৩০০ ফুট দ’ খাৱৈত বাগৰি পৰিল গাখীৰ ভৰ্তি টেংকাৰ, ৫ জন নিহত, ৪ জন আহত
ৰাষ্ট্ৰীয় ঘাইপথত এক শোকাৱহ দুৰ্ঘটনা। প্ৰায় ৩০০ ফুট দ’ খাৱৈত বাগৰি পৰিল এখন গাখীৰ ভৰ্তি টেংকাৰ। যাৰ ফলত ঘটনাস্থলীতে প্ৰাণ হেৰুৱালে ৫ জন লোকে, লগতে আন ৪ জন লোক গুৰুতৰভাৱে আহত। মহাৰাষ্ট্ৰৰ মুম্বাই নাশিক ঘাইপথৰ নিউ কাছাৰা ঘাটৰ সমীপত সংঘটিত হৈছে এই ঘটনা।
চালকজনে নিয়ন্ত্ৰণ হেৰুৱাৰ বাবে গাখীৰ ভৰ্তি টেংকাৰখন ৩০০ ফুট দ’ খাৱৈত বাগৰি পৰে। এই ঘটনাত ৫ জন লোকৰ মৃত্যু হোৱাৰ লগতে ৪ জন গুৰুতৰভাৱে আহত হোৱাৰ খবৰ পোৱা গৈছে। আহত সকলক উদ্ধাৰ কৰি ততাতৈয়াকৈ নিকট হাস্পতালত ভৰ্তি কৰোৱা হৈছে।
দুৰ্ঘটনাটোৰ তথ্য পোৱাৰ লগে লগে দুৰ্যোগ ব্যৱস্থাপনা দলটোৱে সেই স্থানত উপস্থিত হৈ সাহায্যৰ কাম আৰম্ভ কৰে। অঞ্চলটোত হোৱা ধাৰাসাৰ বৰষুণৰ ফলত উদ্ধাৰ অভিযানত বাধাৰ সৃষ্টি হৈছিল। ৰছীৰ সহায়ত দুৰ্যোগ ব্যৱস্থাপনা দলৰ লোকে নামি গৈ খাৱৈৰ পৰা গুৰুতৰভাৱে আহত তিনিজন লোকক উলিয়াই আনে। ইয়াৰ পিছত আহতসকলক লগে লগে এম্বুলেন্সেৰে কাছাৰা গ্ৰাম্য চিকিৎসালয়ত ভৰ্তি কৰোৱা হয়।
দুৰ্যোগ ব্যৱস্থাপনা দলৰ লোকে ৫টা মৃতদেহ উদ্ধাৰ কৰাৰ লগতে চাৰিজন আহতক উদ্ধাৰ কৰে। আহতসকলক নৰেন্দ্ৰ মহাৰাজৰ এম্বুলেন্সৰ জৰিয়তে স্থানীয় চৰকাৰী চিকিৎসালয়লৈ প্ৰেৰণ কৰা হয়। মৃতদেহ কেইটা ব্যক্তিগত এম্বুলেন্সত ৰাখি মৰণোত্তৰ পৰীক্ষাৰ বাবে কাছাৰা প্ৰাথমিক স্বাস্থ্য কেন্দ্ৰলৈ প্ৰেৰণ কৰে। মহকুমা আৰক্ষী বিষয়া মিলিন্দ শিণ্ডে, তহচিলদাৰ পাৰ্মেশ্বৰ কাছুলে, হাইৱে ডি ৱাই এছ পি প্ৰদীপ মৈৰালে, কাছাৰা থানাৰ ভাৰপ্ৰাপ্ত বিষয়া সুনীল বাছাও আৰু ঘাইপথ আৰক্ষী বিষয়াই ঘটনাস্থলীত উপস্থিত হৈ পৰিস্থিতি পৰিদৰ্শন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
