২০২৩ চনত বাহানগায় কৰমণ্ডল এক্সপ্ৰেছ দুৰ্ঘটনা৷ তাৰপাছতেই চলিত বছৰত এটাৰ পাছত আনটো ৰে’ল দুৰ্ঘটনা৷ কাঞ্চনজংঘা এক্সপ্ৰেছ, ডিব্ৰুগড় এক্সপ্ৰেছ আৰু এইবাৰ মুম্বাইমুখী এক্সপ্ৰেছ৷ ঘনে ঘনে এই ৰে’ল দুৰ্ঘটনাই ইতিমধ্যেই কেন্দ্ৰৰ ভূমিকাক হৈ প্ৰশ্ন তুলিবলৈ বাধ্য কৰিছে৷ আজিৰ দুৰ্ঘটনাক লৈ কেন্দ্ৰক মুকলি সমালোচনা কৰিছে পশ্চিমবংগৰ মুখ্যমন্ত্ৰী মমতা বেনাৰ্জীয়ে৷ কেন্দ্ৰীয় চৰকাৰৰ অকৰ্মণ্যতাৰ অভিযোগত সমালোচনাৰে সৰৱ হৈছে তেওঁ৷ তৃণমূল নেত্ৰীয়ে এক্স হেণ্ডেলত কেন্দ্ৰক কৰিছে কেইবাটাও প্ৰশ্ন৷
তৃণমূল নেত্ৰী মমতা বেনাৰ্জীৰ প্ৰশ্ন, ‘কৱছ সুৰক্ষা ব্যৱস্থাৰ বাস্তৱায়ন কেতিয়া হ’ব৷ পৃথক ৰে’ল বাজেট উঠাই লোৱাক লৈয়ো এতিয়া কেন্দ্ৰক প্ৰশ্ন কৰিছে বিৰোধীয়ে৷ সমাজবাদী পাৰ্টীৰ প্ৰধান অখিলেশ যাদৱে কয়, ‘ৰে’লমন্ত্ৰীৰ সুৰক্ষা আৰু নিৰাপত্তাক লৈ চৰকাৰে ডাঙৰ ডাঙৰ কথা কয়৷ তাৰপাছতো দুৰ্ঘটনা কেনেকৈ হৈ আছে? কিয় বাৰে বাৰে সাধাৰণ মানুহে প্ৰাণ আহুতি দি থাকিব লগা হৈছে?’
উল্লেখ্য যে বিগত মঙলবাৰে কেন্দ্ৰীয় বাজেট পেছ কৰাৰ সময়ত বিত্তমন্ত্ৰী নিৰ্মলা সীতাৰমণৰ মুখ ৰে’লৰ উল্লেখ শুনা গৈছিল কেৱল এবাৰেই৷ প্ৰায় ডেৰ ঘণ্টীয়া দীৰ্ঘ বাজেট বক্তৃতাত ৰে’লৰ বাবে বিশেষ একো ঘোষণা নকৰিলে বিত্তমন্ত্ৰী নিৰ্মলাই৷ এই বিষয়টোক লৈ হেমন্ত চুৰেণৰ দলৰ এগৰাকী সাংসদে কয়, ‘বিত্তমন্ত্ৰীয়ে ৰে’লৰ বাবে কোনো কথাই বাজেটত ৰখা নাই৷ ৰে’লৰ বাবে পূৰ্বে পৃথক বাজেট হৈছিল৷ সেইসমূহ এতিয়া দূৰৈৰে কথা বাজেটত ৰে’লৰ শিতানেই নাই৷’ ৰে’ল বাজেট কিয় উঠাই লোৱা হ’ল সেই প্ৰশ্ন উত্থাপন কৰিছে তৃণমূলৰ সাংসদেও৷ অতীত দোহাই দি তৃণমূলৰ সাংসদে কয়, ‘১৯৬৫ চনৰ হোৱা ৰে’ল দুৰ্ঘটনাৰ সময়ত তৎকালীন ৰে’লমন্ত্ৰী লাল বাহাদুৰ শাস্ত্ৰীয়ে লগে লগেই মন্ত্ৰিত্ব ত্যাগ কৰিছিল৷ আৰু এতিয়াৰ ৰে’লমন্ত্ৰী!’
ইফালে আৰজেডিৰ সাংসদ মনোজ ঝায়েও ৰে’লত আৰম্ভ কৰা কৱছ চিষ্টেমক লৈ প্ৰশ্ন তুলিছে? ক’ত গ’ল কৱছ চিষ্টেম? তেওঁ লগতে কয়, ‘এতিয়া ৰে’ল দুৰ্ঘটনা নিত্য নৈমিত্ৰিক ঘটনাৰ দৰে হৈ পৰিছে৷ বিগত বৰ্ষৰ বাজেটত কৱছ ব্যৱস্থাকলৈ বৃহৎ বৃহৎ দাবী কৰা হৈছিল৷ কিন্তু এইবাৰৰ বাজেটত এবাৰলৈকো কবছৰ কথা উল্লেখ কৰা নহ’ল৷’ ইয়াৰোপৰি কংগ্ৰেছ সাংসদ মানিকৰাম ঠাকুৰে কয়, ‘অশ্বিনী বৈষ্ণৱ ৰে’লমন্ত্ৰী হিচাপে নহয় দুৰ্ঘটনা মন্ত্ৰী হিচাপে সদায়ে স্মৰণীয় হৈ থাকিব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
