অসম লাইভ২৪ঃ কেদাৰনাথ দৰ্শনৰ বাবে খোজেৰে যোৱা যাত্ৰীয়ে পুনৰ আৰম্ভ কৰিব পাৰিব যাত্ৰা। তুষাৰপাতৰ বাবে বন্ধ কৰি দিয়া হৈছিল যাত্ৰা যদিও আজি পুনৰ খুলি দিয়া হৈছে ৰাস্তাসমূহ। কুবেৰ আৰু ভৈৰৱ হিমবাহৰ ওচৰত হিমবাহ বিস্ফোৰণৰ বাবে কেদাৰনাথলৈ যোৱা ৰাস্তাটো যান-বাহন তথা খোজেৰে যোৱা দৰ্শনাৰ্থীৰ বাবে বন্ধ কৰি দিয়া হৈছিল। বৃহস্পতিবাৰ অৰ্থাৎ আজিৰে পৰা পুনৰ যান-বাহন সুচাৰুৰূপে আৰম্ভ হৈছে। SDRF আৰু PWB দলে বিগত কেইটা দিনত কৰা পৰিশ্ৰমৰ অন্তত আজি মুকলি কৰা হৈছে কেদাৰানাথৰ ৰাস্তা৷ অৱশ্যে কেৱল খোজকাঢ়ি যোৱা পথচাৰীয়েহে যাত্ৰা কৰিব পাৰিব৷ ঘোঁৰা আৰু খচ্চৰ আৰু দাণ্ডি-কাণ্ডিৰ যাত্ৰা বৰ্তমানো বন্ধ হৈ থকা বুলি জনাইছে উত্তৰাখণ্ডৰ প্ৰশাসনে৷
হিমস্খলনৰ বাবে বুধবাৰে সন্ধিয়া প্ৰায় ৬ বজাত কেদাৰনাথলৈ যোৱা ৪ জন লোক আৱদ্ধ হৈ আছিল। স্থানীয় লোকে লগে লগেই SDRFক খবৰ দিয়াত SDRF দল ঘটনাস্থলীত উপস্থিত হৈ চাৰিজন লোকক উদ্ধাৰ কৰে। হিমবাহত আৱদ্ধ লোকসকলৰ ভিতৰত আছিল চন্দা বাহাদুৰ, শ্বেৰ বাহাদুৰ, খড়ক বাহাদুৰ থাপা আৰু ৰাম বাহাদুৰ। চাৰিওজনে বুধবাৰে লিনচোলিৰ পৰা কেদাৰনাথলৈ যাত্ৰা কৰাৰ সময়ত কুবেৰত হঠাতে হিমস্খলন আৰম্ভ হোৱাত আৱদ্ধ হৈ পৰিছিল ৪ জনীয়া দলটো৷
উল্লেখ্য যে বুধবাৰে সন্ধিয়া বদ্ৰীনাথ ধামতো তুষাৰপাত হোৱা বুলি জনাইছে প্ৰশাসনে। বিগত ৫ দিন ধৰি বদ্ৰীনাথ ধামত ধাৰাবাহিকভাৱে বৰষুণ হৈ আছে। অৱশ্যে বদ্ৰীনাথলৈ যোৱা যাত্ৰীৰ বাবে ৰাস্তাত কোনো বাধা নাই৷ তুষাৰপাতৰ ফলত, ধামৰ তাপমাত্ৰা যথেষ্ট হ্ৰাস পোৱাৰ বাবে তীৰ্থযাত্ৰীসকলক ঠাণ্ডাৰ পৰা নিজকে সুৰক্ষিত ৰাখিবলৈ পৰ্যাপ্ত পৰিমানৰ গৰম কাপোৰ লগত ৰাখিবলৈ আহ্বান জনাইছে প্রশাসনে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
