মেট্ৰিমনিয়েল ৱেবচাইটৰ মহিমাৰ বলত এজন ব্যক্তিয়ে দেশৰ সাত ৰাজ্যৰ পৰা ১৪ গৰাকী পত্নীক বিয়া কৰাই আৰক্ষীৰ হাতত গ্ৰেপ্তাৰ হৈছে৷
গ্ৰেপ্তাৰ হোৱা এই ব্যক্তি গৰাকী হৈছে ওড়িশাৰ কেন্দ্ৰপাৰা জিলাৰ পাটকুৰা আৰক্ষী থানাৰ অন্তৰ্গত এখন গাঁৱৰ বিধু প্ৰকাশ শ্বাৱেইন ওৰফে ৰমেশ শ্বাৱেইন৷
সোমবাৰে ভুৱনেশ্বৰৰ আৰক্ষী উপ আয়ুক্ত উমশংকৰ দাসে সংবাদ মাধ্যমৰ আগত প্ৰকাশ কৰা অনুসৰি ১৯৮২ চনত অভিযুক্ত ব্যক্তিজনে প্ৰথমবাৰ বিবাহপাশত আৱদ্ধ হৈছিল৷ ইয়াৰ পিছতে ২০০২ চনত প্ৰথমা পত্নীৰ অজ্ঞাতে তেওঁ দ্বিতীয় বিবাহ কৰোৱায়৷ এই দুই পত্নীৰ ফালৰ পৰা তেওঁৰ পাঁচগৰাকী সন্তানৰ পিতৃ৷
ইয়াৰ পিছতে অভিযুক্ত ব্যক্তিজনে তেওঁৰ বিবাহ কৰোৱাৰ মাৰাথন দৌৰ আৰম্ভ কৰে৷ আৰক্ষীয়ে প্ৰকাশ কৰা মতে ২০০২ চনৰ পৰা ২০২০ চনৰ ভিতৰত লোকজনে আন পত্নীসকলক অজ্ঞাতে ৰাখি অন্য ১২ গৰাকী পত্নীক বিবাহ কৰোৱায়৷
দিল্লীৰ এখন বিদ্যালয়ৰ শিক্ষয়িত্ৰী নৱতমা পত্নীৰ সৈতে অভিযুক্ত লোকজনে ওড়িশাৰ ৰাজধানী চহৰ ভুৱনেশ্বৰ বসবাস কৰি আছিল৷ তেতিয়াই তেওঁৰ নৱতমা পত্নীয়ে স্বামীৰ পূৰ্বৰ বিবাহসমূহৰ বিষয়ে অৱগত হয় আৰু আৰক্ষীৰ থানাত স্বামীৰ বিৰুদ্ধে অভিযোগ দাখিল কৰে৷
অভিযোগ লাভ কৰিয়ে আৰক্ষীয়ে লোকজনক ভাৰাঘৰৰ পৰা গ্ৰেপ্তাৰ কৰে৷ ইয়াৰ পিছতে লোকজনে মেট্ৰিমনিয়েল ৱেবচাইটত উচ্চ শিক্ষিতা মধ্যবয়সীয়া মহিলাৰ সৈতে যোগাযোগ কৰি নিজৰ জালত পেলাই বিবাহপাশত আৱদ্ধ হৈ অহাৰ তথ্য পোহৰলৈ আহে৷
নিজকে চিকিৎসক আৰু অধিবক্তাৰ পৰিচয়েৰে মেট্ৰিমনিয়েল চাইটৰ জৰিয়তে লোকজনে মধ্যবয়সীয়া বিবাহ বিচ্ছেদিত মহিলাসকলক লক্ষ্য কৰি লৈছিল৷ বিবাহপাশত আৱদ্ধ হৈ পূৰ্বৰ পত্নীসকলৰ পৰা ধন সৰকাই তেওঁলোকক ত্যাগ কৰি লোকজনে পুনৰ মেট্ৰিমনিয়েল চাইটত অন্য মহিলাৰ সন্ধানত নামি পৰে৷ এইদৰেই অভিযুক্ত লোকজনে যোৱা ২০০২ চনৰ পৰা ২০২০ চনৰ ভিতৰত ১২ গৰাকী পত্নীক বিয়া কৰোৱাইছিল৷
আৰক্ষীয়ে প্ৰকাশ কৰা অনুসৰি অভিযুক্ত লোকজনে বিয়া কৰোৱা প্ৰথম দুগৰাকী পত্নীৰ ওড়িশাৰ হোৱাৰ পৰিৱৰ্তে অন্য ১২ গৰাকীৰ পত্নী হৈছে ক্ৰমে দিল্লী, পঞ্জাৱ, অসম, ঝাৰখণ্ড আদি ৰাজ্যৰ৷
অভিযুক্ত লোকজনৰ বিৰুদ্ধে গোচৰ ৰুজু কৰা পত্নীগৰাকীক ২০১৮ চনত দিল্লীত বিয়া কৰোৱাইছিল আৰু ইয়াৰ পিছতে ভুৱনেশ্বৰলৈ লৈ আনিছিল৷ পত্নীগৰাকীয়ে অভিযুক্ত লোকজনৰ পূৰ্বৰ বিবাহসমূহৰ বিষয়ে অৱগত হৈ যোৱা বৰ্ষৰ জুলাইৰ মাহতে আৰক্ষীৰ থানাত অভিযোগ দাখিল কৰিছিল৷ ইয়াৰ পিছতে আৰক্ষীয়ে তদন্ত আৰম্ভ কৰি লোকজনক গ্ৰেপ্তাৰ কৰে৷
ডিচিপি উমাশংকৰ দাসে জনোৱা অনুসৰি ইয়াৰ পূৰ্বে লোকজনক ঋণ জালিয়াতি আৰু যুৱকক প্ৰৱঞ্চনা কৰাৰ অভিযোগত হায়দৰাবাদ আৰু ইৰ্ণাকুলাম আৰক্ষীয়েও দুবাৰকৈ গ্ৰেপ্তাৰ কৰিছিল৷
ভুৱনেশ্বৰ আৰক্ষীয়ে অভিযুক্ত লোকজনক গ্ৰেপ্তাৰ কৰাৰ সময়ত ১১ খন এটিএম কাৰ্ড, ৪ খন আধাৰ কাৰ্ডসহ অন্যান্য বহু ভুৱা নথিপত্ৰও উদ্ধাৰ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
