এটা ৰাতিৰ ভিতৰতে দিখৌ নৈয়ে উজনিৰ শিৱসাগৰ আৰু চৰাইদেউ জিলাৰ লাখ লাখ পৰিয়াললৈ ঘোৰ অমানিশা কঢ়িয়াই আনিলে। লাখ লাখ পশুধনৰ মৃত্যু হ’ল যি অধিকাংশ চহা লোকৰ জীৱন নিৰ্বাহৰ অন্যতম আহিলা আছিল। হাজাৰ হাজাৰ হেক্টৰ কৃষিভূমি নষ্ট হ’ল যি চহা লোকৰ এমুঠি অন্নৰ ভৰসা আছিল। অকালতে প্ৰাণ হেৰুওৱা লোকৰ সংখ্যাই শতক স্পৰ্শ কৰাৰ দিশে, এতিয়াও সন্ধানহীন বহুজন, যি জীৱন্তে ঘূৰি আহিব বুলি আত্মীয়ো হয়তো এতিয়া আৰু আশা কৰা নাই। লগতে দিখৌৰ বলিয়া বানত গৃহহীন হ’ল হাজাৰ হাজাৰ পৰিয়াল। এই দুৰ্যোগৰ সময়তো সবাটোকৈ ভাল লগা কথা এইটোৱেই যে জাতি-ধৰ্ম-বৰ্ণ নিৰ্বিশেষে সকলো এক হৈ সহায়ৰ হাত আগবঢ়োৱা লোকৰ সংখ্যাও সীমাহীন। ইয়াৰ মাজতে বন্যাৰ্তৰ মাজলৈ খাদ্য-কাপোৰেৰে অকমান সহায়ৰ হাত আগবঢ়াবলৈ গৈ কণ্ঠশিল্পী দীপলিনা ডেকাই বন্যাৰ্তৰ দুৰ্দশা দেখি কান্দি উঠিছিল। তেতিয়াই কণ্ঠশিল্পীগৰাকীয়ে দুৰ্দশাগ্ৰস্ত ১০০টা পৰিয়ালক ঘৰ সাজি দিয়াৰ ক্ষেত্ৰত পদক্ষেপ ল’ব বুলি ঘোষণা কৰিছিল।
কণ্ঠশিল্পীগৰাকীৰ এই প্ৰশংসনীয় পদক্ষেপৰ প্ৰতি সঁহাৰি জনাই ঝাৰখণ্ডৰ এগৰাকী ইনফ্লুৱেন্সাৰ আৰিয়ান কেলভিনে আগবঢ়ালে ২১ লাখ টকাৰ আৰ্থিক সহায়। আৰিয়ানে নিজৰ ছ’চিয়েল মিডিয়া প্লেটফৰ্ম ব্যৱহাৰ কৰি সৰ্বসাধাৰণক সহায়ৰ বাবে আহ্বান জনায়। আৰিয়ানৰ এই আহ্বানত দেশ-বিদেশত থকা বহু অনুৰাগী আৰু শুভাকাংক্ষীয়ে সঁহাৰি জনায়, যাৰ ফলত অতি কম সময়ৰ ভিতৰতে প্ৰায় ২১ লাখ টকাৰ অনুদান সংগ্ৰহ কৰা সম্ভৱ হয়। সংগৃহীত সমগ্ৰ ধন দীপলীনা ডেকাৰ গৃহ নিৰ্মাণ অভিযানত হস্তান্তৰ কৰা হৈছে, যাতে অধিক সংখ্যক বন্যাৰ্ত পৰিয়ালে স্থায়ী আশ্ৰয় লাভ কৰিব পাৰে।
দীপলিনা ডেকাই আৰিয়ান কেলভিন আৰু তেওঁৰ জৰিয়তে অনুদান আগবঢ়োৱা সকলো দাঁতাক কৃতজ্ঞতা জ্ঞাপন কৰে।সমাজৰ বিভিন্ন স্তৰৰ মানুহে একেলগে আগবাঢ়ি আহিলেহে এনে বৃহৎ মানৱীয় অভিযান সফল হ’ব পাৰে। আৰিয়ান কেলভিনৰ এই সাহায্যৰ পূৰ্বেই ইতিমধ্যে ৬টা ঘৰ নিৰ্মাণ কৰিব পৰাকৈ দীপলিনা ডেকাৰ হাতত ধন আছে বুলি ছচিয়েল মিডিয়াত সদৰী কৰিছিল। কণ্ঠশিল্পীগৰাকীৰ এই মিছনৰ বাবে হয়তো আৰু প্ৰয়োজন অধিক ধনৰ। ছচিয়েল মিডিয়াৰ এক সূত্ৰ অনুসৰি ঝাৰখণ্ডৰ ইনফ্লুৱেঞ্চাৰ আৰিয়ান কেলভিনে সংগ্ৰহ কৰি দিয়া আৰ্থিক সাহায্যখিনিকে ধৰি এই প্ৰতিবেদন লিখা পৰলৈ দীপলিনা ডেকা ফাউণ্ডেশ্যনে সংগ্ৰহ কৰিছে প্ৰায় ৩৬ লাখ টকা। কণ্ঠশিল্পীগৰাকীৰ এই মহৎ উদ্দেশ্যৰ আপুনিও হ’ব পাৰে অংশীদাৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
