অসম লাইভ২৪ঃ ৰাজনীতি জন্মৰ পূৰ্বেই এগৰাকী ব্যক্তিৰ জীৱনৰ সৈতে সংপৃক্ত হৈ পৰে। ৰাজনীতিৰ পট ভাৰতত কেনেকৈ কেতিয়া সলনি হয় কোনেও ধৰিব নোৱাৰে! য ৰাতিটোৰ ভিতৰতে সলনি হয় খেল। শেহতীয়াকৈ অমিত শ্বাহৰ সৈতে দক্ষিণৰ জনপ্ৰিয় অভিনেতা জুনিয়ৰ এন টি আৰক একেলগে দেখাৰ পাছতেই দেশজুৰি চৰ্চা লাভ কৰিছে বিশেষ ছবিখনে। অমিত শ্বাহক সাক্ষাৎ কৰি ৰাজনীতিলৈ যাবলৈ মন কৰিছে জুনিয়ৰ এন টি আৰে বুলি সমগ্ৰতে চলিছে চৰ্চা।
অমিত শ্বাহে জুনিয়ৰ এন টি আৰক হায়দৰাবাদত সাক্ষাৎ কৰিছে। এই সাক্ষাতকাৰ অৰাজনৈতিক বুলি দুয়োগৰাকীয়ে দাবী কৰিছে যদিও অমিত শ্বাহৰ এই সাক্ষাতকাৰত আঁৰতো যে কিবা সমীকৰণ আছে সেই কথা একাংশ ৰাজনৈতিক বিশ্লেষকে চৰ্চা কৰিছে।
উল্লেখ্য যে, এই সাক্ষাতকাৰৰ ফটো টুইটাৰত আপলোড কৰি অমিত শ্বাহে জুনিয়ৰ এনটিআৰক প্ৰশংসাৰে উপচায় পেলাইছে। অমিত শ্বাহে তেওঁৰ অফিচিয়েল টুইটাৰ হেণ্ডেলৰ পৰা জুনিয়ৰ এন টি আৰৰ সৈতে হোৱা বৈঠকৰ ফটো শ্বেয়াৰ কৰি লিখিছে, ‘হায়দৰাবাদত এজন অতি প্ৰতিভাশালী অভিনেতা আৰু তেলেগু চিনেমাৰ ৰত্ন জুনিয়ৰ এন টি আৰৰ সৈতে ভালকৈ মত বিনিময় কৰিলো।’
ৰাজনৈতিক বিশ্লেষকৰ মতে, তেলেংগানাত ২০২৩-ৰ ডিচেম্বৰত বিধানসভা নিৰ্বাচন অনুষ্ঠিত হ’ব। নিৰ্বাচনৰ আগমূৰ্হূতত অমিত শ্বাহৰ সৈতে হোৱা এই সাক্ষাতকাৰক সহজে মানি লবলৈ টান পাইছে বিৰোধীমহলেও। একাংশই দাবী কৰিছে যে, তেলেংগানাৰ মুখ্যমন্ত্ৰীৰ প্ৰাৰ্থীত্বও বিজেপিয়ে দিব পাৰে জুনিয়ৰ এন টি আৰক। কিন্তু কি হ’ব সমীকৰণ সেই উত্তৰ দিব সময়েহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
