৩৬ ঘণ্টাত ৪৭ জনৰ মৃত্যু, কৃত্ৰিম বান চাৰিওফালে, বিদ্যালয় বন্ধ
এইবাৰ বাৰিষাত সমগ্ৰ দেশতে প্ৰৱল বৰষুণ। বৰষুণেও এইবাৰ বহু ধ্বংসলীলাৰ সৃষ্টি কৰিছে কেইবাখনো ৰাজ্যত। ৰাজধানী দিল্লীকে ধৰি উত্তৰ প্ৰদেশ, মধ্যপ্ৰদেশ আদি কেইবাখনো ৰাজ্যত বিগত ২ দিন ধৰি ধাৰাসাৰ বৰষুণ দি আছে, যাৰ বাবে স্তব্ধ হৈ পৰিছে জনজীৱন।
একে সময়তে দেশৰ বিভিন্ন প্ৰান্তত হোৱা ধাৰাসাৰ বৰষুণৰ ফলত ৩৬ ঘন্টাত ৪৭ জন লোকৰ মৃত্যু হৈছে। উত্তৰ প্ৰদেশত ৩২ জন, মধ্য প্ৰদেশত ১১ জন আৰু ৰাজস্থানত ৪ জন লোকৰ মৃত্যু হৈছে। উত্তৰ প্ৰদেশত অব্যাহত আছে বান পৰিস্থিতি।
মধ্য প্ৰদেশতো বহু জিলাত বৰষুণৰ বাবে ৰাস্তা ঘাট বোৰ পানীৰে ভৰি পৰিছে। ৰাজস্থানৰ বহু জিলাত বানপানীৰ সৃষ্টি হৈছে। তিনিওখন ৰাজ্যত বৰষুণৰ বাবে পৰিস্থিতি অবৰ্ণনীয় হৈ পৰিছে।
উত্তৰ প্ৰদেশত হোৱা নেৰানেপেৰা বৰষুণৰ ফলত বিগত ২৪ ঘণ্টাত ২৪ জন লোকৰ মৃত্যু হয়। আগৰা, ঝান্সী আৰু মথুৰাত পৰিস্থিতি আটাইতকৈ বেয়া। দিল্লী-আগ্ৰা ৰাষ্ট্ৰীয় ঘাইপথত ৪ ফুটতকৈ অধিক বানপানীৰ বাবে পথ অৱৰোধ।
সাহায্য বিভাগৰ বিষয়াসকলে জনোৱা মতে, বৰষুণৰ ফলত হোৱা দুৰ্ঘটনাত মইনপুৰীত ৫ জন আৰু মথুৰাত ২ জন লোকে প্ৰাণ হেৰুৱাইছে। জালাউন আৰু বাণ্ডাত ২ জনকৈ লোকৰ প্ৰাণ হেৰুৱাৰ খবৰ।
এনডিআৰএফ আৰু এছডিআৰএফ উদ্ধাৰ অভিযানত অব্যাহত। উল্লেখ্য যে, বিগত ২৪ ঘন্টাত উত্তৰ প্ৰদেশত ২৮.৬ মিলিমিটাৰ বৰষুণ হৈছে। হাথৰাছত সৰ্বাধিক ১৮৫.১ মিলিমিটাৰ বৰষুণ । আনহাতে ধাৰাসাৰ বৰষুণ আৰু বতাহৰ ফলত মথুৰাত ৩১টা ঘৰ ভাঙি গৈছে।
সংবাদ মাধ্যমৰ খবৰ অনুসৰি দক্ষিণ-পশ্চিম উত্তৰ প্ৰদেশত নিম্ন চাপৰ এলেকা গঠন হোৱাৰ বাবে ঘণ্টাত ২০ৰ পৰা ৩০ কিলোমিটাৰ বেগত বতাহ আৰু বৰষুণ দি আছিল। বৃহস্পতিবাৰে উত্তৰ প্ৰদেশত সৰ্বোচ্চ তাপমাত্ৰা ২৯ ডিগ্ৰী আৰু সৰ্বনিম্ন তাপমাত্ৰা ২৫.৪ ডিগ্ৰী।
বতৰ বিজ্ঞান বিভাগে ১৪ ছেপ্টেম্বৰলৈকে প্ৰচণ্ডৰ পৰা অতি প্ৰচণ্ড বৰষুণৰ ৰেড এলাৰ্ট দিছে। একে সময়তে বানপানীৰ দৰে পৰিস্থিতিৰ আশংকাত ৰাইজৰ বাবেও সতৰ্কবাণী জাৰি কৰা হৈছে। আজি বতৰ বিজ্ঞান বিভাগে ১৯খন জিলাত ধাৰাসাৰ বৰষুণৰ সতৰ্কবাণী জাৰি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
