অসম লাইভ ২৪ঃ বিজেপিৰ অস্ত্ৰৰে বিজেপিকেই আক্ৰমণ কৰিছে নেকি দিল্লীৰ মুখ্যমন্ত্ৰীয়ে! প্ৰধানমন্ত্ৰীক মুখ্যমন্ত্ৰী অৰবিন্দ কেজৰিৱালে দিয়া প্ৰস্তাৱে দেশজুৰি লাভ কৰিছে চৰ্চা।
ভাৰতীয় নোটত লক্ষ্মী-গণেশৰ ছবি ৰাখিবলৈ আহ্বান জনাইছে দিল্লীৰ মুখ্যমন্ত্ৰী অৰবিন্দ কেজৰিৱালে। কেজৰিৱালৰ দাবী, নতুন নোট ছপা কৰোত মহাত্মা গান্ধীৰ কাষত লক্ষ্মী আৰু গণেশৰো ছবি ৰাখক। অৰবিন্দ কেজৰিৱালে ছপা পদ্ধতিৰ বিষয়েও বুজায় কয় যে, এফালে মহাত্মা গান্ধীকেই ৰাখত অন্য পিঠিতহে লক্ষ্মী-গণেশক ৰাখক। এনেকৈ দেৱ-দেৱীৰ ফটো ৰাখিলে আৰ্থিক সমৃদ্ধি ঘটিব।
প্ৰধানমন্ত্ৰী মোদীক আবেদন জনাই কেজৰিৱালে কয়, ‘বিভিন্ন সময়ত আমি আৰ্থিক উন্নতিৰ বাবে বিভিন্ন ধৰণে চেষ্টা কৰো। কিন্তু ঈশ্বৰৰ আশীৰ্বাদ অবিহনে এয়া সম্ভৱ নহয়। সেয়ে প্ৰধানমন্ত্ৰীক মই আবেদন জনাইছো যে ভাৰতীয় নোটত লক্ষ্মী-গণেশৰ ছবি ৰাখক।’
ইয়াৰ উপৰিও কেজৰিৱালে নিজা কথাৰ ওপৰত যুক্তি দি ইণ্ডোনেছিয়াৰ উদাহৰণ দাঙি ধৰে। ইণ্ডোনেছিয়া মুছলমান অধ্যুষিত দেশ হ’লেও তাত গণেশৰ ছবি থকা নোটৰহে প্ৰচলন আছে। আমাৰ দেশত এয়া সম্ভৱ নহয় কিয়? চিঠিত কেজৰিৱালে লিখিছে, ‘ডলাৰৰ তুলনাত টকাৰ মূল্য ক্ৰমাৎ হ্ৰাস পাব ধৰিছে। এনে জটিল পৰিস্থিতিত অৰ্থনৈতিক স্থিতিশীলতা আনিবলৈ ঈশ্বৰৰ আশীৰ্বাদ অতিকৈ প্ৰয়োজন।’
বিজেপিয়ে ধৰ্মীয় মেৰুকৰণৰ ৰাজনীতি কৰে বুলি বিৰোধীয়ে প্ৰতিসময়তে আক্ৰমণ কৰি থকাৰ সময়তে অৰবিন্দ কেজৰিৱালৰ এই মন্তব্যক লৈ সমগ্ৰ দেশতেই চলিছে চৰ্চা। কেজৰিৱালে মোদীৰ ৰাজনৈতিক কৌশলেৰে মোদীকেই আঁতৰাই দিয়াৰ পৰিকল্পনা কৰিছে নেকি? ভাৰতবৰ্ষৰ দৰে ধৰ্ম নিৰপেক্ষ দেশত ধৰ্মীয় মন্তব্য ৰাখি কেজৰিৱালে বিজেপি দলক দূৰ্বল কৰাৰেই চেষ্টা কৰা বুলিও ৰাজনৈতিক মহলে চৰ্চা চলাইছে।
উল্লেখ্য যে ইয়াৰ পূৰ্বেও গুজৰাটৰ জনসভাত কেজৰিৱালে ‘জয় শ্ৰী ৰাম’, ‘জয় শ্ৰী কৃষ্ণ’ ধ্বনি দিছিল। গুজৰাটতো জনপ্ৰিয়তা বৃদ্ধিৰ বাবেই এই কাৰ্যকলাপ কেজৰিৱাল বুলি বহুতেই সামাজিক মাধ্যমত চৰ্চা চলাইছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
