মাহিলী মাত্ৰ ৫০০ টকা বিনিয়োগেৰে কেনেকৈ লাভ কৰিব প্ৰায় ৫০ লাখ টকা?

বৰ্তমান সময়ত সৰু সৰু সঞ্চয়ৰ জৰিয়তে ভৱিষ্যতৰ বাবে বৃহৎ পুঁজি জমা কৰাৰ জনপ্ৰিয় আৰু ফলপ্ৰসূ মাধ্যম হৈছে মিউচুৱেল ফাণ্ডত SIP (Systematic Investment Plan)। নিয়মীয়াকৈ অতি কম পৰিমাণৰ ধন বিনিয়োগ কৰিও বৃহৎ দীৰ্ঘম্যাদী জমাধন আহৰণ কৰা সম্ভৱ। যদি কোনোবাই প্ৰতিমাহে মাত্ৰ ৫০০টকাকৈ SIP কৰে আৰু গড়ে বাৰ্ষিক ১২% হাৰত লাভ পায়, তেন্তে ৪০ বছৰৰ পিছত এই সৰু বিনিয়োগেই প্ৰায় ৫০ লাখ টকালৈ বৃদ্ধি পাব পাৰে। ইয়াৰ মূল শক্তি হৈছে চক্ৰবৃদ্ধি সুদ।

৫০০টকাৰ SIP কেনেকৈ প্ৰায় ৫০ লাখ টকালৈ বৃদ্ধি কৰিব পাৰি?

৫০০ টকা SIP কৰি কেনেকৈ প্ৰায় ৫০ লাখ টকা আপুনি আহৰণ কৰিব পাৰিব সেয়া অতি সহজ ভাষাত বুজাবলৈ হ’লে-প্ৰতিমাহে ৫০০ টকা বিনিয়োগ কৰিলে আপোনাৰ বছৰেকীয়া বিনিয়োগ হ’বগৈ ৬,০০০ টকা। এনেকৈ মহিলী ৫০০টকাকৈ যদি আপুনি ৪০ বছৰলৈ বিনিয়োগ কৰে তেতিয়া ৪০ বছৰত আপোনাৰ মুঠ বিনিয়োগ হ’বগৈ ২ লাখ ৪০ হাজাৰ টকা। অৰ্থাৎ আপুনি মাত্ৰ ২ লাখ ৪০ হাজাৰ টকা বিনিয়োগ কৰিব। কিন্তু যদি এই ২ লাখ ৪০ হাজাৰ টকাৰ ওপৰত গড়ে ১২% বাৰ্ষিক ৰিটাৰ্ণ লাভ হয়, তেন্তে চক্ৰবৃদ্ধি সুদৰ ফলত মুঠ জমা প্ৰায় ৪৮.৯৬ লাখ টকা হ’বগৈ। আৰম্ভণিৰ কেইবছৰমান লাভৰ গতি তুলনামূলকভাৱে ধীৰ হ’ব পাৰে, কিন্তু সময় বাঢ়ি যোৱাৰ লগে লগে লাভৰ ওপৰত পুনৰ লাভ যোগ হৈ জমা ধনৰ বৃদ্ধি দ্ৰুতগতিত হয়। বিশেষকৈ শেষৰ বছৰবোৰত জমা ধনত আটাইতকৈ বেছি বৃদ্ধি দেখা যায়।

চক্ৰবৃদ্ধি সুদ কিয় ইমান শক্তিশালী?

চক্ৰবৃদ্ধি সুদ হৈছে এনে এক পদ্ধতি, য’ত কেৱল মূলধনৰ ওপৰতেই নহয়, পূৰ্বে লাভ কৰা সুদৰ ওপৰতো পুনৰ লাভ গণনা কৰা হয়। ফলত সময় যিমান দীঘলীয়া হয়, বিনিয়োগো সিমান দ্ৰুত হাৰত বৃদ্ধি পায়। অৱশ্যে মনত ৰাখিব লাগিব যে ৫০ লাখ টকাৰ লক্ষ্য অতি কম সময়ত পূৰণ নহয়। যদি মাত্ৰ ২০–২৫ বছৰলৈ SIP চলোৱা হয়, তেন্তে জমা ধনৰ পৰিমাণ যথেষ্ট কম থাকিব। সেয়েহে এই লক্ষ্য পূৰণ কৰিবলৈ ৩৫–৪০ বছৰ ধৰি নিয়মীয়াকৈ বিনিয়োগ অব্যাহত ৰখাটো অতি প্ৰয়োজনীয়।

সোনকালে বিনিয়োগ আৰম্ভ কৰাৰ লাভ

যদি কোনো এজন ব্যক্তিয়ে ২০–২৫ বছৰ বয়সতেই SIP আৰম্ভ কৰে, তেন্তে কম ধন বিনিয়োগ কৰিও বেছি জমা ধনৰ লাভ ল’ব পাৰি লগতে মাহিলী বিনিয়োগৰ বোজা কম থাকে। অৱসৰকাল, সন্তানৰ শিক্ষা, ঘৰ ক্ৰয় আদি দীঘলীয়া লক্ষ্য সহজে পূৰণ কৰিব পাৰি।

Step-Up SIP-এ লক্ষ্য সোনকালে পূৰণ কৰাত সহায় কৰে

যিসকলে কম সময়ৰ ভিতৰতে অধিক জমা ধনৰ লাভ ল’ব বিচাৰে, তেওঁলোকে Step-Up SIP বাছি ল’ব পাৰে। এই ব্যৱস্থাত প্ৰতিবছৰে SIPৰ পৰিমাণ অলপ অলপকৈ বৃদ্ধি কৰা হয়। ফলত বিনিয়োগৰ গতি বাঢ়ে আৰু লক্ষ্যত তুলনামূলকভাৱে সোনকালে উপনীত হ’ব পৰা যায়। মাত্ৰ ৫০০টকাকৈ মাহিলী SIPৰে প্ৰায় ৫০ লাখ টকাৰ জমা ধনৰ লাভ লোৱাটো সম্ভৱ, কিন্তু ইয়াৰ বাবে ধৈৰ্য, নিয়মানুৱৰ্তিতা আৰু দীৰ্ঘম্যাদী বিনিয়োগ অতি প্ৰয়োজন। SIP কোনো দ্ৰুত ধনী হোৱাৰ উপায় নহয়; বৰঞ্চ ই হৈছে সময়ৰ লগে লগে নিৰাপদ আৰু শৃংখলাবদ্ধভাৱে সম্পদ গঢ়ি তোলাৰ এক বিশ্বাসযোগ্য মাধ্যম।
SIP সন্দৰ্ভত মন কৰিবলগীয়া কথাটো হৈছে – মিউচুৱেল ফাণ্ডত বিনিয়োগ বজাৰৰ উঠা-নমাৰ সৈতে জড়িত। বিনিয়োগ কৰাৰ পূৰ্বে নিজৰ আৰ্থিক লক্ষ্য আৰু লোকচানৰ বহন ক্ষমতা বিবেচনা কৰি এজন যোগ্য বিত্তীয় পৰামৰ্শদাতাৰ পৰামৰ্শ লোৱাটো উচিত।
বিভিন্ন তথ্যৰ সহায়ত এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ