অসম লাইভ২৪ঃ ‘গাজাত যুদ্ধ বন্ধ কৰক। অনতিপলমে যুদ্ধ বন্ধ নকৰিলে মুছলমান সমাজে ভোট বৰ্জন কৰিব।’ এই হুমকি দিয়া হৈছে আমেৰিকাৰ ৰাষ্ট্ৰপতি জ’ বাইডেনক। মাৰ্কিন ৰাষ্ট্ৰপতি জ’ বাইডেনক এই ধমকি দিছে আমেৰিকান ডেমোক্ৰেটিক পাৰ্টিৰ ইছলাম ধৰ্মালম্বী সমাজে। ইয়াৰোপৰি পাৰ্টীক দিয়া অনুদান বা সহায়তা সম্পূৰ্ণ বন্ধ কৰাৰো ধমকি দিছে মুছলমান সমাজে। আগন্তুক বৰ্ষত অৰ্থাৎ ২০২৪ত আমেৰিকাত ৰাষ্ট্ৰপতি নিৰ্বাচন অনুষ্ঠিত হ’ব। এইবাৰ ইজৰাইল-হামাছৰ যুদ্ধই প্রভাৱ পেলাব আমেৰিকাৰ ৰাষ্ট্ৰপতি নিৰ্বাচনতো এই কথা প্ৰায় স্পষ্ট হৈ পৰিছে।
ইতিমধ্যেই বাইডেন চৰকাৰক কটাক্ষ কৰি বিশেষ মন্তব্য কৰিছে ৰিপাব্লিকান নেতা ডনাল্ড ট্ৰাম্পেও। আগন্তুক বৰ্ষত অনুষ্ঠিত হ’বলগীয়া ৰাষ্ট্ৰপতি নিৰ্বাচনত ৰাষ্ট্ৰপতি পদৰ প্ৰাৰ্থী হোৱাৰ দৌৰত আছে ট্ৰাম্প। সেয়ে ট্ৰাম্পেও যুদ্ধৰ প্ৰসংগ টানি কৰিছে কেইবাটাও মন্তব্য। গাজাত ইজৰাইলে চলাই থকা আক্ৰমণ বন্ধ কৰিবলৈ মঙলবাৰে বিশেষ চাপ দিয়া হৈছে বাইডেনৰ নিজা দলৰ নেশ্ব্যনেল মুছলিম ডেমক্ৰেটিক শাখাৰ তৰফৰ পৰাও। মিছিগান, ওহিয়ো, পেনছিলভেনিয়াৰ দৰে গুৰুত্বপূৰ্ণ ৰাজ্যসমূহত মুছলমান ডেমক্ৰেটিক শাখাই ভোটদান নকৰাৰ সিদ্ধান্ত লৈছে।
২০২৩ ছিজফায়াৰ আলটিমেটাম শীৰ্ষক এখন পত্ৰ বাইডেনলৈ প্ৰেৰণ কৰিছে মুছলিম ডেমক্ৰেটিক কাউন্সিলে। তাতেই ইজৰাইলী আক্ৰমণক সমৰ্থন কৰি ভোট বা অন্যধৰণৰ সহায় কৰা নহ’ব বুলি ধমকি দিছে মুছলমান সমাজে। এই পত্ৰ লাভ কৰিয়েই অস্বস্তিত ভূগিছে মাৰ্কিন প্ৰেছিডেণ্ট বাইডেনেও। বিষয়টোক লৈ বাইডেনে বৰ্তমানলৈকে কোনো ধৰণৰ মন্তব্য প্ৰকাশ কৰা নাই।
এইসমূহৰ ওপৰিও এক্স হেণ্ডেলত এটা ৯০ ছেকেণ্ডৰ ভিডিঅ’ শ্বেয়াৰ কৰিছে মিনেছোটাৰ পেলেষ্টাইনপন্থী মাৰ্কিন ৰাজনীতিবিদ ৰাছিদা লাইবে। আমেৰিকাৰ পাৰ্লিয়ামেণ্ট কংগ্ৰেছৰো তেওঁ এগৰাকী সদস্য। ভিডিঅ’ত ৰাছিদাই জনোৱা অনুসৰি, ‘ইজৰাইলৰ গণহত্যা বন্ধ নকৰিলে ২০২৪ত আমাৰ ভোট পোৱাৰ আশা নকৰিব।’ অনতিপলমে পেলেষ্টাইনীসকলক সমৰ্থন কৰিবলৈকো আহ্বান জনাইছে ৰাছিদাই। হামাছৰ সৈতে যুদ্ধ আৰম্ভ হোৱাৰ লগে লগেই ইজৰাইলেক আৰ্থিক আৰু সামৰিক সৰঞ্জামেৰে সাহায্য আগবঢ়াইছে আমেৰিকাই। এই বিষয়টোক লৈ ক্ষুদ্ধ হৈ পৰিছে ডেমোক্ৰেটিক দলৰ মুছলমান নেতা-নেত্ৰীসকল। প্ৰেছিডেণ্ট বাইডেনৰ এই পদক্ষেপক মুছলমান সমাজে বিশ্বাসঘাতকতা বুলিও আখ্যা দিছে।
বিশেষজ্ঞসকলৰ দাবী, আগন্তুক বছৰৰ নিৰ্বাচনত দ্বিতীয়বাৰৰ বাবে প্ৰেছিডেণ্ট নিৰ্বাচিত হওঁতে মুছলমান ভোট বাইডেনে লাভ নকৰিবও পাৰে। ২০২০ত মিছিগানত ১৬টা ইলেক্ট্ৰোৰেল ভোটৰ মাত্ৰ ২.৬ শতাংশ ব্যৱধানত জয়ী হৈছিল বাইডেন। গাজাত যুদ্ধ বিৰতি কৰাটো আমেৰিকাৰ পক্ষে কঠিন কাম বুলিও প্ৰকাশ কৰিছে প্ৰতিৰক্ষা বিশেষজ্ঞই। কাৰণ হামাছক সম্পূৰ্ণ নিশেষ কৰাটো ইজৰাইলী সেনাৰ প্রধান লক্ষ্য। সেয়ে ইজৰাইলী সেনাক বাইডেনে যুদ্ধ বন্ধৰ নিৰ্দেশ দিব পাৰিবনে সেয়াহে এতিয়া গুৰুত্বপূৰ্ণ বিষয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
