নিজৰ ভৱিষ্যৎ সুৰক্ষিত ৰখাৰ বাবে সকলোৱেই নিয়মিত বিনিয়োগ কৰা খুবেই জৰুৰী৷ সেইসকল বেতনভোগীয়েই হওক বা ব্যৱসায়ীয়েই হওক৷ বহুতেই বিনিয়োগৰ নিৰাপদ মাধ্যম হিচাপে বেংক এফ ডিকেই বাছি লয়৷ কোনো কোনোৱে আকৌ শ্বেয়াৰ বজাৰ কিংবা মিউচুৱেল ফাণ্ডতো বিনিয়োগ কৰে৷ এইক্ষেত্ৰত অৱশ্যে কিছু পৰিমানে ৰিস্কো থাকে৷ কিন্তু ৰিটাৰ্ণ বেংক এফ ডিতকৈ বেছি হয়৷
ভাৰতৰ বিনিয়োগকাৰীৰ মাজত সকলোতকৈ ভৰসাযোগ্য আৰু নিৰাপদ স্কিমসমূহৰ মাজত অন্যতম হৈছে পাব্লিক প্ৰভিডেণ্ট ফাণ্ড বা পি পি এফ৷ এয়া এনে এক বিনিয়োগৰ স্কিম, যি দীৰ্ঘম্যাদি বিনিয়োগত সহায়ক৷ আনকি পি পি এফ স্কিমত ৰিটাৰ্ণো বেছি পৰিমাণে পোৱা যায়৷ ফলত যিসকলে নিৰাপদ বিকল্প বিচাৰে তেওঁলোকৰ বাবে পি পি এফ বিশেষভাৱে জনপ্ৰিয়৷ দেশৰ বৃহত্তম চৰকাৰী বেংক ষ্টেট বেংক অফ ইণ্ডিয়া বা এছ বি আইত পিপিএফ একাউণ্ট খুলিব পাৰে৷ দীৰ্ঘম্যাদি বিনিয়োগ কৰাৰ মাধ্যমেৰে বিনিয়োগকাৰীয়ে নিজৰ ভৱিষ্যৎ সুৰক্ষিত কৰিব পাৰে৷ সেই হিচাপ মানি কোনোৱে যদি প্ৰতি বছৰে ৯০হাজাৰ টকাকৈ পিপিএফ স্কিমত বিনিয়োগ কৰে তেন্তে তেওঁ ১৫ বছৰত পাব পাৰে ২৪.৪০লাখ টকা৷ ফলত সৰ্বমুঠ মুনাফা হব পাৰে ১০.৯০ লাখ টকা৷ আৰু সকলোতকৈ ডাঙৰ কথা এয়াই যে এই মুনাফা কিন্তু সম্পূৰ্ণভাৱে টেক্স ফ্ৰি হয়৷ হিচাপ অনুসৰি বিনিয়োগকাৰীয়ে ১ বছৰত ৯০ হাজাৰ টকা বিনিয়োগ কৰিব পাৰে৷ আৰু এয়া ১৫ বছৰ পৰ্যন্ত চলাই যাব লাগিব৷
ম্যাদপূৰ্তি পৰ্যন্ত বিনিয়োগকাৰীয়ে জমা কৰিব মুঠ ১৩ লাখ ৫০ হাজাৰ টকা৷ কম্পাউণ্ডিং বা চক্ৰবৃদ্ধিৰ কাৰণে ম্যাদপূৰ্তিত লাভ কৰিব ২৪ লাখ ৪০ হাজাৰ ৯২৬ টকা৷ ফলত এটা কথা স্পষ্ট যে, ইয়াৰ পৰা বিনিয়োগকাৰীয়ে লাভ হিচাপে পাব ১০ লাখ ৯০ হাজাৰ ৯২৬ টকা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
