাহাক৷ তদন্তকাৰীসকলৰ দাবী সোনমৰ স্বামীক হত্যাৰ বাবে ভাড়াতীয়া হত্যাকাৰীৰ ব্যৱস্থা কৰিছিল ৰাজ কুশৱাহাই৷ ইন্দোৰৰ ট্ৰান্সপৰ্ট ব্যৱসায়ী ৰাজা ৰঘুবংশীৰ সৈতে ১১ মেত সাতপাকত বান্ধ খাইছিল সোনম ৰঘুবংশী৷ ইয়াৰ পাছতেই ২০ মেত মেঘালয়লৈ হানিমুনলৈ যায় নৱদম্পতি৷ ২৩ তাৰিখৰ পৰা সন্ধানহীন হৈ আছিল ৰাজা আৰু সোনম৷ বিশেষ তদন্তকাৰী দলে দম্পতিৰ সন্ধানত অভিযান চলাই ২ জুনত ৱাইছাউডাং জলপ্ৰপাতৰ কাষৰ এটা খাদৰ পৰা উদ্ধাৰ কৰিছিল ৰাজাৰ ক্ষতবিক্ষত দেহ৷ ৪ জুনত মৰোণোত্তৰ পৰীক্ষাৰ পাছত ৰাজাৰ দেহ মেঘালয়ৰ পৰা ইন্দোৰলৈ পঠিওৱা হয়৷ তেতিয়ালৈ সন্ধান ওলোৱা নাছিল সোনমৰ৷ বিগত ১৭ দিন অভিযান চলাই অৱশেষত গাজিপুৰৰ পৰা নিজেই আত্মসমৰ্পণ কৰে সোনম ৰঘুবংশীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
