উত্তৰ প্ৰদেশৰ কানপুৰত পোহৰলৈ আহিছে এক চাঞ্চল্যকৰ ঘটনা। ইনষ্টাগ্ৰামৰ জৰিয়তে থাইলেণ্ডৰ এগৰাকী যুৱতীৰ সৈতে চিনাকি হৈছিল কানপুৰৰ এজন যুৱকৰ। পৰৱৰ্তী সময়ত দুয়োৰে মাজত ঘনিষ্ঠতা বৃদ্ধি পায় আৰু যুৱকজনে থাইলেণ্ডলৈ গৈ যুৱতীগৰাকীৰ সৈতে বিৱাহপাশত আবদ্ধ হয়। অভিযুক্ত যুৱকজনৰ নাম ইৰফান খান বুলি জানিব পৰা গৈছে
ভুক্তভোগী যুৱতীগৰাকীৰ অভিযোগ অনুসৰি, অভিযুক্ত যুৱকজনে নিজকে অবিৱাহিত বুলি কৈছিল। আনহাতে, বিয়াৰ পূৰ্বে তেওঁ নিজৰ পত্নীক বিৱাহ বিচ্ছেদ কৰা বুলি মহিলাগৰাকীক জনাইছিল। কিন্তু কানপুৰলৈ আহি যুৱতীগৰাকীয়ে জানিব পাৰে যে অভিযুক্তজন ইতিমধ্যে ১৪ বছৰ পূৰ্বেই বিৱাহপাশত আবদ্ধ হৈছে আৰু তেওঁৰ তিনিটা সন্তানো আছে।
যুৱতীগৰাকীয়ে অভিযোগ কৰা অনুসৰি, যোৱা দুবছৰত অভিযুক্তই তেওঁৰ পৰা প্ৰায় ৬০ লাখ টকা লৈছিল। ধনখিনি ঘূৰাই বিচৰাৰ পিছতেই পৰিস্থিতি অধিক জটিল হৈ পৰে। অভিযোগ অনুসৰি, অভিযুক্তই যুৱতীগৰাকীক ইছলাম ধৰ্ম গ্ৰহণ কৰিবলৈ হেঁচা দিবলৈ আৰম্ভ কৰে। কিন্তু ধৰ্ম সলনি কৰিবলৈ তেওঁ কোনো কাৰণতে সন্মত নহয় বুলি যুৱতীগৰাকীয়ে স্পষ্ট কৰি দিয়ে।
ভুক্তভোগী যুৱতীগৰাকীয়ে কানপুৰত উপস্থিত হৈ অভিযুক্তক বিচাৰি উলিয়াবলৈ চেষ্টা কৰে। সেই সময়তে তেওঁৰ স্বামীৰ পূৰ্বৰ বিৱাহৰ কথা পোহৰলৈ আহে বুলি অভিযোগ কৰে। যুৱতীগৰাকীয়ে আৰক্ষীৰ ওচৰত এজাহাৰ দাখিল কৰি নিজৰ ধন ঘূৰাই দিয়াৰ লগতে ন্যায় বিচাৰে।
তেওঁ কানপুৰৰ ADCP শিৱ সিঙক সাক্ষাৎ কৰি নিজৰ অভিযোগ জনায়। যুৱতীগৰাকীৰ দাবী অনুসৰি, অভিযুক্তই ধন লৈ পুনৰ ঘূৰি অহাৰ প্ৰতিশ্ৰুতি দিছিল। কিন্তু বিগত দুবছৰ ধৰি তেওঁক প্ৰতাৰণা কৰি আহিছে। আৰক্ষীৰ মতে, ভুক্তভোগীৰ অভিযোগৰ ভিত্তিত অভিযুক্তৰ বিৰুদ্ধে গোচৰ ৰুজু কৰা হৈছে। ঘটনাটোৰ তদন্ত আৰম্ভ কৰা হৈছে। তদন্তৰ সময়ত লাভ কৰা তথ্য আৰু প্ৰমাণৰ ভিত্তিত পৰৱৰ্তী সময়ত আইন অনুসৰি ব্যৱস্থা গ্ৰহণ কৰা হ’ব বুলি আৰক্ষীয়ে জানিবলৈ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
