হিন্দু ধৰ্মাৱলম্বীসকলৰ মাজত পিতৃপক্ষ এটা বিশেষ গুৰুত্বপূৰ্ণ সময়৷ এই ১৫ দিনৰ মাজত প্ৰয়াত পিতৃপুৰুষসকলে তেওঁলোকৰ উত্তৰপুৰুষৰ হাতৰ পৰা পানী খাবলৈ মৰ্ত্যলৈ নামি আহে৷ পিতৃপক্ষৰ মাজত যি একাদশী পৰিছে, সেই দিনটোও বিশেষ মাহাত্ম্যপূৰ্ণ হ’ব৷ পিতৃপক্ষৰ মাজত যি একাদশী পালিত হয় সেয়া ইন্দিৰা একাদশী নামেৰে পৰিচিত৷ আহিন মাহৰ কৃষ্ণপক্ষৰ একাদশী তিথিক ইন্দিৰা একাদশী বুলি কোৱা হয়৷ একাদশী তিথি বিষ্ণুৰ উদ্দেশ্যে নিবেদিত৷ এই দিনটোত বিষ্ণুৰ আৰাধনা কৰা হয়৷
ইন্দিৰা একাদশীৰ তাৰিখ আৰু সময়
এই বছৰ ইন্দিৰা একাদশী পৰিছে আগন্তুক ২৮ ছেপ্টেম্বৰ ২০২৪ শনিবাৰে৷ পঞ্জিকা অনুসৰি আহিন মাহৰ কৃষ্ণপক্ষৰ একাদশী তিথি আৰম্ভ হ’ব ২৭ ছেপ্টেম্বৰ ২০২৪ শুকুৰবাৰৰ দিনৰ ১ বাজি ২০ মিনিটৰ পৰা৷ আৰু একাদশী তিথিৰ অৱসান ঘটিব ২৮ ছেপ্টেম্বৰৰ দুপৰীয়া ২ বাজি ৪৯ মিনিটত৷ উদয়া তিথি অনুসৰি ২৮ তাৰিখে একাদশী পালিত হ’ব৷
ইন্দিৰা একাদশীৰ গুৰুত্ব
পিতৃপক্ষৰ একাদশী তিথি প্ৰয়াত পূৰ্বপুৰুষৰ আত্মাক মুক্ত কৰাৰ বাবে অত্যন্ত গুৰুত্বপূৰ্ণ৷ ইন্দিৰা একাদশী পালন কৰিলে আৰু এইদিনটোত তৰ্পণ কৰিলে পুৰ্বপুৰুষ তৃপ্ত হয়৷ আনকি পূৰ্বপুৰুষে নৰকবাসী হ’লেও ইন্দিৰা একাদশী পালন কৰিলে তাক মুক্তি দিয়া সম্ভৱ৷ উত্তৰপূৰুষে এই একাদশী পালন কৰিলে পিতৃপুৰুষৰ জন্ম মৃত্যুৰ চক্ৰাকাৰ আৱৰ্তৰ পৰা মুক্তি লাভ কৰে বুলি ধৰ্মীয় বিশ্বাস প্ৰচলিত৷
পুৰাণত ইন্দিৰা একাদশীৰ কথা
পুৰাণত ইন্দিৰা একাদশীৰ উল্লেখ পোৱা যায়৷ পুৰাণ অনুসৰি ইন্দিৰা একাদশী পালন কৰাত মহাৰজা ইন্দ্ৰসেনৰ নৰকবাসী পুৰ্বপুৰুষে মুক্তি পাইছিল৷ এই দিনত নাৰায়ণৰ পূজা কৰি এজন ব্ৰাহ্মণক ভোজন কৰাওক৷ ইয়াৰ সৈতে এই দিনটোত বিয়লি কুকুৰক খাদ্য খুৱাওক৷ নিশা জাগি থাকি পিছদিনা পুৱা উপবাস ভংগ কৰিলে একাদশী পালনৰ সম্পূৰ্ণ লাভ আপুনি পাবই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
