পশ্চিমী দুনীয়াক আকৌ এবাৰ প্ৰত্যাহ্বান জনাই পাৰমাণৱিক অস্ত্ৰভাণ্ডাৰ বঢ়োৱাৰ কথা ঘোষণা কৰিলে উত্তৰ কোৰিয়াৰ একনায়ক কিম জং উনে৷ মঙলবাৰে তেওঁ ঘোষণা কৰি কয়, ‘আমি পাৰমাণৱিক অস্ত্ৰৰ সংখ্যা দ্ৰুতগতিত বৃদ্ধি কৰিব খোজো৷ সেই উদ্দেশ্যে এক পাৰমাণৱিক অস্ত্ৰ নিৰ্মাণনীতি বাস্তবায়নৰ কাম আৰম্ভ হৈছে৷’ সম্প্ৰতি উত্তৰ কোৰিয়াই পাৰমাণৱিক অস্ত্ৰবাহী ক্ষেপণাস্ত্ৰৰ পৰীক্ষা কৰিছিল৷ তাৰপাছতেই এই ঘোষণা কিমৰ৷ প্ৰসংগত আমেৰিকাৰ সামৰিক পৰ্যবেক্ষণ সংক্ৰান্তিয় গৱেষণা সংস্থা ‘চেণ্টাৰ ফৰ ষ্ট্ৰেটেজিক এণ্ড ইণ্টাৰনেশ্ব্যনেল ষ্টাডিজৰ উপদেষ্টা আৰু সেই দেশৰ জাতীয় নিৰাপত্তা পৰিষদৰ পূৰ্ব এছিয়া বিভাগৰ প্ৰাক্তন প্ৰধান ক্ৰিছ জনষ্টোনে কেইবছৰ পূৰ্বে জনাইছিল যে, পাৰমাণৱিক পৰীক্ষা আৰু অস্ত্ৰ নিৰ্মাণৰ প্ৰয়োজনীয় উপাদান যথেষ্ট পৰিমানে সংগ্ৰহ কৰিছে কিম চৰকাৰে৷ ইয়াৰ পূৰ্বে ২০২২ চনৰ অক্টোবৰত ২০০০ কিঃমিঃ পাল্লাৰ পাৰমাণৱিক অস্ত্ৰ বহন ক্ষমতাসম্পন্ন ক্ৰুজ ক্ষেপণাস্ত্ৰৰ পৰীক্ষা কৰিছিল উত্তৰ কোৰিয়াই৷ তাৰপাছতেই কিমে কৈছিল, ‘শত্ৰুসকলক মনত পেলাই দিব খোজো যে আমাৰ দেশে পাৰমাণৱিক যুদ্ধৰ বাবে সম্পূৰ্ণৰূপে প্ৰস্তুত৷’ মঙলবাৰে উত্তৰ কোৰিয়াৰ ৰাষ্ট্ৰীয় গণমাধ্যম কেছিএনছে জনাইছে যে সেই দেশৰ প্ৰতিষ্ঠা দিৱসৰ কৰ্মসূচীত কিমে কৈছিল, ‘জাতীয় নিৰাপত্তাৰ অধিকাৰ নিশ্চিত কৰাৰ বাবে যি কোনো সময়ত পাৰমাণৱিক অস্ত্ৰ সঠিকভাৱে ব্যৱহাৰ কৰাৰ বাবে প্ৰস্তুতি চলাব লাগিব৷’ একদলীয় উত্তৰ কোৰিয়াৰ শাসক চেন্ট্ৰেল কমিটি অৱ দ্যা ৱাৰ্কাৰ্ছ পাৰ্টী অৱ কোৰিয়াৰ নেতৃত্বকো যিকোনো পৰিস্থিতি মোকাবিলাৰ বাবে সাজু থাকিবলৈ বাৰ্তা দিছে কিম জং উনে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
