সম্প্ৰতি আমাৰ দেশত ব্লাড কেন্সাৰত আক্ৰান্ত লোকৰ সংখ্যা তীব্ৰভাৱে বৃদ্ধি পাইছে৷ ব্লাড কেন্সাৰ এক বিপজ্জনক ৰোগ যিয়ে আমাৰ তেজ, অস্থি মজ্জা বা লিম্ফ চিষ্টেমৰ পৰা আৰম্ভ হয়৷ ই ৰক্ত কোষৰ কাৰ্যকাৰিতা সম্পূৰ্ণৰূপে ব্যাহত কৰে৷ দেৰীকৈ ৰোগবিধ চিনাক্ত হলে চিকিৎসা খুবেই কঠিন হৈ পৰে৷ বহুক্ষেত্ৰত ৰোগীয়ে যুদ্ধ কৰাৰ অৱস্থাও নাথাকে৷ চিকিৎসা আৰম্ভ হোৱাৰ লগে লগেই মৃত্যুৰ মুখতো পৰে বহুজন৷
প্ৰাথমিক লক্ষণসমূহ চিনাক্ত কৰি তাৎক্ষণিক চিকিৎসা আৰম্ভ কৰিলেই জীৱন ৰক্ষা পৰিব পাৰে৷ বহুতেই এই সতৰ্কতাসমূহক সাধাৰণ স্বাস্থ্য সমস্যা হিচাপে বিবেচনা কৰে আৰু এইসমূহক উপেক্ষা কৰে৷ ব্লাড কেন্সাৰৰ প্ৰধান প্ৰাথমিক লক্ষণসমূহ কি কি জানক?
ঘনে ঘনে জ্বৰ, সংক্ৰমণ
ইমিউন চিষ্টেম দুৰ্বল হলে শৰীৰৰ ক্ষুদ্ৰতম জীৱাণুসমূহৰ সৈতে যুঁজ কৰাৰ ক্ষমতা হেৰুৱাই৷ ফলত বাৰে বাৰে জ্বৰ আৰু সংক্ৰমণে দেখা দিয়ে৷ আনকি সৰু ক্ষত শুকাবলৈকো বহু সময় লাগে৷
ক্ৰমাগত ক্লান্তি, অলসতা
লোহিত ৰক্তকণিকাৰ সংখ্যা কমি গলে শৰীৰত অক্সিজেনৰ সৰবৰাহ কমি যায়৷ ই আপোনাক কোনো কাম নকৰিলেও অত্যন্ত ক্লান্ত আৰু শক্তিহীন কৰি তুলে৷
সহজ ক্ষততেই অস্বাভাৱিক ৰক্তপাত
শৰীৰত প্লেটলেট কমি গলে ছালত কোনো কাৰণ অবিহনেই নীলা বা বেঙুনীয়া ৰঙৰ দাগ পৰে৷
নাকৰ পৰা ঘনে ঘনে ৰক্তপাত
দাঁত ব্ৰাছ কৰাৰ সময়ত দাঁতৰ আলুৰ পৰা ৰক্তপাত আৰু মহিলাৰ মাজত ঋতুস্ৰাৱৰ সময়ত অত্যধিক ৰক্তপাতো এক গুৰুত্বপূৰ্ণ সতৰ্কতা৷
হাঁড় বা জয়েণ্ট বিষ, লিম্ফ নোড
যদি ডিঙি, কাষলতিত বিষহীন ফোলাভাৱে দেখা দিয়ে তেন্তে এয়া লিউকেমিয়া বা লিম্ফোমাৰ দৰে তেজৰ কৰ্কটৰ লক্ষণ হব পাৰে৷ অস্থিমজ্জাত কেন্সাৰৰ কোষ বাঢ়িলে কঁকাল, নিতম্বত প্ৰচণ্ড বিষ হয়৷
হঠাৎ ওজন কমি যোৱা
কোনো ডায়েট বা ব্যায়াম অবিহনেই যদি হঠাৎ ওজন হ্ৰাস হয় সেয়াও কৰ্কটৰেই লক্ষণ৷ কৰ্কটৰ বিৰুদ্দে যুঁজ কৰিবলৈ শৰীৰৰ অত্যধিক শক্তি ব্যৱসায় হৈ থকাৰ ফলত ব্যক্তিগৰাকী ক্ষীণাই যাব পাৰে৷ খাদ্যগ্ৰহণৰ প্ৰতি অনিহা অহাৰ বাবে ওজন হ্ৰাস হব পাৰে৷
- কিছু ব্যক্তিৰ নিৰ্দিষ্ট কিছু কাৰণত ব্লাড কেন্সাৰৰ আশংকা বাঢ়ে৷ যদি কোনো নিকটাত্মীয়ৰ তেজৰ কৰ্কট থাকে তেন্তে আপোনাৰো এই ৰোগত জেনেটিকভাৱেই আক্ৰান্ত হোৱাৰ আশংকা থাকে৷ পেইণ্ট, ইন্ধন আদিত ব্যৱহৃত বেনজিনৰ দৰে ক্ষতিকৰ ৰাসায়নিক বা বিকিৰণৰ সংস্পৰ্শত থাকিলে এই ৰোগত আক্ৰান্ত হোৱাৰ আশংকা বাঢ়ে৷ দুৰ্বল ৰোগ প্ৰতিৰোধ ব্যৱস্থাৰ কাৰণে এইছ আই ভি, লুপাছ, ৰিউমেটয়েড, আৰ্থ্ৰাইটিছৰ দৰে সমস্যাত আক্ৰান্ত ব্যক্তিৰ এই আশংকা বেছি থাকে৷
- ধূমপান আৰু এলকহল পান কৰা অভ্যাসে ধীৰে ধীৰে তেজ আৰু অস্থি মজ্জাৰ ক্ষতি কৰিব পাৰে আৰু কৰ্কটত আক্ৰান্ত হোৱাৰ আশংকা বঢ়াই তুলিব পাৰে৷ অতীতত যিসকলে অন্য কৰ্কটৰ বাবে কেমোথেৰাপি লৈছে তেওঁলোকৰো ব্লাড কেন্সাৰত আক্ৰান্ত হোৱাৰ সম্ভাৱনা বেছি থাকে৷ এয়া সাধাৰণতে ৬০ বছৰতকৈ বেছি বয়সীয়াসকলৰ মাজত দেখা যায়৷ কিছু ধৰণৰ তেজৰ কৰ্কট শিশুসকলৰ মাজতো দেখা দিব পাৰে৷
- ব্লাড কেন্সাৰ সম্পূৰ্ণৰূপে নিৰ্মূল কৰা সম্ভৱ নহয় যদিও কিছু সতৰ্কতা অৱলম্বন কৰি এয়া হ্ৰাস কৰিব পাৰে৷ ৰাসায়নিক কাম কৰাৰ সময়ত প্ৰতিৰক্ষামূলক পোছাক পিন্ধক৷ ফল আৰু পাচলি প্ৰচুৰ পৰিমাণে খাওক৷
- পৰিয়ালৰ কৰ্কটৰ ইতিহাস থাকিলে নিয়মিত স্বাস্থ্য পৰীক্ষা আৰু তেজৰ পৰীক্ষা কৰক৷ দুই সপ্তাহতকৈ বেছি সময় ধৰি অবিৰাম ক্লান্তি, কোনো কাৰণ অবিহনেই ওজন কমি যোৱা, অস্বাভাৱিক ৰক্তক্ষৰণ বা জ্বৰৰ দৰে উপসৰ্গই দেখা দিলে দ্ৰুত চিকিৎসকৰ শৰণাপন্ন হওক৷ সমস্যাটো সাধাৰণ পৰীক্ষা যেনে চিবিচি টেষ্ট বা অস্থি মজ্জা পৰীক্ষাৰ মাধ্যমেৰে চিনাক্ত কৰিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
