ডিজিটেল ডেস্কঃ ‘আপোনালোকে চিন্তা নকৰিব। যিমান পাৰে সন্তান জন্ম দিয়ক। প্ৰধানমন্ত্ৰী নৰেন্দ্ৰ মোদীয়ে সকলোৰে ঘৰ আৰু থকা-খোৱাৰ সুবিধা কৰি দিব। কিয়নো প্ৰধানমন্ত্ৰী মোদীৰ শাসনকালত কোনোলোকেই অন্ন-বস্ত্ৰ-বাসস্থানৰ অভাৱত থাকিব লগা নহয়।’- প্ৰধানমন্ত্ৰী নৰেন্দ্ৰ মোদীৰ কাম-কাজক প্ৰশংসা কৰিবলৈ গৈ এইবাৰ বিৰ্তকত সোমাই পৰিছে এগৰাকী মন্ত্ৰী।
ৰাজস্থানৰ ভজনলাল চৰকাৰৰ মন্ত্ৰী বাবুলাল খৰাড়ীয়ে এখন জনসভাত প্ৰধানমন্ত্ৰী নৰেন্দ্ৰ মোদীৰ দুটাকৈ কাৰ্যকালৰ বিৱৰণ দিবলৈ গৈ নিজেই বিৰ্তকত সোমাই পৰিছে। মন্ত্ৰীগৰাকীয়ে প্ৰতিনিধিত্ব কৰা খৰাড়ী বিধানসভ সমষ্টিটোৰ ৰাইজক যিমান পাৰে সিমান সন্তান জন্ম দিবলৈ আহ্বান জনায়। এই আহ্বানৰ অন্তৰালত যুক্তি দি মন্ত্ৰীগৰাকীয়ে লগতে কয় যে, প্ৰধানমন্ত্ৰী মোদীৰ শাসনকালত কোনোৱেই চিন্তা কৰিব লগা নাই।
মন্ত্ৰীগৰাকীৰ এই বক্তব্যৰ ভিডিঅ শেহতীয়াকৈ ভাইৰেল হৈ পৰিছে। আদিবাসী ক্ষেত্ৰ উন্নয়ন দপ্তৰৰ মন্ত্ৰীগৰাকীয়ে ভাৰত সংকল্প যাত্ৰাৰ এক অনুষ্ঠানত অংশ লৈ এই বক্তব্য প্ৰদান কৰিছিল। উল্লেখ কৰা প্ৰয়োজন যে, জনতাক অধিক সন্তান জন্ম দিবলৈ আহ্বান জনোৱা মন্ত্ৰীগৰাকীয়ে আছে দুগৰাকী পত্নী আৰু ৭টাকৈ সন্তান।
এটা দায়িত্বশীল পদবীত থাকি জনতাক এনে আহ্বান জনোৱা মন্ত্ৰীগৰাকীক অপসাৰণৰ দাবীও তুলিছে বিৰোধীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
