ভাৰতত সোণৰ প্ৰতি মানুহৰ আকৰ্ষণ যুগে যুগে চলি আহিছে। ধনী হওক বা দৰিদ্ৰ, সকলোৱে সোণক বিশেষ মূল্যৱান সম্পদ হিচাপে গণ্য কৰে। গহনা নিৰ্মাণৰ উপৰিও বহুতে ইয়াক বিনিয়োগৰ এক নিৰাপদ মাধ্যম হিচাপে গণ্য কৰে। বিশ্বৰ কেন্দ্ৰীয় বেংকসমূহেও অৰ্থনৈতিক স্থিৰতা বজাই ৰাখিবলৈ সোণৰ ভঁৰাল সংৰক্ষণ কৰে।
ভাৰতত সোণৰ নতুন ভঁৰালৰ সন্ধান
অন্ধ্ৰপ্ৰদেশত শেহতীয়াকৈ নতুন সোণৰ ভঁৰাল আৱিষ্কাৰ হোৱাত ৰাজ্যখনৰ লগতে সমগ্ৰ দেশজুৰি উৎসাহৰ সৃষ্টি হৈছে। ইতিমধ্যে খনন কাৰ্যও আৰম্ভ হৈছে। বিশেষজ্ঞসকলৰ মতে, এই অঞ্চলৰ আশে-পাশেও অধিক সোণৰ ভঁৰাল থকাৰ সম্ভাৱনাক উলাই কৰিব নোৱাৰি। এই খবৰটোৱে ভাৰতৰ সোণ উৎপাদন আৰু খনিজ সম্পদৰ ভৱিষ্যৎ সম্পৰ্কে নতুন আশাৰ সঞ্চাৰ কৰিছে। শেহতীয়াকৈ ৰাজ্যখনত নতুন সোণৰ ভঁৰাল আৱিষ্কাৰ হোৱাৰ খবৰে দেশৰ অৰ্থনীতিলৈ এক সম্ভাৱনাময় দিশ উন্মোচন কৰিছে।
কৰ্ণাটক: ভাৰতৰ সোণ উৎপাদনৰ শক্তিকেন্দ্ৰ
কৰ্ণাটকক ভাৰতৰ সৰ্ববৃহৎ সোণ উৎপাদক ৰাজ্য হিচাপে বিবেচনা কৰা হয়। দেশত উৎপাদিত মুঠ সোণৰ প্ৰায় ৯৯ শতাংশ কৰ্ণাটকৰ পৰাই আহে। কৰ্ণাটকৰ দুটা উল্লেখযোগ্য সোণৰ খনি হৈছে হট্টি সোণৰ খনি আৰু কোলাৰ সোণৰ খনি। হট্টি সোণৰ খনি ৰায়চুৰ জিলাত অৱস্থিত। হট্টি সোণৰ খনিখন ভাৰতৰ একমাত্ৰ সক্ৰিয় বাণিজ্যিক সোণৰ খনি। ১৯০২ চনৰ পৰা ইয়াত খনন চলি আহিছে। বৰ্তমান প্ৰতিবছৰে ইয়াৰ পৰা প্ৰায় ১.৫ৰ পৰা ২ টন সোণ উৎপাদন কৰা হয়। আনহাতে বিশ্বৰ আটাইতকৈ গভীৰ খনিসমূহৰ ভিতৰত অন্যতম কোলাৰ সোণৰ খনিত ১৮৮০ চনত বৃটিছ শাসনকালত বৃহৎ পৰিসৰত খনন আৰম্ভ হৈছিল। প্ৰায় ১২১ বছৰ ধৰি চলা খনন কাৰ্যৰ পিছত ২০০১ চনত সোণৰ ভঁৰাল হ্ৰাস আৰু অধিক ব্যয়ৰ বাবে ইয়াক বন্ধ কৰা হয়। ইয়াৰ পৰা মুঠ প্ৰায় ৮০০ টন সোণ আহৰণ কৰা হৈছিল।
অন্ধ্ৰ প্ৰদেশ: সোণ উৎপাদনৰ নতুন আশা
অন্ধ্ৰ প্ৰদেশ ইতিমধ্যে দেশৰ অন্যতম সোণ উৎপাদক ৰাজ্য হিচাপে বিবেচিত হৈছে। লগতে নতুন আৱিষ্কাৰৰ ফলত ৰাজ্যখনক লৈ অধিক আশাবাদী হৈছে চৰকাৰ আৰু বিশেষজ্ঞসকল। ৰাজ্যখনৰ কুৰ্নুল জিলাৰ জোন্নাগিৰিত প্ৰায় ৫০ টন সোণৰ ভঁৰাল থকাৰ অনুমান কৰা হৈছে। স্বাধীন ভাৰতৰ প্ৰথম ব্যক্তিগত সোণ খনি হিচাপে পৰিচিত এই প্ৰকল্পৰ লক্ষ্য হৈছে বছৰি প্ৰায় ১ টন সোণ উৎপাদন কৰা। আনহাতে ৰাজ্যখনৰ অনন্তপুৰ জিলাৰ ৰামগিৰি সোণৰ খনিত বহু বছৰ ধৰি খনন চলিছিল। যদিও বৰ্তমান এই খনিটোৰ কাৰ্যকলাপ কিছু মন্থৰ, তথাপি ইয়াত পুনৰ বৃহৎ পৰিসৰত উৎপাদনৰ সম্ভাৱনা আছে।
কুপ্পামত নতুন আৱিষ্কাৰ
ভাৰতীয় ভূতাত্ত্বিক জৰীপ সংস্থাই চিত্তূৰ জিলাৰ কুপ্পাম অঞ্চলত নতুন সোণৰ ব্লক চিনাক্ত কৰিছে। প্ৰাৰম্ভিক প্ৰতিবেদন অনুসৰি ইয়াত যথেষ্ট পৰিমাণৰ সোণ মজুত আছে।
বৰ্তমান অন্ধ্ৰ প্ৰদেশৰ সোণ উৎপাদন সীমিত যদিও নতুন খনি আৰু নিলাম প্ৰক্ৰিয়াৰ ফলত বছৰি প্ৰায় ০.৫ টন সোণ উৎপাদনৰ সম্ভাৱনা দেখা গৈছে। ভৱিষ্যতে এই পৰিমাণ অধিক বৃদ্ধি পাব পাৰে।
ভাৰতে বছৰি প্ৰায় ১.৬ৰ পৰা ২.২ টন সোণ উৎপাদন কৰে। চাহিদা হিচাপে উৎপাদন কম হোৱাৰ বাবে ভাৰতে ৯৮% আমদানিৰ ওপৰতে নিৰ্ভৰ কৰে। ভাৰতে বছৰি প্ৰায় ৮০০ৰ পৰা ৯০০ টন সোণ বিভিন্ন দেশৰ পৰা আমদানি কৰে। ভাৰতে আমদানি কৰা মুখ্য দেশসমূহৰ ভিতৰত ছুইজাৰলেণ্ড, ইউএই আৰু দক্ষিণ আফ্ৰিকাই প্ৰধান।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
