অসম লাইভ২৪ঃ হোমৰ গুৰিত দৰাক বহুৱাব নোৱাৰা অৱস্থা। বহি থাকিবলৈ দৰা শক্তিহীন হৈ পৰিছে। গোলাপী নিচাত মাতাল হৈ থকা দৰাক দেখিয়েই বিয়া কৰাবলৈ অমান্তি হয় কইনা। এই ঘটনা নলবাৰীৰ বৰখনাজানৰ।
মদৰ বাবেই ভাগিল এখন বিয়া। বিয়া কৰাবলৈ গৈ মদৰ নিচাত বিয়াথলীতে শুই পৰে দৰা। মদৰ নিচাত ফিটিং হৈ থকা দৰাক দেখি বিয়াত নবহিল কইনা। কইনা অবিহনে হোমৰ গুৰিৰ পৰা উভতিল দৰাঘৰীয়া৷ বৃহস্পতিবাৰৰ দিনটোত এই ঘটনা। দিনটোৰ ব্যস্ততাৰ অন্তত নিশা ১১ মান বজাত কইনা ঘৰত উপস্থিত হয় দৰা। গোলাপী নিচাত দৰাই স্থান-কাল-পাত্ৰ পাহৰিয়েই পেলাই।
সুৰাৰ নিচাতেই কইনা ঘৰৰ হোমৰ গুৰিত বেছিসময় বহি থাকিব নোৱাৰি বিবাহ মণ্ডপত শুই পৰে দৰা। লগে লগেই বিয়া নপতাৰ সিদ্ধান্ত লৈ কইনাই দৰাঘৰীয়াক যাবৰ বাবে নিৰ্দেশ দিয়ে। বিবাহ অনুষ্ঠান পৰিণত হয় ৰাইজ মেলৰ বাকৰিত। গাঁওপ্ৰধান, স্থানীয় জ্যেষ্ঠ নাগৰিক সমন্বিতে ৰাইজ আলোচনাত বহে। ইপিনে গোটেই ঘটনা সহিব নোৱাৰি কইনাৰ পিতৃক হাস্পতালত ভৰ্তি কৰাবলগীয়া পৰিস্থিতিৰো সৃষ্টি হয়। এই বিষয়ক লৈ কইনা পক্ষই ইতিমধ্যে এজাহাৰ দাখিল কৰিছে।
উল্লেখ্য যে এই সমূহ ঘটনাক কেন্দ্ৰ কৰি দৰাপক্ষই আকৌ কইনাৰ ওপৰতেই অভিযোগ আনিছে। কইনাৰ অইন স্থানত কোনো সম্পৰ্ক থকাৰ বাবেই এই বিয়া বাতিল কৰাৰ অভিযোগ আনিছে দৰাৰ মাতৃয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
