মাজনিশা ৫.১ আৰু ৪.৭ প্ৰাবল্যৰ ভূমিকম্পৰ জোকাৰণি, প্ৰৱল ভূমিকম্পৰ আশংকা ব্যক্ত, প্ৰশাসনৰ সতৰ্কবাণী
পুনৰ আন দুটাকৈ ভূমিকম্পই জোকাৰি যায় জাপান। ৫.১ প্ৰাবল্যৰ আৰু ৪.৭ প্ৰাবল্যৰ দুটাকৈ ভূমিকম্পৰ প্ৰবল কম্পন অনুভূত হৈছে দেশখনত। ভূমিকম্পৰ কেন্দ্ৰবিন্দু আছিল টকিঅ’ৰ উত্তৰ-পূবৰ ইবাৰাকিত। জাপানৰ বতৰ সংস্থাৰ তথ্য অনুসৰি মধ্য টকিঅ’লৈকে ভূমিকম্পৰ কম্পন অনুভৱ কৰা হৈছিল।
জাপানৰ বতৰ বিজ্ঞান বিভাগৰ তথ্য অনুসৰি সোমবাৰে নিশা স্থানীয় সময় অনুসৰি মাজনিশা ১২.৫০ বজাত প্ৰথমটো ভূমিকম্প আহে আৰু তাৰ ঠিক পাছতে আনটো ভূমিকম্পৰ জোকাৰণি।
এই দুটা ভূমিকম্পৰ ফলত কোনো ছুনামীৰ আশংকা কৰা নাই। কিন্তু আন এক আশংকাইহে দেখা দিছে। প্ৰৱল ভূমিকম্পৰ আশংকা কৰিছে বতৰ বিজ্ঞান কেন্দ্ৰৰ ফালৰ পৰা। যাৰ বাবে সাধাৰণ জনতাক সতৰ্ক হৈ থাকিবলৈ আহ্বান জনাইছে দেশ খনৰ প্ৰশাসনে।
কিয়নো কালি নিশাৰ দুটাকৈ ভূমিকম্পৰ পূৰ্বে ৮ আগষ্ট তাৰিখেও ৭.১ ৰিখটাৰ স্কেলৰ তীব্ৰতাৰ ভূমিকম্পই জোকাৰি গৈছিল জাপান। সেই ভূমিকম্পৰ তীব্ৰতা অধিক থকাৰ লগতে ছুনামীৰ আশংকা কৰা হৈছিল। অৱশ্যে সৌভাগ্যক্ৰমে ছুনামী নাহে। কিন্তু কেইবা মিটাৰলৈ উঠে সাগৰৰ ঢৌ।
ভূকম্পন বিভাগৰ মতে, কালি নিশাৰ ভূমিকম্পৰ কেন্দ্ৰবিন্দু সমতলৰ পৰা ১০ কিলোমিটাৰ গভীৰতাত আছিল। ভূমিকম্পৰ কম্পন ইমানেই প্ৰবল আছিল যে ইয়াৰ প্ৰভাৱ আনকি মধ্য টকিঅ’তো অনুভৱ কৰা হৈছিল। কিন্তু ছুনামীৰ কোনো সতৰ্কবাণী জাৰি কৰা হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
