ইজৰাইলত ৪৮ ঘণ্টাৰ ইমাৰজেঞ্চী, প্ৰাণৰ সংশয়ত বাংকাৰত বাস নেতান্যাহুৰ
লেবাননস্থিত হিজবুল্লাই ইজৰাইলৰ ওপৰত ৰকেট আক্ৰমণৰ ধাৰাবাহিকতা আৰম্ভ কৰিছে। ইয়াৰ সমান্তৰালকৈ হিজবুল্লাই বৃহৎ পৰিসৰৰ সামৰিক অভিযানৰ কথাও ঘোষণা কৰিছে। হিজবুল্লাহৰ এক বিবৃতিত কোৱা হৈছে যে ইজৰাইলৰ গুৰুত্বপূৰ্ণ সামৰিক ঘাটিক লক্ষ্য কৰি বিস্ফোৰক ভৰ্তি ড্ৰ’ন নিক্ষেপ কৰা হৈছে।
হিজবুল্লাই ইজৰাইলৰ ওপৰত ৩২০ টাতকৈও অধিক কাটিউছা ৰকেট নিক্ষেপ কৰা বুলি দাবী কৰিছে। ইজৰাইলৰ প্ৰতিৰক্ষা বাহিনীৰ মুখপাত্ৰ ডেনিয়েল হাগাৰীৰ উদ্ধৃতিৰে জেৰুজালেম পোষ্টে কয় যে হিজবুল্লাহৰ আক্ৰমণ সংঘটিত হৈছিল যেতিয়া ইজৰাইলে নিজৰ প্ৰতিৰক্ষাত লেবাননত থকা সন্ত্ৰাসবাদী ঘাটিসমূহক লক্ষ্য কৰি লৈছিল।
আনহাতে, বেইৰুটত ফুৱাদ শুক্ৰৰ হত্যাৰ প্ৰতিশোধ ল’বলৈ ইজৰাইলক আক্ৰমণ কৰা বুলি ঘোষণা কৰিছে হিজবুল্লাই। হিজবুল্লাই জাৰি কৰা এক বিবৃতিত কয় যে প্ৰথম পৰ্যায়ৰ আক্ৰমণ সম্পূৰ্ণ হৈছে। এই সময়ছোৱাত ইজৰাইলৰ বেৰেক আৰু প্ৰতিৰক্ষা প্ৰতিষ্ঠানসমূহক লক্ষ্য কৰি লোৱা হৈছে। ড্ৰ’নে নিজৰ লক্ষ্যৰ বাবে পৰিকল্পনা অনুসৰি কাম কৰি আছে।
উল্লেখ্য যে যোৱা মাহত বেইৰুটৰ উপনগৰ অঞ্চলত হোৱা আক্ৰমণত ইজৰাইলে ফুয়াদ শুক্ৰক হত্যা কৰিছিল। ফুৱাদ শুক্ৰ হিজবুল্লাহৰ শীৰ্ষ সেনাপতি আছিল। হিজবুল্লাই ১১টা সামৰিক স্থানক লক্ষ্য কৰি লোৱা বুলি প্ৰকাশ কৰিছে।
আনহাতে হিজবুল্লাহৰ আক্ৰমণৰ পিছত ইজৰাইলত আতংকৰ পৰিবেশ। হাই এলাৰ্ট ঘোষণা কৰা হৈছে। প্ৰাণৰ সংশয়ৰ বাবে ভূগৰ্ভস্থ বাংকাৰলৈ লৈ যোৱা হৈছে প্ৰধানমন্ত্ৰী বেঞ্জামিন নেতান্যাহুক। একে সময়তে বেন গুৰিয়েল আন্তঃৰাষ্ট্ৰীয় বিমানবন্দৰৰ কাম-কাজ বন্ধ কৰি দিয়া হৈছে। সমগ্ৰ ইজৰাইলত ৪৮ ঘণ্টীয়া জৰুৰীকালীন অৱস্থা ঘোষণা কৰা হৈছে। চাৰিওফালে বিশৃংখল পৰিৱেশ আৰু এম্বুলেন্সৰ বাজি থকা ছাইৰেনে ইজৰাইলত হিজবুল্লাহৰ আক্ৰমণৰ ফলত উদ্ভৱ হোৱা আতংকৰ প্ৰমাণ দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
