তৃতীয়বাৰৰ বাবে মহাকাশত উৰা মাৰিবলৈ সাজু ভাৰতীয় মূলৰ সুনীতা উইলিয়ামছ
ভাৰতীয় মূলৰ মহাকাশচাৰী সুনীতা উইলিয়ামছ পুনৰ মহাকাশলৈ যাবলৈ সাজু। এইবাৰ বুচ উইলম’ৰেও তেওঁৰ লগত থাকিব। বয়িঙৰ ষ্টাৰলাইনাৰ মহাকাশযানত উঠি মহাকাশলৈ যাবলৈ সাজু হৈছে নাছাৰ দুজন অভিজ্ঞ মহাকাশচাৰী।
এইখন হ’ব প্ৰথমখন মানৱবাহী মহাকাশযান, যিখন কাইলৈ ৭ মে’ত উৰণ হ’ব। নাছাৰ তথ্য অনুসৰি অহা ৭ মে’ৰ পুৱা ৮:০৪ বজাত কেনেডি মহাকাশ কেন্দ্ৰৰ পৰা ইউনাইটেড লঞ্চ এলায়েন্স এটলাছ ভি ৰকেট আৰু বয়িং ষ্টাৰলাইনাৰ মহাকাশযান উৎক্ষেপণ কৰা হ’ব।
এই অভিযানৰ বিষয়ে সুনীতা উইলিয়ামছে সাংবাদিকৰ সৈতে হোৱা কথা-বতৰাত জানিবলৈ দিয়ে যে, এইবাৰৰ অভিযানক লৈ কিছু নাৰ্ভাচ হৈ আছে কিন্তু উৰণৰ বাবে উৎসাহিত, লগতে ইয়াকো কয় যে, এনেদৰে মহাকাশলৈ যোৱাটো ঘৰলৈ উভতি যোৱাৰ দৰে।
ড° দীপক পাণ্ডিয়া আৰু বনী পাণ্ডিয়াৰ ঘৰত জন্মগ্ৰহণ কৰা সুনীতা উইলিয়ামছে পুনৰবাৰ ইতিহাস সৃষ্টি কৰিবলৈ সাজু হৈছে। আনাহতে মানৱ সম্পন্ন মহাকাশযানৰ প্ৰথম অভিযানতে প্ৰথমগৰাকী মহিলা হিচাপে উৰা মাৰিবলৈ সাজু হৈছে সুনীতা।
উল্লেখ্য যে, ইয়াৰ পূৰ্বে ২০০৬ আৰু ২০১২ চনত দুবাৰকৈ মহাকাশলৈ গৈছে সুনীতা উইলিয়ানছে। উইলিয়ামছে দুটা অভিযানত মুঠ ৩২২ দিন মহাকাশত কটাবলগীয়া হৈছে।
এইবাৰৰ যাত্ৰাত সুনীতা উইলিয়ামছে এটা গণেশৰ মূৰ্তি লগত লৈ যাব। তেখেতৰ বিশ্বাস, গণেশৰ মূৰ্তি সৌভাগ্যৰ প্ৰতীক । ইয়াৰ পূৰ্বৰ যাত্ৰাত এবাৰ ভাগৱত গীতা তেখেতে লগত লৈ গৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
