পক্ষাঘাত, কথা কোৱাত অসুবিধা, বা শৰীৰৰ কোনো এটা অংশত দুৰ্বলতা আদি লক্ষণবোৰ প্ৰায়ে ব্ৰেইন ষ্ট্ৰোকৰ লগত জড়িত হৈ থাকে। কিন্তু আপুনি জানেনে যে কেতিয়াবা কোনো স্পষ্ট লক্ষণ নোহোৱাকৈ ষ্ট্ৰোক হ’ব পাৰে? চিকিৎসা বিজ্ঞানৰ ফালৰ পৰা ইয়াক চাইলেণ্ট ষ্ট্ৰ’ক বা চাইলেণ্ট ব্ৰেইন ইনফাৰ্ক্ট বুলি কোৱা হয়। মূৰৰ বিষ বা অন্য কাৰণত কৰা এম আৰ আইত মগজুৰ ক্ষতিৰ লক্ষণ দেখা দিলে এই অৱস্থা ধৰা পৰে।
এই ধৰণৰ ষ্ট্ৰোকে তাৎক্ষণিকভাৱে পক্ষাঘাতৰ সৃষ্টি নকৰে যদিও ইয়াৰ ফলত ডিমেনচিয়া, স্মৃতিশক্তি হেৰুৱা, আৰু পিছৰ জীৱনত ডাঙৰ ষ্ট্ৰোক হোৱাৰ সম্ভাৱনা বৃদ্ধি পাব পাৰে। ডাঃ ঋতু ঝাৰ (সঞ্চালক আৰু এইচ অ’ ডি, স্নায়ু বিজ্ঞান, সৰ্বোদয় হাস্পতাল, ফৰিদাবাদ) ৰ মতে আমি Silent ষ্ট্ৰোকক অৱহেলা কৰা উচিত নহয়।
ইয়াৰ পৰা বুজা যায় যে মগজুৰ সৰু সৰু ৰক্তবাহী নলীবোৰ প্ৰভাৱিত হৈছে, যাৰ ফলত ভৱিষ্যতে গুৰুতৰ স্নায়ুজনিত সমস্যাৰ সম্ভাৱনা বৃদ্ধি পাইছে। Silent ষ্ট্ৰোক কি, ইয়াৰ লক্ষণ, আৰু ইয়াক প্ৰতিৰোধ কৰিবলৈ কি কৰিব জানি লওক।
চাইলেণ্ট ব্ৰেইন ইনফাৰ্কট কি?
বিশেষজ্ঞই কয় যে, যেতিয়া মগজুৰ সৰু অংশলৈ তেজৰ সোঁত সাময়িকভাৱে বন্ধ হৈ যায় তেতিয়া তাত থকা কোষবোৰৰ ক্ষতি হ’বলৈ আৰম্ভ কৰে। যদি এই ক্ষতি এনে ঠাইত হয় য’ত তাৎক্ষণিক লক্ষণ দেখা নাযায়, তেন্তে ৰোগীয়ে হয়তো গম নাপাবও পাৰে যে তেওঁলোকৰ ষ্ট্ৰোক হৈছে। এই ক্ষেত্ৰত নিৰৱ মগজুৰ ইনফাৰ্ক বুলি কোৱা হয়। যদিও ৰোগীয়ে স্বাভাৱিক অনুভৱ কৰিব পাৰে, তথাপিও সময়ৰ লগে লগে এনে একাধিক সৰু সৰু ষ্ট্ৰোকে মগজুৰ কাৰ্যকলাপত প্ৰভাৱ পেলাব পাৰে।
কোনবোৰ মানুহৰ বিপদ বেছি?
বিশেষজ্ঞসকলে কয় যে উচ্চ ৰক্তচাপ ৰোগী, ডায়েবেটিছ, উচ্চ কলেষ্টেৰল, ধূমপান বা ধঁপাত সেৱন, মেদবহুলতা, হৃদৰোগ বা অনিয়মিত হৃদস্পন্দন (Atrial Fibrillation), জেনেটিক আৰু ৬০ বছৰৰ ওপৰৰ লোকৰ চাইলেণ্ট ষ্ট্ৰোক হোৱাৰ সম্ভাৱনা বেছি।
এম আৰ আইত কেনেকৈ ধৰা পৰে?
সাধাৰণতে এম আৰ আইৰ দ্বাৰা চাইলেণ্ট ব্ৰেইন ইনফাৰ্কট ধৰা পৰে। কেতিয়াবা ৰোগীয়ে মূৰৰ বিষ, মূৰ ঘূৰোৱা বা অন্যান্য কাৰণত এই পৰীক্ষা কৰে আৰু তেওঁলোকে পূৰ্বৰ, সৰু সৰু ষ্ট্ৰোকৰ ৰেকৰ্ডৰ পৰা গম পায়। এই পৰীক্ষাৰ দ্বাৰা মগজুৰ সেই অংশও উন্মোচিত হ’ব পাৰে য’ত পূৰ্বতে তেজৰ সোঁতত ব্যাঘাত জন্মিছিল।
ইয়াৰ ফলত ডিমেনচিয়াৰ সম্ভাৱনা বৃদ্ধি পায়নে?
সময়ৰ লগে লগে যদি একাধিক চাইলেণ্ট ষ্ট্ৰ’ক হয়, তেন্তে মগজুৰ কোষবোৰৰ অবিৰত ক্ষতি হয়। ইয়াৰ ফলত ভেছকুলাৰ ডিমেনচিয়াৰ সম্ভাৱনা বৃদ্ধি পাব পাৰে। এই কাৰণেই চাইলেণ্ট ষ্ট্ৰোক চিনাক্ত হোৱাৰ পিছত বিপদজনক কাৰকসমূহ নিয়ন্ত্ৰণ কৰাটো অত্যন্ত গুৰুত্বপূৰ্ণ।
তেওঁৰ মতে, সময়ত আৰু উপযুক্ত চিকিৎসাৰ দ্বাৰা বিপদজনক কাৰকসমূহ নিয়ন্ত্ৰণ কৰিলে ভৱিষ্যতে গুৰুতৰ ষ্ট্ৰোক আৰু স্মৃতিশক্তিৰ সমস্যাৰ আশংকা বহু পৰিমাণে হ্ৰাস কৰিব পৰা যাব।
কেনেকৈ প্ৰতিৰোধ কৰিব পাৰি?
বিশেষজ্ঞসকলৰ মতে চাইলেণ্ট ষ্ট্ৰোক প্ৰতিৰোধৰ বাবে ৰক্তচাপ, ৰক্তশৰ্কৰা, কলেষ্টেৰল নিয়ন্ত্ৰণত ৰাখিব লাগে। ধূমপান আৰু ধঁপাত পৰিহাৰ কৰক, নিয়মিতভাৱে ব্যায়াম কৰক, সুষম খাদ্য গ্ৰহণ কৰক, পৰ্যাপ্ত টোপনি লওক, চিকিৎসকৰ নিৰ্দেশনা অনুসৰি নিয়মিতভাৱে ঔষধ গ্ৰহণ কৰক। ষ্ট্ৰোকৰ অধিক আশংকা থকা লোকসকলে নিয়মীয়াকৈ স্বাস্থ্য পৰীক্ষা কৰা উচিত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
