অসম লাইভ২৪ঃ গুজৰাট ট্ৰেজেডীৰ আজি তিনিটা দিন। মাচ্ছু নদীৰ ওপৰত সেইদিনা বিক্ৰী হৈছিল মৃত্যুৰ টিকট! এটা দুটা নহয় সেইদিনা মাচ্ছু নদীৰ বুকুত হেৰাই গ’ল শতাধিক লোক। কাৰ ভুলৰ বাবে প্ৰাণ দিলে এইসকল নিৰীহ লোকে? দেশজুৰি এতিয়া কেৱল মাচ্ছু নদীৰ সেই ট্ৰেজেডীৰেই চৰ্চা। প্ৰকৃততে কি ভুল ৰৈ গৈছিল এই দলঙত?
মৰ্বী ওলমা দলঙত আছিল পাঁচটা ভুল। এই ভুলৰ বাবে সংঘটিত হৈছে এই ঘটনা। কি আছিল এই মাৰাত্মক ভুল? প্ৰধানমন্ত্ৰীয়ে ইতিমধ্যে মৰ্বী ট্ৰেজেদীৰ তদন্তৰ নিৰ্দেশ দিছে।
মুকলিৰ পূৰ্বে পৰীক্ষা কৰা নাছিল
নিৰ্দিষ্ট সময়ৰ পূৰ্বেই মুকলি কৰা হৈছিল এই মৰ্বী দলং। ডিচেম্বৰ মাহত মুকলিৰ পৰিকল্পনা থকা দলংখন ২৬ অক্টোবৰত গুজৰাটী নৱবৰ্ষৰ লগত সংগতি ৰাখি মুকলি কৰা হৈছিল। মুকলিৰ পূৰ্বে পুংখানুপুংখভাৱে পৰীক্ষা–নিৰীক্ষা কৰা হোৱা নাছিল। মুকলিৰ পূৰ্বে ষ্ট্ৰাকচাৰেল অডিট কৰা হোৱা নাছিল। জৰুৰীকালীন প্ৰস্থান আৰু উদ্ধাৰৰ কোনো আঁচনি নাছিল। ওলমা দলঙখনৰ পুৰণি কেবল সলনি কৰা হোৱা নাছিল। মেৰামতিৰ কাম বিশেষজ্ঞ লোকৰ দ্বাৰা পৰ্যবেক্ষণ কৰা হোৱা নাছিল।
পুৰণি কেবলত ৰঙহে দিয়া হৈছিল
পুনঃনিৰ্মাণৰ সময়ত দলঙৰ মজিয়া চাৰিটা এলুমিনিয়ামৰ স্তৰেৰে পুনৰ নিৰ্মাণ কৰা হৈছিল যিয়ে দলংখনৰ ওজন বৃদ্ধি কৰিছিল। কিন্তু দলঙৰ কেবলবোৰ শক্তিশালী বা সলনি কৰা হোৱা নাছিল বৰঞ্চ নতুন ৰূপ দিবলৈ ৰং কৰা হৈছিল। ইয়াৰ অৰ্থ আছিল যে দলংখন আগৰ তুলনাত গধুৰ হৈ পৰিল আৰু কেবলবোৰে ইয়াৰ ভাৰসাম্য ৰক্ষাৰ বাবে অসমৰ্থ হৈছিল।
অৰেভা গ্ৰুপৰ কামকাজত গাফিলতিৰ সন্দেহ
অৰেভা গ্ৰুপে দীৰ্ঘদিন ধৰি দলংখন চোৱা–চিতা কৰিছিল। পিছে পুনঃনিৰ্মাণৰ কামটো দুটা উপ–ঠিকাদাৰী সংস্থাক অৰ্পণ কৰিছিল অৰেভা গ্ৰুপে। দুই উপ–ঠিকাদাৰী প্ৰতিষ্ঠানৰ যোগ্যতাৰ ওপৰতো উঠিছে প্ৰশ্ন। অৰেভা গ্ৰুপক কেনেকৈ কামটো উপ-ঠিকাদাৰী কৰিবলৈ দিয়া হ’ল? পুনঃনিৰ্মাণ কামৰ তত্বাৱধানৰ অভাৱ সন্দৰ্ভতো তদন্তৰ নিৰ্দেশ প্ৰধানমন্ত্ৰীৰ।
জনসাধাৰণৰ নিয়ন্ত্ৰণহীন প্ৰৱেশ
নতুন দলংখন নিৰ্মাণৰ খেলিমেলিৰ বাবে গধুৰ হৈছিল তাৰোপৰি জনসাধাৰণৰ প্ৰৱেশো নিয়ন্ত্ৰণহীন হৈ পৰিল। অত্যাধিক জনসাধাৰণৰ প্ৰৱেশো দলঙখন ভাগি পৰাৰ এটা কাৰণ। নিয়োগ কৰা নিৰাপত্তাৰক্ষীয়ে অত্যধিক লোকক প্ৰৱেশত বাধা নিদিয়াৰ বাবেই সংঘটিত হৈছে এই অনাকাংক্ষিত ঘটনা। ইতিমধ্যে দলঙত নিয়োজিত নিৰাপত্তাৰক্ষীকো গ্ৰেপ্তাৰ কৰিছে আৰক্ষীয়ে।
দলংখনত লাইফ জেকেট বা ৰেছকিউ নাৱৰ ব্যৱস্থা নাছিল
অৰেভা গ্ৰুপৰ দুৰ্ঘটনাৰ ক্ষেত্ৰত কোনো উদ্ধাৰ বা জৰুৰীকালীন পৰিকল্পনা নাছিল। উদাহৰণস্বৰূপে, দলংখনত লাইফ জেকেট বা ৰেছকিউ ষ্টাফ থকা নাৱৰ ব্যৱস্থা নাছিল। কোনো লোক দলঙখনৰ পৰা বাগৰি পৰিলেও উদ্ধাৰ কৰিবলগীয়া সামান্য প্ৰয়োজনীয়তাখিনিও নাছিল দলংখনত। ইয়াৰ বাবেই দলংখনৰ কেবল ছিঙি পৰাৰ ফলত মৃত্যু হ’ল ১৩৫ জনৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
