পুনৰ কলিকতা সদৃশ ঘটনা, নাৰ্চিঙৰ ছাত্ৰীক হাস্পতালতে আৱদ্ধ কৰি ৰাখি…
সমগ্ৰ দেশ তোলপাৰ লগোৱা কলিকতা সদৃশ ঘটনা পুনৰ সংঘটিত হৈছে এইখন ভাৰততে। এইবাৰ উত্তৰ প্ৰদেশৰ কানপুৰত এই ঘটনা। এগৰাকী নাৰ্চিঙৰ ছাত্ৰীক হাস্পতালতে আৱদ্ধ কৰি ৰাখি দুষ্কৰ্ম। দেওবাৰে পুৱতিনিশা সংঘটিত হৈছে এই ধৰ্ষণৰ ঘটনা।
ৰাজ্যখনৰ কল্যাণপুৰত অৱস্থিত এখন ব্যক্তিগত চিকিৎসালয়ৰ অপাৰেটৰে নৈশ শ্বিফটত প্ৰশিক্ষণ লৈ থকা এগৰাকী নাৰ্চিং ছাত্ৰীক হাস্পতালতে আৱদ্ধ কৰি ৰাখি ধৰ্ষণ কৰে। প্ৰতিবাদ কৰিলে হত্যাৰো ভাবুকি দিয়ে ধৰ্ষণকাৰী অপাৰেটৰে।
কিন্তু সোমবাৰে পুৱা নাৰ্চিং ছাত্ৰীগৰাকীয়ে সাহস গোটাই থানাত উপস্থিত হৈ অপাৰেটৰৰ বিৰুদ্ধে এজাহাৰ দাখিল কৰে। তেতিয়াহে পোহৰলৈ আহে এই সমগ্ৰ ঘটনা। গভীৰ নিশা আৰক্ষীয়ে এই বিষয়ত এফআইআৰ ৰুজু কৰি অভিযুক্ত অপাৰেটৰক গ্ৰেপ্তাৰ কৰাৰ লগতে ছাত্ৰীগৰাকীকো চিকিৎসাৰ বাবে প্ৰেৰণ কৰে।
সচেন্দী থানা এলেকাৰ ২২ বছৰীয়া ছাত্ৰীগৰাকী নাৰ্চিং কলেজত জে এন এম দ্বিতীয় বৰ্ষত অধ্যয়ন কৰি আছে। বিগত কেইদিনমানৰ পৰা এখন ব্যক্তিগত চিকিৎসালয়ত প্ৰশিক্ষণ লৈ আছিল ছাত্ৰীগৰাকী। ছাত্ৰীগৰাকীয়ে কয় যে দেওবাৰে নিশা চিকিৎসালয়ত নাইট শ্বিফ্ট আছিল।
পুৱা প্ৰায় চাৰি মান বজাত যেতিয়া অলপ জিৰণী লোৱাৰ উদ্দেশ্যে হস্পিতালৰ ৰেষ্ট ৰুমত যায়। অভিযোগ অনুসৰি, সেই সময়তে শিৱৰাজপুৰৰ সক্ৰেজ নিবাসী চিকিৎসালয় অপাৰেটৰ ইমতিয়াজ ওৰফে ছিটু মনে মনে জিৰণি কক্ষত উপস্থিত হয়।
ইয়াৰ পিছতে ৰেষ্ট ৰুমৰ দুৱাৰখন বন্ধ কৰি তাইক নিৰ্যাতন চলায়। প্ৰতিবাদ কৰিলে হত্যা কৰাৰ ভাবুকি দি হাত বান্ধি মুখত কপাহ ভৰাই ধৰ্ষণ কৰে। সোমবাৰে পুৱা আন কৰ্মচাৰীয়ে চিকিৎসালয়ত উপস্থিত হোৱাৰ লগে লগে ছাত্ৰীগৰাকীয়ে তেওঁৰ সৈতে কাম কৰা আন কৰ্মচাৰীসকলক এই বিষয়ে অৱগত কৰে।
ইয়াৰ পিছত সোমবাৰে পুৱা ছাত্ৰীগৰাকী কল্যাণপুৰ আৰক্ষী থানাত উপস্থিত হৈ বিষয়টোৰ ওপৰত অভিযোগ কৰে। এই সন্দৰ্ভত এচিপি কল্যাণপুৰ অভিষেক কুমাৰ পাণ্ডেই কয় যে অভিযোগৰ ভিত্তিত এটা প্ৰতিবেদন পঞ্জীয়ন কৰি অভিযুক্ত অপাৰেটৰক গ্ৰেপ্তাৰ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
