এদল ভাৰতীয় বিজ্ঞানীয়ে স্ব-বীজাণুমুক্তকৰণ জৈৱ-পচনশীল মাস্ক প্ৰস্তুত কৰিছে৷ শুকুৰবাৰে কেন্দ্ৰীয় বিজ্ঞান আৰু প্ৰযুক্তি মন্ত্ৰণালয়ে এই কথা ঘোষণা কৰিছে৷
মন্ত্ৰণালয়ৰ মতে দেশত অব্যাহত থকা কোভিড সংক্ৰমণক এই জৈৱ-পচনশীল আৰু স্ব-বীজাণুমুক্তকৰণ মাস্কে প্ৰতিৰোধ কৰিবলৈ সক্ষম হ’ব৷
মন্ত্ৰণালয়ে জনোৱা অনুসৰি, তাম-আধাৰিত নেনোপার্টিকেলৰ আৱৰণযুক্ত এই এণ্টিভাইৰেল মাস্কটোৱে কৰোনাভাইৰাছৰ লগতে আন কেইবাটাও ভাইৰেল আৰু বেক্টেৰিয়াৰ সংক্ৰমণকো প্ৰতিৰোধ কৰিবলৈ সক্ষম হ’ব। ই হৈছে স্বাভাৱিক উশাহ-নিশাহ ল’ব পৰা আৰু ধুব পৰা মাস্ক।
মন্ত্ৰণালয়ে উল্লেখ কৰিছে যে পৰম্পৰাগত মাস্ক পিন্ধি ভাইৰাছ সংক্ৰমণ নিয়ন্ত্ৰণ কৰাটো কঠিন হৈ পৰিছে৷ বিশেষকৈ চিকিৎসালয়, বিমানবন্দৰ, ষ্টেচন আৰু শ্বপিং মলৰ দৰে মানুহে ঠাহ খাই থকা স্থানত সাধাৰণ মাস্কে ভাইৰাছ সংক্ৰমণৰ ৰোধত কৃৰ্তকাৰ্য হোৱা নাই।
কিন্তু এই নতুন মাস্কবিধে উশাহ নিশাহ সমস্যাৰ পৰা উপশম দিয়াৰ লগতে ভাইৰাছ সংক্ৰমণ ৰোধ কৰিবলৈ সক্ষম হ’ব বুলি প্ৰকাশ কৰিছে মন্ত্ৰণালয়ে৷
ইন্টাৰনেশ্যনেল এডভান্স ৰিচাৰ্ছ চেন্টাৰ ফৰ পাউডাৰ মেটালুৰ্জি এণ্ড নিউ মেটেৰিয়েলছ(ARCI) ৰ গৱেষকসকলে বিজ্ঞান আৰু প্ৰযুক্তি বিভাগে পৃষ্ঠপোষকতাত কৰা নেনো-মিছন প্ৰকল্পৰ অধীনত বেংগালুৰুস্থিত কোম্পানী চেণ্টাৰ ফৰ চেলুলাৰ এণ্ড মলিকিউলাৰ বায়োলজী (চিএছআইআৰ-চিচিএমবি) আৰু ৰেচিল কেমিকেলছৰ সহযোগত এই মাস্কবিধ প্ৰস্তুত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
