মেট্ৰিকত ভাল ফলাফল লাভ নকৰিলেই বুলি কেতিয়াও নিৰাশ নহ’ব। কিয়নো এটা পৰীক্ষাৰ ফলাফলে কেৰিয়াৰৰ সকলো দুৱাৰ কেতিয়াও বন্ধ নকৰে
আজি ক’বলৈ বিচাৰিছো এজন IAS বিষয়া তুষাৰ ছুমেৰাৰ বিষয়ে, যিগৰাকী বিষয়াই মেট্ৰিকত ইংৰাজীত লাভ কৰিছিল ৩৫ নম্বৰ, গণিতত ৩৬ আৰু বিজ্ঞানত লাভ কৰিছিল ৩৮ নম্বৰ। তাৰ পাছতো UPSCত সফলতা।
এতিয়া কালেক্টৰ আৰু জিলা দণ্ডাধীশৰূপে কৰ্মৰত। IAS বিষয়া অৱনীশ শৰণে তেওঁৰ টুইটাৰ হেণ্ডলত তুষাৰ ছুমেৰাৰ মেট্ৰিকৰ মাৰ্কশ্বীট শ্বেয়াৰ কৰি লিখিছে যে তেওঁ মেট্ৰিকত কেৱল উত্তীৰ্ণৰ নম্বৰহে পাইছে।
তুষাৰ ছুমেৰাই ১০০ৰ ভিতৰত ইংৰাজীত ৩৫ নম্বৰ, গণিতত ৩৬ আৰু বিজ্ঞানত ৩৮ নম্বৰহে লাভ কৰিছিল। IAS বিষয়া অৱনীশ শৰণে আৰু লিখে যে তুষাৰ ছুমেৰৰ ৰিজাল্ট দেখি তেওঁৰ গাঁৱতে নহয় স্কুলতো কৈছিল যে তেওঁ একো কৰিব নোৱাৰে।
কিন্তু তুষাৰ ছুমেৰাই কঠোৰ পৰিশ্ৰম আৰু অধ্যৱসায়ৰ দ্বাৰা এনে সাফল্য অৰ্জন কৰিলে যে সমালোচকসকলৰ মুখ বন্ধ হৈ পৰিছিল।
মেট্ৰিক পাছৰ পাছতে তেওঁ কলা বিভাগত উচ্চতৰ মাধ্যমিক উত্তীৰ্ণ হৈছিল। তাৰ পাছত স্নাতক ডিগ্ৰী লাভ কৰে আৰু তেওঁ এটা শিক্ষকৰ চাকৰি লাভ কৰে।
ইয়াৰ মাজতে তেওঁ কালেক্টৰ হ’ব মন কৰে আৰু UPSCৰ পৰীক্ষাৰ বাবে প্ৰস্তুতি আৰম্ভ কৰে। আৰু ২০১২ চনত তুষাৰে UPSCত সফলতা লাভ কৰে।
তুষাৰ ছুমেৰা বৰ্তমান গুজৰাটৰ ভাৰুচ জিলাত কালেক্টৰ আৰু জিলা দণ্ডাধীশৰূপে কৰ্মৰত। ভাৰুচত উৎকৰ্ষ পহল অভিযানৰ অধীনত কৰা কামৰ বিষয়ে প্ৰধানমন্ত্ৰী নৰেন্দ্ৰ মোদীয়ে ইতিমধ্যে টুইটাৰত তুষাৰ ছুমেৰাক প্ৰশংসা কৰিছে।
ভালকৈ লক্ষ্য কৰিলে হয়তো তুষাৰ ছুমেৰাৰ দৰে অসংখ্য সফল লোক ওলাব, যিয়ে মেট্ৰিকত ভাল ফলাফল লাভ কৰা নাছিল।
গতিকে মেট্ৰিকত ভাল ফলাফল কৰিব নোৱৰাসকলে নিৰাশ নহ’ব। কিয়নো আপোনাৰ আৱেগ থাকিলে একো অসম্ভৱ নহয়।
কঠোৰ পৰিশ্ৰম তথা অধ্যৱসায়ৰ জৰিয়তে হয়তো আপুনিও এজন সফল ব্যক্তি হিচাপে উজলি উঠিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
