দেশৰ ক্ৰীড়াক্ষেত্ৰৰ সৰ্বোচ্চ সন্মান হৈছে অৰ্জুন বঁটা। ২০২৩ বৰ্ষৰ অৰ্জুন বঁটাৰ বাবে চৰ্চালৈ আহিছে ভাৰতৰ তাৰকা পেচ বলাৰ মহম্মদ ছামীৰ নাম। এদিনীয়া বিশ্বকাপত দুৰ্দান্ত প্ৰদৰ্শন আগবঢ়োৱা মহম্মদ ছামীয়ে অৰ্জুন বঁটা লাভ কৰাৰ সম্ভাৱনা প্ৰকট হৈছে। ইয়াৰ বাবে বিচিচিআয়ে অৰ্জুন বঁটাৰ মনোনয়নৰ বাবে ছামীৰ নাম প্ৰেৰণ কৰাৰ লগতে খেল মন্ত্ৰালয়ক বিশেষ অনুৰোধ জনাইছে।
২০২৩ এদিনীয়া ক্ৰিকেট বিশ্বকাপত মহম্মদ ছামীয়ে দমনীয় প্ৰদৰ্শনেৰে সাতখন মেচত ২৪ টা উইকেট দখল কৰিবলৈ সক্ষম হয়। বিশ্বকাপৰ প্ৰথম চাৰিখন মেচত উপেক্ষিত ছামীয়ে পৰৱৰ্তী সময়ত সুযোগৰ সৎ ব্যৱহাৰ কৰি ভাৰতক ফাইনেলত উপনীত কৰোৱাত গুৰুত্বপূৰ্ণ ভুমিকা পালন কৰে। ফাইনেলত অষ্ট্ৰেলিয়াৰ হাতত ভাৰত পৰাজিত হ’লেও ভাৰতীয় দলৰ লগতে মহম্মদ ছামীৰ প্ৰদৰ্শনে প্ৰসংশা বুটলিবলৈ সক্ষম হয় ক্ৰীড়াপ্ৰেমীৰ।
ভাৰতৰ বেডমিণ্টন যুটি সাত্বিক সাইৰাজ আৰু চিৰাগ চেট্টী মনোনীত হয় দ্বিতীয় সৰ্বোচ্চ ক্ৰীড়া সন্মান মেজৰ ধ্যানচান্দ খেলৰত্ন বঁটাৰ বাবে। মেজৰ ধ্যানচান্দ খেলৰত্ন বঁটাৰ তালিকাত নাম নথকা বাবে বিচিচিআয়ে মহম্মদ ছামীক অৰ্জুন বঁটাৰ বাবে মনোনীত কৰিবলৈ খেল মন্ত্ৰালয়ক বিশেষ অনুৰোধ জনোৱা বুলি এক সুত্ৰত প্ৰকাশ।
আনহাতে, আন ১৬ গৰাকী ক্ৰীড়াবিদ অৰ্জুন বঁটাৰ বাবে মনোনীত হোৱাৰ লগতে দ্ৰোণাচাৰ্য বঁটাৰ বাবে মনোনয়ন লাভ কৰিছে পাঁচগৰাকী ক্ৰীড়াবিদে। ধ্যানচান্দ জীৱনজোৰা সাধনা বঁটাৰ তালিকাত আছে তিনিগৰাকী ক্ৰীড়াবিদ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
