অসম লাইভ২৪ঃ ১৯৮৭ চনৰ ২৪ জুন। এই দিনটোতে আৰ্জেণ্টিনাত জন্ম হৈছিল মহা তাৰকা মেছিৰ। এটা দুখীয়া পৰিয়ালত জন্মগ্ৰহণ কৰা এজন কিশোৰে যে এদিন ফুটবলেৰে বিশ্বজয় কৰিব সেই সময়ত কোনোৱে চিন্তা কৰা নাছিল। কিয়নো ১১ বছৰ বয়সতে মেছি আক্ৰান্ত হৈছিল দুৰাৰোগ্য ৰোগত। তাৰপাছত আৰু বিশ্বজয়ৰ সপোনৰ কথা জানো কোনোবাই ভাবিব পাৰে।
সময়ৰ সৈতে আগবাঢ়ে বয়স। কিন্তু মেছিৰ ক্ষেত্ৰত জানো কোনোৱে বিচাৰে, প্ৰিয় ফুটবল তাৰকাগৰাকীক বাৰ্ধক্যই কোঙা কৰক। মানিব নোৱাৰিলেও, এয়াই শেষ খেল মেছিৰ। আগন্তুক বিশ্বকাপত কমেণ্টাৰীত আৰু শুনা নাপাব মেছিৰ নাম। আজি কাটাৰৰ লুছেইল ষ্টেডিয়াম সাক্ষী হ’ব লিয়োনেল মেছিৰ অন্তিমখন খেলৰ।
খেলৰ পাৰদৰ্শিতাৰ বাবেই লিয়োনেল মেছি আজি বিশেষভাৱে চৰ্চাত আছে এনে নহয়। সেই মহান তাৰকা, ফুটবলৰ জাদুগৰ, GREATEST OF ALL TIME খ্যাত লিয়োনেল মেছি সাজু হৈছে জীৱনৰ অন্তিম বিশ্বকাপৰ বাবে। মেছি আত্মবিশ্বাসী। এইবাৰ বিশ্বকাপ আৰ্জেণ্টিনাই জয় কৰিবই। বাধাৰ সকলো প্ৰাচীৰ ভাঙি বিশ্বকাপ লৈ যাব নিজ দেশলৈ। বিদায় বেলাত দেশবাসীৰ হাতত তুলি দিব আন এক বৃহৎ সাফল্য।
ফুটবল কেৰিয়াৰত এটাৰ পিছত আনটো সফলতা অৰ্জন কৰা লিয়নেল মেছি নতশিৰ মাত্ৰ বিশ্বকাপ ট্ৰফীটোৰ সন্মুখত। ৫ বাৰ বিশ্বকাপ ফুটবল খেলিও এবাৰো চেম্পিয়ন হ’ব পৰা নাই লিয়নেল মেছিৰ দলটো। সকলো সফলতা পোৱাৰ পাছতো কেৱল বিশ্বকাপ জয়ৰ বাবে থমকি ৰৈছে লিয়নেল মেছি। দৃঢ় বিশ্বাস আৰু কঠোৰ পৰিশ্ৰমে মানুহৰ ভাগ্যকো সলনি কৰিব পাৰে সেই বিশ্বাসেৰে অন্তিমখন বিশ্বকাপত ট্ৰফী হাতত তুলি ল’বলৈ আত্মবিশ্বাসী মেছি।
অতি কম বয়সৰে পৰা ফুটবল খেলা এইজন মহান তাৰকাক চিনি নোপোৱা বহুত কম মানুহ ওলাব। আনকি মেছিক সেইজনেও চিনি পায় যিজনে ফুটবলৰ বিষয়েই একো নাজানে। সৰু কালতে গ্ৰোথ হৰ্মোন ডিফিচেন্সীত ভুগিছিল এইজন তাৰকা। কিন্তু অসুখ হেঙাৰ নহ’ল তেওঁ দৃহ মনটোৰ কাষত। আইতাকে বিচাৰিছিল মেছি এজন খ্যাতনামা ফুটবলাৰ হওক। এফালে আইতাকৰ সপোন, আনফালে অসুখ! মেছিৰ কোমল মনত তেতিয়া কেৱল মাত্ৰ উজলি থাকে ফুটবলটো।
দৃঢ়মনা মনটোৰ বাবেই মেছিয়ে সকলো বাধাৰ প্ৰাচীৰ ভাঙি বিশ্ববিখ্যাত ফুটবলাৰৰূপে নিজকে প্ৰতিষ্ঠিত কৰি তুলিলে। এনেকৈয়ে ফুটবলটো সামৰি এটা দুটাকৈ ৩৫ বা বসন্ত কোন বাটে কেনি গ’ল ধৰিবকেই নোৱাৰিলে কোনোৱে। তথাপিও সকলোৰে আশা প্ৰিয় ফুটবলাৰগৰাকীয়ে দুভৰিৰ যাদু দেখুওৱাৰ পৰা আঁতৰি নাযাওক। কিন্তু সকলোৰে এটা সময় থাকে। মেছিয়েও বিচাৰিছে চাপত আৰু তেওঁ বিশ্বকাপ নেখেলে। বয়স থাকোতেই দেশলৈ সন্মান কঢ়িয়াই স-সন্মানে ফুটবলৰ পৰা বিদায় ল’বলৈ। অৱশ্যে দেওবাৰে ফ্ৰান্সৰ বিৰুদ্ধে হ’বলগীয়া খেলখনত বিশ্বকাপ জয়ৰ স্বপ্ন পূৰণ হ’বনে মেছিৰ সেয়াহে লক্ষ্যনীয় বিষয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ