অসম লাইভ ২৪ঃ বৃহস্পতিবাৰে অলিম্পিকৰ একাধিক খেলত বিজয় সাব্যস্ত কৰে ভাৰতে। আৰ্চাৰী, হকী, বেডমিণ্টন আৰু বক্সিঙত দুৰ্দান্ত প্ৰদৰ্শনেৰে অগ্ৰগতি অব্যাহত আছে ভাৰতীয় টীমৰ। ভাৰতীয় তাৰকা শ্বাটলাৰ পি ভি সিন্ধু কোৱাৰ্টাৰ ফাইনেলত প্ৰৱেশ। ডেনমাৰ্কৰ মিয়া ব্লিচফেল্টৰ বিৰুদ্ধে ২১-১৫, ২১-১৩ ব্যৱধানত জয়লাভ সাব্যস্ত কৰে সিন্ধুয়ে। কোৱাৰ্টাৰ ফাইনেলত পি ভি সিন্ধুৰ প্ৰতিপক্ষ হ’ব জাপানৰ আকানে ইয়ামাগুচি। শুকুৰবাৰৰ মেচত জয়ী হ’লেই ছেমিফাইনেলত প্ৰৱেশ কৰিব ভাৰতীয় শ্বাটলাৰগৰাকীয়ে। ইফালে, মনপ্ৰিত সিঙৰ নেতৃত্বৰে ভাৰতীয় পুৰুষ হকী টীমে আজিও অব্যাহত ৰাখে জয়যাত্ৰা। ৰিঅ’ অলিম্পিকৰ চেম্পিয়ন আৰ্জেণ্টিনাক ৩-১ গ’লত পৰাস্ত কৰি কোৱাৰ্টাৰ ফাইনেলত প্ৰৱেশ কৰে ভাৰতীয় টীম। জাপানৰ বিৰুদ্ধে পৰৱৰ্তী মেছত অৱতীৰ্ণ হ’ব ভাৰত। আজি বক্সিং ৰিঙতো প্ৰতিপক্ষক ধৰাশায়ী কৰে ভাৰতে। জামাইকাৰ ৰিকাৰ্ড’ ব্ৰাউনক ৪-১ ব্যৱধানত পৰাস্ত কৰি কোৱাৰ্টাৰ ফাইনেলত উপনীত হয় ভাৰতৰ বক্সাৰ সতীশ কুমাৰ। পৰৱৰ্তী মেচত উজবেকিস্তানৰ বাখোদিৰ জালোলভিৰ বিৰুদ্ধে জয়ী হ’লেই পদক নিশ্চিত হ’ব ভাৰতৰ। তদুপৰি, প্ৰি-কোৱাৰ্টাৰলৈ উন্নীত ভাৰতৰ আৰ্চাৰ অতনু দাস। আৰ্চাৰীত পুৰুষৰ ব্যক্তিগত শাখাত অতনু দাসৰ শীৰ্ষ অষ্টমত প্ৰৱেশ। পৰৱৰ্তী মেচত জাপানৰ তাকাহাৰু ফুৰুকাওৱাৰ বিৰুদ্ধে অৱতীৰ্ণ হ’ব অতনু। ইয়াৰোপৰি, ৰোয়িং আৰু ১০ মিটাৰ এয়াৰ ৰাইফলতো সাফল্য ভাৰতৰ। ৰোয়িঙৰ ফাইনেল-বি ইভেণ্টত ভাৰতৰ অৰ্জুন লাল আৰু অৰবিন্দ সিঙে পঞ্চম স্থান দখল কৰে আৰু ১০ মিটাৰ এয়াৰ ৰাইফলৰ প্ৰথম যোগ্যতা অৰ্জন ইভেণ্টত মানু ভাকেৰ আৰু ৰাহি সাৰনোৱতৰ সাফল্য। শুকুৰবাৰে যোগ্যতা অৰ্জন ইভেণ্টত খেলিব দুয়োগৰাকী খেলুৱৈয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
