অসম লাইভ২৪ঃ তেওঁ বলীউডৰ ড্ৰিম গাৰ্ল। বিখ্যাত ছবি ‘শ্ব’লে’ৰ বসন্তী। কেৱল চিনেমাতেই নহয়, কেমেৰাৰ পিছফালে থাকি পৰিচালনাৰ দায়িত্ব লৈ নিজকে পৰিচালক হিচাপেও পৰিচয় দিছিল হেমামালিনীয়ে। তাৰপিছতেই ৰাজনীতি। ৰাজনীতিৰ পথাৰতো হেমা জিলিকি উঠিল। ১৯৪৮ চনৰ ১৬ অক্টোবৰত জন্মগ্ৰহণ কৰা হেমামালিনীৰ যাত্ৰা জানো মসৃণ আছিল? সহজ নাছিল হেমামালিনীৰ অভিনয় যাত্ৰা। তেওঁ এনে এগৰাকী অভিনেত্ৰী যিয়ে পুৰুষতান্ত্ৰিক বা নায়কশাসিত বলীউড ইণ্ডাষ্ট্ৰীত সেই সময়ত নিজৰ ঠাই বনাবলৈ সক্ষম হৈছিল। নায়কৰ সমান্তৰালকৈ হেমায়ো তেতিয়া বক্স অফিচৰ নামী-দামী অভিনেত্ৰীৰ তালিকাত। তিল তিলকৈ বলীউডত নিজকে গঢ়ি আছিল হেমাই। নাচ, অভিনয়, সংসাৰ এইসমূহ সামৰি থকাৰ মাজতেই ৰাজনীতিলৈ আহি, তেওঁ কেৱল অভিনেতাই নহয় এগৰাকী জননেতাও সেই কথা প্ৰমাণ কৰি দেখুৱাইছে।
অভিনয় কেৰিয়াৰ আৰম্ভণি কেনেকৈ হৈছিল?
তামিল ছবিৰে কেৰিয়াৰ আৰম্ভ কৰিছিল হেমামালিনীয়ে। বলীউডলৈ আহি এখনৰ পিছত এখন হিট ছবিত হেমা। বলীউডত তেওঁ প্ৰথমে নায়িকাৰ চৰিত্ৰত অভিনয় কৰিছিল ‘শ্ব’লে’ ত। তাৰপিছতেই আৰম্ভ হৈছিল লানি নিছিগা ছবিৰ কাম। সীতা ঔৰ গীতা, মিৰা, কিনাৰা, সন্ন্যাসী, মোহবুবা, ড্ৰীম গাৰ্ল, প্ৰেম নগৰ, খুছবু আদি ছবিয়েই প্ৰমাণ কৰে হেমামালিনীৰ অভিনয় প্ৰতিভাৰ কথা। খুব কম সময়তে তেওঁ বলীউডত হৈ পৰিল ড্ৰীম গাৰ্ল। সৰ্বমুঠ ১১ বাৰকৈ ফিল্ম ফেয়াৰ বঁটাৰ বাবে মনোনিত হৈছে হেমামালিনী। ২০০০ চনত হেমামালিনীয়ে লাভ কৰিছিল দেশৰ আগশাৰীৰ সন্মান পদ্মশ্ৰী।
সৰু চৰিত্ৰ ৰূপায়ন কৰিয়েই ষ্টাৰ হৈছিল হেমা!
কেৰিয়াৰৰ আৰম্ভণিতে তাৰকাসুলভ চেহেৰা নাই বুলি তামিল ছবিৰ পৰিচালকে ড্ৰীমগাৰ্লক তেতিয়া অভিনয়ৰ বাবে বাছনি কৰা নাছিল। হেমামালিনীক ৰিজেক্ট কৰা সেই চৰিত্ৰত তেতিয়া অভিনয় কৰিছিল জয়ললিতাই। ১৯৬৫ চনত ‘পাণ্ডৱ বনবাছাম’ ছবিত এটা সৰু চৰিত্ৰৰে বলীউডলৈ আহে হেমা। ১৯৬৮ চনত তেওঁ স্বপ্ন কা সদাগৰ ছবিৰে নায়িকাৰ ৰূপত ভুমুকি মাৰে। অৱশ্যে ছবিখনে বিশেষ জনপ্ৰিয়তা লাভ নকৰিলে।
সৰ্বাধিক উপাৰ্জনকাৰী অভিনেত্ৰী
তেতিয়া বলীউড কেৱল পুৰুষৰেই দপদপনি। এজনৰ পিছত এজন তাৰকা অভিনেতাৰ খবৰে সমগ্ৰতে লগাই তোলপাৰ। বাতৰি কাকতৰ বিনোদন পৃষ্ঠাত তেতিয়া কেৱল পুৰুষ অভিনেতাৰ নাম। এতিয়াৰ ভাষাত ব্ৰেকিং নিউজ হৈ হঠাতেই সকলোৰে দৃষ্টি কাঢ়িলে হেমামালিনীয়ে। বাতৰিৰ বিনোদন পৃষ্ঠাত হেমাৰেই ছবি। শীৰ্ষ ১০ উপাৰ্জনকাৰী শিল্পীৰ তালিকাত স্থান লাভ কৰিলে হেমামালিনীয়ে। সকলো নায়কক চেৰ পেলাই ১৯৭১ চনৰ পৰা ১৯৭৫ চনলৈ বলীউডৰ চতুৰ্থ সৰ্বাধিক উপাৰ্জনকাৰী নায়িকা হৈ পৰিল হেমামালিনী।
হেমামালিনীৰ পঢ়া-শুনা কিমান?
ৰূপালী পৰ্দাত যথেষ্ট নাম অৰ্জন কৰিলেও হেমামালিনী লেখা পঢ়াত বিশেষ আগৰণুৱা নাছিল। হেমামালিনীৰ স্কুলীয়া শিক্ষা আছিল মাত্ৰ দশম শ্ৰেণীলৈকেহে। দশম শ্ৰেণী পাছ কৰিয়েই বিদ্যালয় শিক্ষা সাং কৰে ড্ৰীমগাৰ্লে। সৰুৰে পৰাই তেওঁৰ কেৱল নায়িকা হোৱাৰহে সপোন। সেয়ে স্কুলীয়া শিক্ষাত মুঠেও মন নাছিল ড্ৰীমগাৰ্লৰ।
জীতেন্দ্ৰৰ সৈতে বিয়া ভাঙি যায় কিয়?
তেতিয়া জীতেন্দ্ৰ আৰু হেমা বলীউডৰ পৰিচিত মুখ। ভাল বংশৰ সন্তান আছিল জীতেন্দ্ৰ। পাত্ৰ হিচাপে জীতেন্দ্ৰক পছন্দ কৰিছিল হেমামালিনীৰ পিতৃ-মাতৃয়েও। জীতেন্দ্ৰৰ সৈতে বিয়াৰ সকলো যা-যোগাৰ আগবঢ়াই থকাৰ মাজতেই বিয়াৰ বাবে অস্বীকাৰ কৰে হেমাই। ঘৰৰ পৰা বহু চেষ্টা কৰিও হেমাক জীতেন্দ্ৰৰ সৈতে বিবাহৰ বাবে কোনোৱে মান্তি কৰাব নোৱাৰিলে। আকৌ ব্ৰেকিং নিউজ হ’ল হেমা-জীতেন্দ্ৰৰ বিচ্ছেদ। উৰাবাতৰি ওলাল ধৰ্মেন্দ্ৰৰ বাবেই জীতেন্দ্ৰক ৰিজেক্ট কৰিছে হেমাই। উৰাবাতৰিক সঁচা কৰি এদিন ড্ৰীৰ্মগাৰ্ল হেমাই ধৰ্মেন্দ্ৰৰ সৈতে বিবাহৰ বান্ধোনত বান্ধ খাই। ধৰ্মেন্দ্ৰৰ উপস্থিতিতেই সঞ্জীৱ কুমাৰৰ সৈতেও নাম সাঙোৰ খাইছিল হেমাৰ। কিন্তু এই বাতৰি মিছা বুলি ড্ৰীমগাৰ্লে তেওঁৰ আত্মজীৱনীত উল্লেখ কৰিছে।
ড্ৰীমগাৰ্লৰ সৌন্দৰ্যৰ আঁৰৰ ৰহস্য কি?
হেমামালিনীৰ সৌন্দৰ্যৰ আঁৰৰ ৰহস্যৰ বিষয়ে জানিবলৈ সকলোৱেই আগ্ৰহী। এক সাক্ষাৎকাৰত হেমামালিনীয়ে কৈছিল, ‘তেওঁৰ সৌন্দৰ্যৰ একমাত্ৰ ৰহস্যই হৈছে পানী। প্ৰচুৰ পানী খালেই সৌন্দৰ্য অটুত থাকে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
