সীমান্ত পাৰ হৈ দলে দলে ভাৰতলৈ আহিছে ছাত্ৰ, বাংলাদেশৰ পৰিস্থিতিৰ বৰ্ণনা দিলে ভাৰতীয় ছাত্ৰই

ছাত্ৰ বিক্ষোভত উত্তাল বাংলাদেশ৷ নিহতৰ সংখ্যা বাঢ়ি হৈছেগৈ ১০৫ জন৷ বৰ্তমান পৰ্যন্ত সেই পৰিসংখ্যা যদিও এই সংখ্যা আৰু বৃদ্ধি হোৱাৰ সম্ভাৱনা থকা বুলিও জনাইছে এএফপিয়ে৷ ইয়াৰ মাজতেই সীমান্ত পাৰ হৈ দলে দলে ভাৰতলৈ আহিছে বাংলাদেশলৈ পঢ়িবলৈ যোৱা ছাত্ৰ৷ ত্ৰিপুৰা, মেঘালয় আৰু পশ্চিমবংগ হৈ ভাৰতত প্ৰৱেশ কৰিছে তেওঁলোকে৷ শুকুৰবাৰে নিশাৰে পৰা বাংলাদেশত যিহেতু কাৰফিউ জাৰি কৰা হৈছে সেয়ে ভাৰতীয় ছাত্ৰসকল এতিয়া সীমান্চ পাৰ হৈ ভাৰতলৈ উভতি আহিছে৷ ৩০০ ৰো অধিক ছাত্ৰ ভাৰতলৈ উভতি আহিছে৷ বাংলাদেশৰ বিভিন্ন বিশ্ববিদ্যলয়ত তেওঁলোকে পঢ়ি আছিল৷

সাম্প্ৰতিক পৰিস্থিতিৰ প্ৰতি লক্ষ্য ৰাখি বন্ধ কৰি দিয়া হৈছে শিক্ষা প্ৰতিষ্ঠানসমূহ৷ পৰিস্থিতি স্বাভাৱিক নোহোৱা পৰ্যন্ত বাংলাদেশৰ শিক্ষানুষ্ঠানসমূহ বন্ধ হৈ থাকিব৷ শুকুৰবাৰে নিশাও কেইবাগৰাকী ছাত্ৰ সীমান্ত পাৰ হৈ দেশলৈ আহিছে৷ বহু বিদেশী ছাত্ৰ-ছাত্ৰীয়েও এতিয়া বাংলাদেশ এৰি ভাৰতত প্ৰৱেশ কৰিছে৷

শুকুৰবাৰে ত্ৰিপুৰা, মেঘালয় হৈ যিসকল ছাত্ৰ আহিছে তেওঁলোকৰ বেছিভাগেই উত্তৰপ্ৰদেশ, হাৰিয়ানা, মেঘালয়, জম্মু আৰু কাশ্মীৰৰ বাসিন্দা৷ দেশলৈ ওভতি আহিবলৈ তেওঁলোকে দুটা ৰাস্তা বাচি লৈছে৷ এটা দলে ত্ৰিপুৰাৰ আগৰতলাৰ ওচৰৰ আখুৰা স্থলবন্দৰ হৈ ভাৰতলৈ আহিছে৷ অন্য দলে মেঘালয়ৰ ডাউকী স্থলবন্দৰ হৈ ভাৰতত প্ৰৱেশ কৰিছে৷

বাংলাদেশৰ সংৰক্ষণ ব্যৱস্থা সংস্কাৰৰ দাবীত বিগত এসপ্তাহ ধৰি ছাত্ৰবিক্ষোভ চলি আছে৷ বিগত সোমবাৰৰ পৰা ক্ৰমে এই বিক্ষোভ হিংস্ৰ হৈ পৰিছে৷ মঙলবাৰৰ দিনটোত আৰক্ষী আৰু আন্দোলনকাৰীৰ মাজৰ সংঘৰ্ষত ৬জন লোকে মৃত্যুক সাবটি লৈছে৷ তাৰপাছতেই কোটা সংস্কাৰৰ আন্দোলন আৰু তীব্ৰতৰ হৈ উঠে৷ বাংলাদেশৰ বিভিন্ন স্থানত বন্ধ কৰি দিয়া হয় ইণ্টাৰনেট পৰিসেৱা৷ আৰক্ষীয়ে এই দন্দ শেষ কৰিব নোৱাৰাত সেনা মোতায়েন কৰা হৈছে বাংলাদেশৰ বিভিন্ন এলেকাত৷

ভাৰতলৈ উভতি অহা ছাত্ৰই জনাইছে যে, বাংলাদেশৰ পৰিস্থিতি অত্যন্ত উদ্বেগজনক৷ প্ৰথমে আন্দোলনৰ মাজত বিশ্ববিদ্যালয় বন্ধ হৈ যোৱাৰ বাবে তেওঁলোকে তাত কিছুদিন থাকি যোৱাৰ সিদ্ধান্ত লৈছিল৷ কিন্তু পৰিস্থিতি ক্ৰমে বেয়া হৈ অহাৰ বাবে তেওঁলোকে সেই দেশ এৰাৰ সিদ্ধান্ত লয়৷ ইণ্টাৰনেট সেৱা কৰ্তন কৰাৰ বাবে তেওঁলোকে পৰিয়ালৰ সৈতে যোগাযোগো কৰিব পৰা নাছিল৷ ভাৰতীয় দূতবাসৰ সৈতে সংযোগ স্থাপন কৰি তেওঁলোকে স্থলপথেৰে ব্যক্তিগত বাহনেৰে ভাৰতলৈ আহিছে৷ বিক্ষোভৰ বাবে এতিয়া বাংলাদেশত ট্ৰেইন, মেট্ৰ সকলো পৰিসেৱাই বাতিল হৈ আছে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ