অসম লাইভ ২৪ঃ পুনৰ আহি আছে ক’ৰোনা৷ আশংকা আৰম্ভ হৈছে৷ দীৰ্ঘ বিৰতিৰ মূৰত বিদ্যালয়সমূহৰ দুৱাৰ খোল খালে৷ আৰম্ভ হ’ল পাঠদান প্ৰক্ৰিয়া৷ ইয়াৰ পূৰ্বে দোকান-পোহাৰ সম্পূৰ্ণৰূপে খুলিছিল৷ পূৰ্বৰ স্বাভাৱিক জীৱন যাত্ৰা পুনৰ আৰম্ভ হৈছে৷ কিন্তু এনে সময়তে দুৰ্ভাৱনা, আশংকাই গা কৰি উঠিছে৷ এই দুৰ্ভাৱনা-আশংকাৰ থল নথকা নহয়৷ ইয়াৰ ভিত্তি আছে৷ কাৰণ পুনৰ বৃদ্ধি পাইছে ক’ৰোনা সংক্ৰমণৰ হাৰ৷ বিশ্ব স্বাস্থ্য সংস্থাৰ তথ্য অনুসৰি, ১৮ অক্টোবৰত বিশ্বজুৰি ২,৪৫,৫০৭ জন আক্ৰান্ত হৈছে ক’ৰোনাত৷ মৃত্যু হৈছে ৩,২৭০ জনৰ৷ বিগত ২৪ ঘণ্টাত ভাৰতত আক্ৰান্ত ১৩,৫৯৬ জন আৰু মৃত্যু ১৬৬ জনৰ৷
১৮ অক্টোবৰত অসমত কোভিড আক্ৰান্ত ২৯৮ জন, ইয়াৰে কামৰূপ (মহানগৰ)ত আক্ৰান্ত ১০৩ জন আৰু ৰাজ্যত মৃত্যু ৭ জনৰ৷ এই তথ্য ৰাজ্য চৰকাৰৰ৷ এদিন পূৰ্বৰ তুলনাত মহানগৰত কোভিড পৰিস্থিতিৰ যথেষ্ট অৱনতি পৰিলক্ষিত হৈছে৷ ১৭ অক্টোবৰত আক্ৰান্ত আছিল মাথোঁ ৬৮ জন৷ অৰ্থাৎ, এদিনত মহানগৰীত আক্ৰান্তৰ সংখ্যা বৃদ্ধি হ’ল ৩৫ জনলৈ৷ তথ্যই স্পষ্ট কৰিছে যে ভয়ংকৰ ৰূপত সংক্ৰমণ বৃদ্ধি পাইছে৷ উচাহ-উদ্দীপনাৰে দুৰ্গা পূজা উদযাপিত হ’ল৷ ৰাজ্যৰ ৬ সমষ্টিৰ উপ নিৰ্বাচনৰ বাবে সভা-সমিতিসমূহ আয়োজিত হৈ আছে৷ পূজা আৰু উপ নিৰ্বাচনৰ প্ৰচাৰ সভা দুয়োক্ষেত্ৰতে দেখা গৈছে যে হাজাৰ হাজাৰ লোক মুকলিকৈ ওলাই আহিছে৷ নাই মাস্ক, নাই ছেনিটাইজাৰ, নাই শাৰীৰিক দূৰত্ব৷ হয়তো দুৰ্গা পূজাতে কোভিডৰ ব্যাপক আদান-প্ৰদান৷ নিৰ্বাচনী প্ৰচাৰত আদান-প্ৰদান কোভিডৰ৷ এই হাৰ অব্যাহত থাকিলে অচিৰেই ভয়ংকৰ ৰূপ ধাৰণ কৰিব পাৰে কোভিডে৷ এই হাৰ অব্যাহত থাকিলে লকডাউনৰ সম্ভাৱনাও নুই কৰিব নোৱাৰি৷ কিন্তু নিশ্চিন্ত থাকক৷ উপ নিৰ্বাচন অনুষ্ঠিত নোহোৱালৈ অসমত শক্তিশালী নহয় কোভিড৷ সকলো নিৰ্ভৰ কৰিব উপ নিৰ্বাচনৰ ওপৰত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
