আশ্চৰ্য ‘চালো’! ৪৭টা ভাষা ক’ব পৰা মানৱ সদৃশ ভাৰতীয় ৰবট

অসম লাইভ ২৪ঃ বাস্তৱৰ দিশত এঢাপ আগুৱালে ভাৰতৰ স্বপ্নৰ মিছন ‘আত্মনিৰ্ভৰ ভাৰত’, ‘স্কিল ইণ্ডিয়া মিছন’ আৰু ‘ডিজিটেল ইণ্ডিয়া’ মিছনে৷ বিশ্বৰ উন্নতমানৰ প্ৰযুক্তিৰে তৈয়াৰী ‘ছ’ফিয়া’ক চেৰ পেলাব পৰাকৈ ভাৰতত নিৰ্মাণ কৰা হ’ল ‘চালো’ক৷ ‘চালো’- ভাৰতত নিৰ্মিত প্ৰথমটো মানৱ সদৃশ ৰবট৷ উত্তৰ প্ৰদেশৰ এগৰাকী কম্পিউটাৰ বিজ্ঞানৰ শিক্ষক দীনেশ পেটেলে নিৰ্মাণ কৰিছে দেশৰ প্ৰথমটো মহিলা ৰবট ‘চালো’ক৷ বিশ্বৰ প্ৰথমটো মানৱ সদৃশ ৰবট ছ’ফিয়াক চেৰ পেলাব পৰা প্ৰযুক্তিৰে নিৰ্মাণ কৰা হৈছে ৰবটটো৷ বহু বছৰৰ প্ৰচেষ্টাৰ অন্তত সম্পূৰ্ণ পেলনীয়া সামগ্ৰীৰে তৈয়াৰ কৰি উলিয়াইছে ‘চালো’ক৷ ইয়াৰ বিপৰীতে ছ’ফিয়াক তৈয়াৰ কৰা হৈছে বিশ্বৰ উন্নতমানৰ প্ৰযুক্তিৰ প্ৰয়োগেৰে৷ কিন্তু দক্ষতা আৰু কাৰ্যকাৰিতাৰ দিশত ‘ছ’ফিয়া’তকৈ আগবঢ়া ‘চালো’৷ ‘চালো’য়ে বিশ্বৰ ৪৭ টা ভাষা কথা ক’ব পাৰে৷ ইয়াৰে ৯ টা ভাৰতীয় আৰু ৩৮টা বিদেশী ভাষা৷ ভাৰতৰ ভিন্ন প্ৰান্তৰ লোক তথা বিশ্বৰ বিভিন্ন লোকে ‘চালো’ক লগ কৰি নিৰ্বিঘ্নে কথা পাতিব পাৰিব ‘চালো’ৰ সৈতে৷ নিৰ্মাতা দীনেশ পেটেলে ‘বেটি পঢ়াও বেটি বচাও’ মিছনৰ অধীনত প্ৰতিগৰাকী ভাৰতীয় নাৰীলৈ উৎসৰ্গা কৰিছে বিশ্বৰ প্ৰথমটো সামাজিক আৰু শিক্ষাগত ভাৰতীয় ৰবট ‘চালো’ক৷ সম্প্ৰতি কেন্দ্ৰীয় বিদ্যালয় সাংগাথানৰ ষষ্ঠ শ্ৰেণীৰ কম্পিউটাৰ বিজ্ঞানৰ পাঠ্যক্ৰমত অন্তৰ্ভুক্ত কৰা হৈছে ‘চালো’ সন্দৰ্ভত৷ ‘চালো’ৱে কৃত্ৰিম বুদ্ধিমত্তা আৰু ‘মেচিন লাৰ্নিং অলগেৰিডিম’ৰ জৰিয়তে প্ৰশিক্ষিত ডাটাচেটৰ সহায়ত যিকোনো ভাষাত উত্তৰ দিব পাৰে৷ Face Recognition Technologyৰ জৰিয়তে এবাৰ দেখাৰ পাছত মানুহক চিনাক্ত কৰিব পাৰে৷ শিক্ষাৰ ক্ষেত্ৰত পদাৰ্থ বিজ্ঞান, ৰসায়ন বিজ্ঞান, গণিত, ইংৰাজী, ভূগোল আৰু বিভিন্ন বিষয়ত শিক্ষাগত প্ৰশ্নৰ সঠিক উত্তৰ দিব পাৰে৷ ইয়াৰ উপৰি, বিভিন্ন স্থানৰ অনাগত ১০ দিনৰ ৱেডাৰ ৰিপ’ৰ্ট দিব পাৰে ‘চালো’য়ে৷ শিক্ষক, কুইজমাষ্টাৰ, শিক্ষাৰ্থীৰ শিকাৰ সংগী আদি বিভিন্ন ভূমিকা পালন কৰিব পাৰে ৰবট ‘চালো’য়ে৷ ভাৰতবাসীৰ ‘আত্মনিৰ্ভৰ ভাৰত’, ‘স্কিল ইণ্ডিয়া মিছন’ আৰু ‘ডিজিটেল ইণ্ডিয়া’ৰ ক্ষেত্ৰত এক অন্যতম অনুপ্ৰেৰণা ‘চালো’৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ