হাহাকাৰ, ইঞ্জিনিয়াৰিং কলেজৰ ছোৱালী হোষ্টেলৰ শৌচাগাৰত কেমেৰা, ৩০০ ৰো অধিক …ভাইৰেল
দেশজুৰি তোলপাৰ লগাইছে এক ঘটনাই। এইবাৰ এখন ইঞ্জিনিয়াৰিং কলেজৰ ছোৱালী হোষ্টেলৰ শৌচাগাৰত গোপন কেমেৰা। সেই কেমেৰাৰে তোলা ফটো আৰু ভিডিঅ’ ভাইৰেল হৈ পৰিছে । যাৰ বাবে এতিয়া হাহাকাৰময় পৰিস্থিতিৰ সৃষ্টি হৈছে।
এই চাঞ্চল্যকৰ ঘটনা অন্ধ্ৰ প্ৰদেশৰ কৃষ্ণ জিলাত অৱস্থিত গুডলাভেলেৰু অভিযান্ত্ৰিক মহাবিদ্যালয়ৰ। ইয়াত ছোৱালী হোষ্টেলৰ শৌচাগাৰ এটা লুকাই থকা কেমেৰা উদ্ধাৰ হৈছে। এই কেমেৰাৰে নিৰ্মিত কিছু ভিডিঅ’ আৰু ৩০০ৰো অধিক ফটো ছাত্ৰ-ছাত্ৰীৰ মাজত ভাইৰেল হোৱাৰ অভিযোগ উত্থাপন হোৱাৰ পিছত এতিয়া ছাত্ৰ-ছাত্ৰীসকলে প্ৰতিবাদ কৰিবলৈ আৰম্ভ কৰিছে।
গোপনে ৰখা কেমেৰাটোৰ বিষয়ে জানিবলৈ পোৱাৰ পিছত ছাত্ৰ-ছাত্ৰীসকলে ইয়াৰ সন্দৰ্ভত আৰক্ষীৰ ওচৰতো গোচৰ ৰুজু কৰিছে, তাৰ পিছত আৰক্ষীয়ে চূড়ান্ত বৰ্ষৰ এজন ছাত্ৰক আটক কৰি ৰাখিছে আৰু তেওঁক জেৰা অব্যাহত ৰাখিছে।
তথ্য অনুসৰি কলেজৰ হোষ্টেলৰ শৌচাগাৰৰ ভিতৰত ৰখা এই কেমেৰাটো এগৰাকী ছাত্ৰীয়ে উদ্ধাৰ কৰে। তাৰ পিছতে বৃহস্পতিবাৰ ২৯ আগষ্টৰ নিশা ছাত্ৰ-ছাত্ৰীসকলে প্ৰতিবাদ সাব্যস্ত কৰি কেম্পাছত ছাত্ৰীসকলৰ সুৰক্ষা আৰু গোপনীয়তাক লৈ গুৰুতৰ উদ্বেগ প্ৰকাশ কৰে।
ছাত্ৰীসকলৰ মতে, এই লুকুৱাই ৰখা কেমেৰাটোৰ পৰা ৩০০ৰো অধিক ফটো আৰু ভিডিঅ’ ৰেকৰ্ডিং ল’ৰাৰ হোষ্টেলত সম্প্ৰচাৰ কৰা বুলি অভিযোগ উঠিছে। প্ৰতিবাদৰ মাজতে এই বিষয়ে আৰক্ষীক অৱগত কৰা হয়।
এজাহাৰ লাভ কৰাৰ পিছতে আৰক্ষীয়ে আটক কৰে এজন চূড়ান্ত বৰ্ষৰ ছাত্ৰক। কোৱা হৈছে যে সেই ছাত্ৰ কেমেৰা স্থাপনৰ কামত জড়িত আছিল। বিষয়াসকলৰ মতে, ছাত্ৰজনৰ পৰিচয় এতিয়াও প্ৰকাশ কৰা হোৱা নাই আৰু অধিক তদন্ত অব্যাহত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
