অসম লাইভ ২৪ঃ প্ৰেমত নৃশংসতাই নাথাকে, প্ৰেমত আৱেগো থাকে। আৱেগবোৰ কেতিয়াবা প্ৰশংসাৰ কাৰণ হৈ ধৰা দিয়ে যদি আন কেতিয়াবা প্ৰেমৰ বাবেই ফ্ৰিজত চেঁচা হৈ পৰি থাকে প্ৰেয়সীৰ শৰীৰৰ খণ্ডিত দেহ।
দুয়োটাই ব্ৰেকিং নিউজ। বিগত কেইটামান দিন পূৰ্বে আমাৰ দেশতেই ৩৫ টুকুৰাৰে প্ৰেমৰ সমাপ্তি ঘটিছিল আফতাব-শ্ৰদ্ধাৰ। আফতাবৰ নৃশংসতাৰ বিপৰীতে প্ৰাৰ্থনা-বিতোপনৰ প্ৰেমে কৈ গ’ল স্বৰ্গীয় সংজ্ঞা। প্ৰেম নৃশংসই নহয়, প্ৰেম স্বৰ্গীয়ও। প্ৰাৰ্থনা গুচি গ’লেও বিতোপনৰ বুকুত প্ৰতিদিনেই পবিত্ৰ প্ৰেমৰ দোহাই দি জী থাকিব প্ৰাৰ্থনা। সাত জনমৰ সংগীক আদৰিবলৈ হোমৰ জুইয়েই কিয় লাগে। সম্বন্ধৰ নাম দিয়ে চিতাৰ জুইয়েও।
বিতোপন-প্ৰাৰ্থনা সপোনা আছিল একেলগে জীৱনৰ কঠিন বাট আগুৱাব। ১৮ নৱেম্বৰ ২০২২, শুকুৰবাৰ। প্ৰাৰ্থনাৰ ঘৰত আহি উপস্থিত হৈছিল মৰিগাঁৱৰ বিতোপন তামুলী। সেন্দুৰৰ ফোঁট আঁকি দিলে প্ৰাৰ্থনাৰ কপালত আৰু শিৰত। এবাৰ দুবাৰ নহয় কেইবাবাৰো সেন্দুৰৰ ফোঁট দি বিতোপনে পিন্ধাই দিলে প্ৰাৰ্থনাক এডাল বগা ফুলৰ মালা। তাৰপাছত আন এডাল ফুলৰ মালা প্ৰাৰ্থনাৰ হাতত স্পৰ্শ কৰাই নিজেও পিন্ধি ল’লে।
বিতোপনে সেন্দুৰ দিয়েই শুই পৰে প্ৰাৰ্থনা শুই থকা ঢাৰিখনত। বিতোপনক সঁহাৰি দিবলৈ প্ৰাৰ্থনা তেতিয়া নীৰৱ, নিমাত। চাপৰৰ কচুৱাৰ ঘৰখনত কেৱল কান্দোনৰ ৰোল। কান্দোন ধৰি ৰাখিব পৰা নাই চুবুৰীয়াই। কন্যাক হেৰুৱাৰ দুখত উচুপি উঠিল ঘৰখন। উচুপি উচুপি বিতোপন তামুলীয়ে হাত বোলাই থাকিল নিথৰ প্ৰাৰ্থনাৰ মূৰত।
ৰহাৰ এই দৃশ্য সামাজিক মাধ্যমত ভাইৰেল হৈ পৰিছে। দেখা মাত্ৰকেই প্ৰতিজন লোকেই ভিডিঅটো দেখি চকুলো টুকিছে। বহু দিনীয়া প্ৰেমৰ সম্পৰ্ক আছিল দুয়োৰে মাজত। কিন্তু বিগত কেইটিমান দিন পূৰ্বে এসপ্তাহ মানৰ আগতে প্ৰাৰ্থনা অসুস্থ হৈ পৰে।
এক জটিল ৰোগত আক্ৰান্ত হৈ চিকিৎসালয়ত ভৰ্তি হোৱা প্ৰাৰ্থনাই বৃহস্পতিবাৰে শেষ নিশ্বাস ত্যাগ কৰিলে। কৰ্মসূত্ৰে প্ৰাৰ্থনাৰ পিতৃ বাহিৰত থাকে। আৰ্থিকভাৱে স্বচ্ছল নোহোৱাৰ বাবে মৃতদেহ চিকিৎসালয় মৰ্গত থৈ শুকুৰবাৰৰ দিনাহে লৈ যোৱা হ’ল চাপৰৰ কচুৱাৰ ঘৰখনলৈ।
প্ৰেয়সীৰ মৃত্যুৰ খবৰ পোৱা মাত্ৰকেই লৱৰি আহে বিতোপনো। যুগ্ম জীৱনৰ সপোন আধৰুৱা হ’লেও সাতবছৰীয়া প্ৰতিশ্ৰুতিবোৰ আধৰুৱাকৈ এৰি দিব নোৱাৰি। প্ৰাৰ্থনা চিতাৰ জুইত বিলীন হৈ যোৱাৰ পূৰ্বে প্ৰাৰ্থনাৰ সৈতে দেখা সপোনটোক পূৰ্ণতা দিব খোজাত বাধা নিদিলে সমাজখনেও। প্ৰাৰ্থনাৰ উকা কপালত আঁকি দিলে এমুঠি ৰঙা। মৃত্যুৰ শেতেলিত শুই পৰিলেও প্ৰেমৰ ৰঙেৰে ৰঙীন হৈ পৰিল প্ৰাৰ্থনা। প্ৰেয়সীৰ প্ৰতি থকা দায়িত্ববোধত অকণো গাফিলতি নকৰিলে বিতোপনে।
প্ৰাৰ্থনাৰ নশ্বৰদেহ বিলীন হ’ল পঞ্চভূতত। প্ৰাৰ্থনা গুচি গ’লেও থৈ গ’ল পৰিচয়। জীৱিত অৱস্থাত যদিও বিতোপনৰ পত্নী হ’ব নোৱাৰিলে তথাপিও চিতাৰ জুইকুৰা সাক্ষী হ’ল বিতোপনে দিয়া বিশেষ এই মৰ্যাদাৰ। সংঘাতময় এই পৃথিৱীত এই বাৰ্তাই দিলে জীৱনবোধৰ অনন্য সংজ্ঞা।
সিদিনা দিল্লীৰ ঘটনাটোৱে প্ৰেমৰ নৃশংসতা আৰু আক্ৰোশক প্ৰতিফলিত কৰিছিল। ৩৫ টুকুৰা মৃতদেহ দলিয়াই শেষ কৰিবলৈ ১৮ দিন সময়ৰ প্ৰয়োজন হৈছিল প্ৰেমিকৰূপী হত্যাকাৰীজনক। কিন্তু ইয়াৰ বিপৰীতে বিতোপনে দেখুৱাই দিলে প্ৰেম মৃত্যুৱে কাঢ়িব নোৱাৰে।
যাৱতীয় নিয়মৰ মাজেৰে প্ৰাৰ্থনাৰ শ্মশান যাত্ৰাতো দেখা গ’ল বিতোপনক। কলপুলিৰ তলেৰে ন-বোৱাৰী আদৰাৰ পৰিৱৰ্তে সদ্যবিবাহিত প্ৰাৰ্থনাক তুলি দিয়া হ’ল চিতাত। এই দৃশ্য দেখা মাত্ৰকেই কৈ উঠিছে সকলোৱে প্ৰেম সঁচাই অনন্য। হীৰুদাৰ ভাষাত প্ৰেম হেনো এনেকুৱাই আৱৰণ খুলি হৃদয় জুৰাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ