ফাষ্টটেগ ব্যৱহাৰকাৰীৰ বাবে ডাঙৰ খবৰ৷ জাতীয় আৰু ৰাজ্যিক হাইৱেৰে যোৱাৰ সময়ত টোল প্লাজাৰ টোল টেক্সেৰে অপ্ৰয়োজনীয় বিলম্বৰ সন্মুখীন নোহোৱাৰ বাবে চৰকাৰে আৰম্ভ কৰিছিল ফাষ্টটেগৰ৷ ইয়াৰ আওঁতাত টোল গেটত কেইবা ছেকেণ্ডৰ ভিতৰতেই ফাষ্টটেগৰ পৰা আপোনাৰ বাহনৰ টেক্স কাটি লোৱা হয়৷ ঘনে ঘনে টোল টেক্স কাটি লোৱা আৰু ৰিচাৰ্জ কৰাও মানুহৰ সমস্যা বুলি বহুতেই অভিযোগ কৰি আহিছে৷ এই সমস্যাৰ পৰা সেয়ে মুক্তি দিয়াৰ বাবে চৰকাৰে ফাষ্টটেগৰ বাৰ্ষিক পাছ আৰম্ভ কৰিছে৷
১৫ আগষ্টৰ পৰা দেশত ফাষ্টটেগৰ বাৰ্ষিক পাছৰ নিয়ম কাৰ্যকৰ কৰা হৈছে৷ ইয়াৰ আওঁতাত মাত্ৰ ৩০০০ টকা ৰিচাৰ্জ কৰিলে আপুনি সমগ্ৰ বছৰত ২০০ টা ট্ৰিপ কৰিব পাৰে৷ ফাষ্টটেগৰ বাৰ্ষিক পাছক লৈ অৱশ্যে এতিয়াও বহুজন বিভ্ৰান্ত হৈ আছে৷ এবছৰত ২০০ টা ট্ৰিপ সম্পন্ন নহ’লে বাকী টকা কি পাছৰ বছৰত সেই ধন যোগ কৰা হবনে সেই বিষয়ক লৈয়ো বিভ্ৰান্তি আছে৷
ফাষ্টটেগ কি আৰু কেনেকৈ ব্যৱহাৰ কৰা হয়?
ফাষ্টটেগ হৈছে এক ইলেক্ট্ৰনিক ষ্টিকাৰ৷ ইয়াত এক ৰেডিঅ ফ্ৰিকোয়েন্সি আইডেণ্টিফিকেছন চিপ থাকে৷ ইয়াক বাহনৰ উইণ্ডস্ক্ৰিণত লগোৱা থাকে৷ ফাষ্টটেগ, বাহনৰ মালিকৰ বেংক একাউণ্টৰ সৈতে সংযুক্ত থাকে৷ আপুনি বিচাৰিলে ফাষ্টটেগ ৱালেটতো ধন ৰাখিব পাৰে৷ ফাষ্টটেগৰ সহায়ত টোল প্লাজাত নৰখোৱাকৈয়ে টোল টেক্স পৰিশোধ কৰা হয়৷
আপুনি কেনেকৈ ট্ৰিপ গণনা কৰিব?
এটা পয়েণ্ট ভিত্তিক ফি প্লাজাত প্ৰতিটো টোল ক্ৰছিংক এটা ট্ৰিপ হিচাপে গণনা কৰা হব৷ আপুনি যদি এটা ৰাউণ্ড ট্ৰিপ বুক কৰে তেতিয়া ইয়াত দুটা ট্ৰিপ হিচাপে গণনা কৰা হব৷ এটা বন্ধ টোলিং ফি প্লাজাত প্ৰৱেশ আৰু প্ৰস্থানক এক ট্ৰিপ হিচাপে বিবেচনা কৰা হব৷
যদি ২০০ ট্ৰিপ বছৰৰ পূৰ্বেই শেষ হয় তেতিয়া কি কৰিব?
যদি আপুনি ১৫ আগষ্ট ২০২৫ তাৰিখে এটা ফাষ্টটেগ বাৰ্ষিক পাছ কৰা থাকে তেতিয়া এয়া ১৪ আগষ্ট ২০২৬ পৰ্যন্ত বৈধ থাকিব৷ ইয়াত আপুনি ২০০ টা ট্ৰিপৰ সীমা পাব৷ যদি তিনি বা ছয় মাহৰ মাজত ২০০ টা ট্ৰিপ সম্পন্ন হয় তেতিয়া একেই বাহনৰ নম্বৰত আকৌ নতুন পাছ পাব পাৰে৷ ইয়াৰ বাবে আপুনি আকৌ ৩ হাজাৰ টকা খৰচ কৰিব লাগিব৷ কোনো এডজাষ্টমেণ্ট আপুনি নাপায়৷
যদি এবছৰত ২০০ টা ট্ৰিপ সম্পন্ন নহয়, তেতিয়া টকা ঘূৰাই পাবনে?
বহুতৰে যুক্তি, যদি এবছৰত ২০০ টা ট্ৰিপ সম্পন্ন নহয় তেতিয়া বাকী ট্ৰিপ আৰু টকা পাছৰ বছৰ এডজাষ্ট কৰা উচিত৷ কিন্তু চৰকাৰে এতিয়াও তেনে কোনো নিয়ম আৰম্ভ কৰা নাই৷ এই বাৰ্ষিক পাছ কেৱল এবছৰৰ বাবে বৈধ৷ যদি আপোনাৰ পাছৰ ম্যাদ ১৪ আগষ্ট ২০২৬ তাৰিখে শেষ হয় আৰু তেতিয়ালৈকে আপুনি ২০০ টা ট্ৰিপ সম্পন্ন নকৰে তেতিয়া আৰু ট্ৰিপসমূহ স্বয়ংক্ৰিয়ভাৱে বাতিল হৈ যাব৷ পাছৰ বছৰ আপুনি আকৌ নতুন পাছ ল’ব লাগিব৷
এই বাৰ্ষিক পাছে প্ৰতিটো টোল প্লাজাত কাম কৰিবনে?
ফাষ্টটেগৰ বাৰ্ষিক পাছ বৰ্তমান সমগ্ৰ দেশৰ জাতীয় হাইৱেৰ টোল প্লাজাত কাৰ্যকৰ৷ অৰ্থাৎ আপুনি যদি দিল্লীৰ পৰা মুম্বাই বা চেন্নাই, বাংগালুৰু যায় তেতিয়া এই পাছ কাৰ্যকৰ হব৷ অৱশ্যে ৰাজ্যিক হাইৱে আৰু স্থানীয় টোলৰ বাবে এতিয়াও আৰম্ভ হোৱা নাই বাৰ্ষিক টোল টেক্স৷ অৰ্থাৎ ই মীৰাট এক্সপ্ৰেছৱে বা যমুনা এক্সপ্ৰেছৱেৰ বাবেও নহয়৷
নতুন টোল পাছ কি সকলো ধৰণৰ যানবাহনৰ বাবে?
বৰ্তমান বাৰ্ষিক পাছ ব্যক্তিগত বাহন, জিপ আৰু ভেনৰ দৰে অব্যাণিজ্যিক যানবাহনৰ বাবে বৈধ হব৷ টেক্সি, কেব, বাছ আৰু ট্ৰাকৰ দৰে বাণিজ্যিক যানবাহনৰ বাবে ই বৈধ নহ’ব৷ বিদ্যমান ব্যৱস্থাৰ অধীনত এই যানবাহনসমূহৰ টোল কটা হব৷
ফাষ্টটেগ বাৰ্ষিক পাছৰ সুবিধা
- বৰ্তমান জাতীয় হাইৱে টোল প্লাজা পাৰ হোৱাৰ বাবে ৫০ৰ পৰা ১০০ টকা দিব লাগে৷
- ২০০বাৰ টোল প্লাজা পাৰ হলে আপুনি ৫০ টকা হাৰত ১০০০০ টকা দিব লাগে৷
- যদি ১০০ টকা টোল চাৰ্জ হয় তেতিয়া ২০০ বাৰ টোল প্লাজা হাৰ হলে ২০০০০ টকা দিব লাগে৷
- কিন্তু ফাষ্টটেগ বাৰ্ষিক পাছৰ মাধ্যমেৰে আপুনি মাত্ৰ ৩০০০ টকাত ২০০ টা ট্ৰিপ সম্পন্ন কৰিব পাৰে৷
- বাৰ্ষিক পাছৰ মাধ্যমেৰে সহজেই ৭০০০ টকাৰ পৰা ১৭০০০ টকা পৰ্যন্ত ধন বচাব পাৰে৷
- আপোনাৰ সঞ্চয় নিৰ্ভৰ কৰে আপুনি কিমানবাৰ ভ্ৰমণ কৰিছে আৰু কিমান দূৰত্ব অতিক্ৰম কৰিছে তাৰ ওপৰত৷ বাৰ্ষিক পাছ অ-হস্তান্তৰযোগ্য৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
