ৰুটিৰ বাবেই ভাঙিল এখন বিয়া, হতভম্ব পৰিয়ালৰ লোক
বিয়াৰ ভাঙি যোৱাৰ বহু কাৰণ শুনিবলৈ পোৱা যায়। শেহতীয়াকৈ উত্তৰ প্ৰদেশৰ চান্দৌলি জিলাৰ পৰা এনে এটা চাঞ্চল্যকৰ গোচৰ পোহৰলৈ আহিছে, যাৰ বিষয়ে জানি আপুনিও আচৰিত হ’ব। ঘটনা সন্দৰ্ভত জানিব পৰা অনুসৰি বিয়াৰ অনুষ্ঠানৰ সময়ত দৰাই ৰুটি অহাত পলম হোৱাৰ বাবেই ভাঙি দিয়ে বিয়া।
ৰাজ্যখনৰ চান্দাউলীৰ হামিদপুৰ গাঁৱত এজন দৰাৰ কাণ্ডই কইনা পক্ষক হতভম্ব কৰি তুলিছে। সকলোফালে এক সুখৰ পৰিৱেশ চলি আছিল। কইনা ঘৰত দৰা আহি উপস্থিত হৈছিল।
কিন্তু দৰা ঘৰৰ মানুহক আপ্যায়ন কৰাৰ সময়ত লাগি যায় অথন্তৰ। দৰা পক্ষক আহাৰ খোৱাৰ বাবে নিয়ে, কিন্তু দৰাই বিচৰা এখন ৰুটি আহি পোৱাত সামান্য পলম হয়। কাৰণ কাৰিকৰে গৰম গৰম ৰুটি ৰুটি বনোৱাত ব্যস্ত আছিল, যাতে দৰা পক্ষই গৰমে গৰমে ৰুটিৰ সোৱাদ লব পাৰে।
কিন্তু হিতে বিপৰীত হয়। ৰুটি পোৱাত পলম হোৱাৰ বাবেই দৰাজনে বিয়া কৰিবলৈ অস্বীকাৰ কৰে। দৰাৰ এই কাৰ্য্যই কইনাৰ হৃদয় ভাঙি পেলোৱাৰ লগতে কইনা পক্ষৰ সকলো মানুহৰে খং উঠাই।
কেৱল ৰুটি এখনৰ স্বাৰ্থত বিয়া কৰিবলৈ অস্বীকাৰ কৰা দৰাই পিছত লগে লগে আন ঠাইত কইনা বিচাৰি বিয়া পাতে, যি কাৰ্যত অধিক উত্তেজনা বৃদ্ধি কৰিছে কইনা পক্ষৰ।
কইনাৰ পৰিয়ালে দৰাৰ লগতে বিয়াৰ আলহীক পতিয়ন নিয়াবলৈ যৎপৰোনাস্তি চেষ্টা কৰি থাকে যদিও দৰাৰ অহংকাৰৰ সন্মুখত সকলো বিফল হয়। বৰ্তমানে ঘটনাৰ ন্যায় বিচাৰি কইনা পক্ষ আৰক্ষীৰ কাষো চাপে , কিন্তু আৰক্ষীয়ে কোনো নিৰ্দিষ্ট ব্যৱস্থা গ্ৰহণ নকৰাত ২৪ ডিচেম্বৰত চণ্ডাউলীৰ আৰক্ষী অধীক্ষকলৈ বিষয়টো যায়।
গোচৰ পঞ্জীয়ন কৰাৰ সময়ত কইনাৰ পৰিয়ালে আৰক্ষীক জনোৱা মতে, বিবাহত ডেৰ লাখ টকা যৌতুক হিচাপে দিয়া হৈছে। ইয়াৰ লগতে প্ৰস্তুতিৰ বাবে মুঠ ৭ লাখ টকা ব্যয় কৰা হৈছে। বৰ্তমান দৰা পৰিয়ালৰ ৫ জন সদস্যৰ বিৰুদ্ধে এফআইআৰ ৰুজু কৰিবলৈ দাবী জনাইছে কইনাৰ পৰিয়ালে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
