অসম লাইভ২৪ঃ মণিপুৰত অব্যাহত আছে হিংসাত্মক পৰিস্থিতি। বিগত ৩ দিন ধৰি জ্বলিছে মণিপুৰ। বৰ্তমানলৈ ৰাজ্যখনত হিংসাৰ বলি হৈছে ৫৮গৰাকী লোক। ৰাজ্য এৰি বহুতো বাসিন্দাই এতিয়া পলায়নো কৰিছে। মণিপুৰ এৰি পলাই অহা একাংশ লোকে এই অভিজ্ঞতাৰ কথা বৰ্ণানা কৰিছে। কেনে বিভীষিকাময় সময় তেওঁলোকে পাৰ কৰি পলাই আহিবলৈ বাধ্য হৈছে সেই কথাও প্ৰকাশ কৰিছে। ৰাষ্ট্ৰীয় সংবাদমাধ্যমক অনলাইন ভিডিঅ’ কলযোগে বাৰ্তা পঠিয়াইছে মণিপুৰৰ এগৰাকী বাসিন্দাই। তেওঁ বৰ্তমান সপৰিয়ালে ৰাজ্য এৰি পলায়ন কৰিছে। ক’ত কোনে আশ্ৰয় লৈছে ধৰিব পৰা নাই। বুধবাৰে নিশাৰে পৰাই অপ্ৰীতিকৰ পৰিস্থিতি বুলিও জনাইছে বাসিন্দাগৰাকীয়ে।
ভিডিঅ’ বাৰ্তাত ব্যক্তিজনে কয়, ‘মণিপুৰত বুধবাৰ নিশাৰে পৰাই হিংসাত্মক পৰিস্থিতিৰ উদ্ভৱ হৈছে। ৰাজ্যৰ সংখ্যাগৰিষ্ঠ মেইতেই সম্প্ৰয়ায়ক এছ টি মৰ্যাদা দিয়াক কেন্দ্ৰ কৰিয়েই এই বিতৰ্কৰ সূত্ৰপাত। আমাৰ ৰাজ্যত বুধবাৰৰ পৰাই ইণ্টাৰনেট সেৱা ব্যাহত হৈ আছে। গণ্ডগোলৰ কথা শুনি ভৱাই নাছিলো এইধৰণৰ ৰূপ ল’ব বুলি। যি হৈছে সেয়া ভাষাৰে কৈ বুজাব নোৱাৰিম। ইম্ফলত ঘৰ-বাৰী জ্বলি আছে। ভাৱিছিলো আৰক্ষীয়ে সহায় কৰিব। কিন্তু আৰক্ষীয়েও জনতাক সহায় কৰা নাই। ইম্ফলত এতিয়া এনে লাগিছে যেন আমাৰ ইম্ফল কোনোবাই দখল কৰি ল’লে। মোৰ ঘৰ থানাৰ নিচেই কাষত যদিও মই নিৰাপদ নহ’লো। দিনে ৰাতিয়ে আমাৰ আশেপাশে কেৱল বোমা বিস্ফোৰণ আৰু কান্দোনৰ শব্দ। আমি এটা ৰুমত আৱদ্ধ হৈ তিনিদিন কটালো।’
ইয়াৰোপৰি স্থানীয় বাসিন্দাজনে কয়, ‘খিৰিকিয়ে আমি জুমি চালেই চৌদিশে ধোঁৱা আৰু জুই দেখিছো। আৰক্ষীয়ে একোৱেই কৰিব পৰা নাই। মানুহৰ চিৎকাৰ শুনিছো। সুৰক্ষাৰ বাবে অৰ্ধসামৰিক কেম্পত আমি গৈ আশ্ৰয় ললো। কিন্তু তাতো আমি সুৰক্ষিত নহ’লো। ইমান মানুহ কেম্পত আছিল যে সকলোৰে বাবে ব্যৱস্থা কৰি দিয়া তেওঁলোকৰ বাবেও অসম্ভৱ হৈ পৰিছে। পৰ্যাপ্ত পানীও তাত খাবলৈ পোৱাত অসুবিধা হৈছে। ইণ্টাৰনেট সেৱা ব্যাহত বাবে বিমানৰ টিকেট কৰিও কোনোৱে মণিপুৰ এৰিব পৰা নাই। ৰাজ্যৰ বাহিৰত থকা আত্মীয়ই একাংশক টিকেট কৰি ওলিয়াই আনিছে। কিন্তু আমাৰ সকলোৰে মণিপুৰৰ বাহিৰত পৰিয়াল নাই। ইফালে একাংশই আমাৰ অসহায়তাৰ সুযোগ লৈ টিকটৰ দামো বঢ়াই দিছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
